“No Garem Fasin for Komplen”
“Gohed for duim evri samting and no garem fasin for komplen.”—PHILIPPIANS 2:14.
1, 2. Wanem kaonsel nao aposol Paul givim long olketa Christian long Philippi and Corinth, and why nao olsem?
LONG leta bilong hem for olketa long kongregeson long Philippi, aposol Paul givim staka praise. Hem praisem olketa Christian long datfala taon for wei wea olketa kaen tumas and strong for duim service, and hem talemaot wei wea olketa gudfala waka bilong olketa mekem hem hapi. Nomata olsem, Paul remindim olketa for “gohed for duim evri samting and no garem fasin for komplen.” (Philippians 2:14) Why nao Paul givim disfala kaonsel?
2 Paul savve long samting wea savve kamaot from wei for komplen. Tu-thri year bifor hem raetem diswan, hem remindim kongregeson long Corinth hao hem danger samting for komplen. Paul remindim olketa hao taem olketa Israelite stap long wilderness, plande taem olketa mekem Jehovah kros. Hao nao olsem? Long wei for laekem tumas olketa nogud samting, duim fornication and worshipim idol, testim Jehovah, and long wei for komplen. Paul encouragem olketa long Corinth for lane from olketa example hia. Hem sei: “No kamap pipol wea komplen, olsem samfala long olketa komplen, gogo, olketa dae from wanfala trabol.”—1 Corinthians 10:6-11.
3. Why nao iumi distaem interest long disfala subject abaotem wei for komplen?
3 From iumi olketa servant bilong Jehovah distaem, iumi showimaot semkaen spirit olsem olketa long kongregeson long Philippi. Iumi strong for duim olketa gudfala waka, and iumi garem love for each other. (John 13:34, 35) Bat taem iumi tingim nogud samting wea pipol bilong God bifor kasem bikos long wei for komplen, iumi garem gudfala reason for followim disfala kaonsel: “Gohed for duim evri samting and no garem fasin for komplen.” Firstaem, bae iumi lukim samfala example insaed Bible saed long wei for komplen. Then, bae iumi storyim samfala samting wea iumi savve duim for stopem wei wea fasin for komplen savve spoelem narawan distaem.
Wanfala Wicked Sekson Komplen Againstim Jehovah
4. Wanem nao olketa Israelite komplen abaotem long wilderness?
4 Bible iusim datfala Hebrew word for komplen taem hem storyim olketa samting wea olketa Israelite duim long 40 year wea olketa wakabaot long wilderness. Samfala taem, olketa Israelite no hapi witim living bilong olketa and olketa showimaot diswan thru long wei for komplen. Olsem example, tu-thru week bihaen Jehovah mekem olketa kamap free from wei for slave long Egypt, “full sekson bilong olketa son bilong Israel start for komplen againstim Moses and Aaron.” Olketa Israelite komplen abaotem kaikai, and sei: “Bae hem gud sapos Jehovah killim mifala dae taem mifala stap yet long land bilong Egypt, taem mifala sidaon witim olketa pot wea garem meat insaed, and taem mifala kaikaim bred gogo mifala satisfae, bikos iufala tekem mifala kam insaed long disfala wilderness for killim dae disfala full kongregeson witim bigfala hangre.”—Exodus 16:1-3.
5. Taem olketa Israelite komplen, hu nao datwan wea olketa really komplen againstim?
5 Olketa Israelite no fit for talem datwan. Jehovah givim olketa samting wea olketa needim long wilderness, and hem showimaot love long wei for givim olketa kaikai and wata. Hard for olketa Israelite dae from hangre long wilderness. Nomata olsem, olketa start for story olsem olketa no garem eni samting. Nomata olketa komplen againstim Moses and Aaron, Jehovah ting long diswan olsem wei for komplen againstim hem. Moses talem olketa Israelite: “Jehovah herem wei wea iufala komplen againstim hem. Mitufala no important. Iufala no komplen againstim mitufala, really, iufala komplen againstim Jehovah.”—Exodus 16:4-8.
6, 7. Olsem Numbers 14:1-3 showimaot, hao nao tingting bilong olketa Israelite hem change?
6 No longtaem bihaen, olketa Israelite komplen moa. Moses sendem 12-fala man for go spae long Promis Land. Tenfala kam bak and talem nogud report. Wanem nao kamaot from diswan? “Evriwan long olketa son bilong Israel start for komplen againstim Moses and Aaron, and full sekson hia start for sei olsem againstim olketa: ‘Mifala shud dae taem mifala stap yet long land bilong Egypt or long wilderness! And why nao Jehovah hem tekem iumi kam insaed disfala land [Canaan] for pipol killim iumi dae witim sword? Olketa bae tekem olketa waef and pikinini bilong iumi. Bae hem moabeta sapos iumi go bak long Egypt.’”—Numbers 14:1-3.
7 Tingting bilong Israel barava change nao! Long firstaem, wei wea olketa tinghae and thankiu long God for wei wea olketa kamap free from Egypt and sev thru long Red Sea muvim olketa for singim olketa praise long Jehovah. (Exodus 15:1-21) Bat from olketa garem hard living long wilderness and olketa fraetem pipol long Canaan, olketa lusim datfala feeling for tinghae, and start for no satisfae witim datwan. Olketa shud thankiu long God for freedom wea olketa kasem, bat olketa rong for sei olketa no garem wanem olketa needim and olketa blamem hem nao. So fasin for komplen hem showimaot wei for no tinghae long olketa samting wea Jehovah provaedem. Iumi minim nao why hem sei: “Hao long nao bae disfala wicked pipol gohed long komplen bilong olketa againstim mi?”—Numbers 14:27; 21:5.
Fasin for Komplen Long First Century
8, 9. Talem samfala example bilong wei for komplen long olketa Christian Greek Scripture.
8 Olketa example wea iumi storyim finis hem olketa wea luk olsem olketa barava talemaot nao komplen bilong olketa. Bat taem Jesus Christ hem long Jerusalem for datfala Festival bilong Olketa Smol Leaf Haos long 32 C.E., “evriwan wea hipap tok smol abaotem hem.” (John 7:12, 13, 32) Olketa tok smol long each other and sei hem wanfala gud man, and olketa narawan talem hao hem no wanfala gud man.
9 Long narataem, Jesus and olketa disaepol bilong hem kaikai long haos bilong Levi, wea hem nao Matthew, datfala man for kolektem tax. “Olketa Pharisee and olketa scribe bilong olketa start for komplen long olketa disaepol bilong hem and sei: ‘Why nao iufala kaikai and drink witim olketa man for tekem tax and olketa sinner?’” (Luke 5:27-30) Bihaen, long Galilee, “olketa Jew start for komplen long Jesus bikos hem sei: ‘Mi nao bred wea kam daon from heven.’” Nomata samfala follower bilong Jesus tu bat feel nogud long wanem hem talem and olketa start for komplen.—John 6:41, 60, 61.
10, 11. Why nao olketa Jew wea iusim Greek languis komplen, and wanem gudfala samting nao olketa Christian elder savve lanem from wei wea olketa aposol deal witim datfala komplen?
10 Samting wea kamaot from wanfala komplen no longtaem bihaen Pentecost 33 C.E., hem gud. Plande long olketa niu disaepol wea kam from difren ples enjoyim kaikai and samfala nara need wea olketa long Judaea provaedem for olketa, bat problem kamap saed long wei for sharem samting wea olketa provaedem. Bible hem sei: “Olketa Jew wea tok long Greek languis start for komplen abaotem olketa Jew wea tok long Hebrew languis, bikos olketa wea givimaot kaikai evriday miss for givim kaikai long olketa widow bilong olketa.”—Acts 6:1.
11 Olketa hia wea komplen no olsem olketa Israelite long wilderness. Olketa Jew wea story long Greek languis no komplen from olketa selfish and no satisfae witim wanem olketa kasem. Olketa talem nomoa hao datfala arrangement no satisfaem need bilong samfala widow woman. And tu, olketa no laek for mek trabol and barava talemaot komplen againstim Jehovah. Olketa talem komplen bilong olketa long olketa aposol, and from diswan, olketa aposol arrange for stretem datwan kwiktaem, bikos samting olketa komplen abaotem hem fitim nao. Olketa aposol showimaot gudfala example for olketa Christian elder distaem! Olketa spiritual shepherd hia mek sure olketa no ‘satem ear bilong olketa for no lisin long komplen bilong man nating.’—Proverbs 21:13; Acts 6:2-6.
Keakea Long Nogud Wei wea Komplen Savve Affectim Iumi
12, 13. (a) Givim example wea showimaot samting wea savve kamaot from wei for komplen. (b) Wanem nao maet kosim samwan for komplen?
12 Klosap evriwan long olketa example from Bible wea iumi storyim showimaot hao wei for komplen hem barava spoelem pipol bilong God bifor. Dastawe, iumi shud tingting gud abaotem nogud samting wea savve kamaot from fasin for komplen distaem. Wanfala tokpiksa bae helpem iumi for minim hao diswan hem olsem. Hem isi for plande difren kaen iron for rasta. Sapos man no aotem rasta taem hem just start for showaot, gogo, datfala iron bae iusles nao. Staka trak barava nogud nao, no bikos engine hem nogud, bat bikos body bilong trak hem barava rasta and hem no sef for man draevem nao. Hao nao disfala tokpiksa hem join witim wei for komplen?
13 Hem wei bilong samfala iron for savve rasta kwiktaem, olsem tu, hem isi for olketa man wea no perfect for komplen. Iumi mas careful and luksavve sapos iumi start for garem wei for komplen. Olsem wei wea wata and salt savve mekem samting for rasta kwiktaem, hard taem or olketa hevi savve mekem hem isi for iumi komplen. Olketa hevi savve mekem hem isi for man barava feel nogud long olketa smol samting nomoa. Taem laef long olketa last day hia kamap moa hard, for sure, plande moa samting bae kamap wea bae mekem man komplen. (2 Timothy 3:1-5) Dastawe, maet wanfala servant bilong God start for komplen againstim narawan. Maet samting wea kosim diswan hem smol samting nomoa, olsem wei for no hapi witim wik point bilong narawan, savve bilong hem, or olketa privilege wea hem garem insaed organization bilong Jehovah.
14, 15. Why nao iumi shud kwiktaem stretem iumiseleva sapos iumi start for garem wei for komplen?
14 Nomata wanem nao mekem iumi for no hapi, sapos iumi letem iumiseleva gohed for komplen, datwan savve mekem iumi no hapi long eni samting and laek for komplen olowe. Tru nao, wei for komplen savve barava spoelem spiritual saed bilong iumi. Taem olketa Israelite komplen abaotem laef long wilderness, olketa barava blamem Jehovah nao. (Exodus 16:8) Iumi barava no laek for duim datwan!
15 Iumi savve stopem wei wea iron savve kwiktaem for rasta sapos iumi iusim kaen paint wea stopem rasta, and for kwiktaem aotem rasta taem hem just start. Olsem tu, sapos iumi luksavve iumi start for garem problem witim fasin for komplen, iumi savve kontrolem datwan thru long wei for prea abaotem datwan and duim samting kwiktaem for stretem datwan. Hao nao diswan savve helpem iumi?
Garem Sem Wei for Ting Long Samting Olsem Jehovah
16. Sapos iumi garem wei for komplen, wanem nao bae helpem iumi for no duim datwan?
16 Wei for komplen mekem iumi tingim iumiseleva nomoa and olketa problem bilong iumi and no tingim nao olketa blessing iumi kasem from iumi wanfala Witness bilong Jehovah. Sapos hem wei bilong iumi for komplen and iumi barava laek for lusim datkaen wei, iumi need for tingim evritaem olketa blessing hia. Olsem example, each wan long iumi garem nambawan privilege for garem nem bilong Jehovah. (Isaiah 43:10) Iumi savve mekem grow klos wei for fren witim hem, and iumi savve story long “Datwan wea herem prea” long enitaem. (Psalm 65:2; James 4:8) Laef bilong iumi barava garem mining bikos iumi minim disfala kwestin abaotem hu nao fit for sovereign ruler bilong universe, and iumi tingim evritaem hao hem privilege for gohed faithful long God. (Proverbs 27:11) Iumi savve share evritaem long waka for preachim gud nius bilong Kingdom. (Matthew 24:14) Wei for garem faith long ransom sakrifaes bilong Jesus Christ hem givim iumi klin conscience. (John 3:16) Nomata wanem hard taem iumi kasem, olketa hia nao olketa blessing wea iumi enjoyim.
17. Why nao iumi shud trae for garem sem wei for ting long samting olsem Jehovah, nomata sapos iumi garem gudfala reason for komplen?
17 Hem bae gud for iumi trae for garem sem wei for ting long samting olsem Jehovah, no just followim tingting bilong iumiseleva. David hem sei long datfala psalm bilong hem: “Mekem mi savve long olketa wei bilong iu, O Jehovah; teachim mi olketa road bilong iu.” (Psalm 25:4) Sapos iumi garem gudfala reason for komplen, Jehovah hem luksavve long datwan tu. Hem savve stretem datwan kwiktaem sapos hem laekem. So why nao hem letem hard taem wea kasem iumi for gohed samfala taem? Maet for helpem iumi mekem grow olketa gudfala fasin, olsem patient fasin, fasin for no givap, faith, and long-safaring.—James 1:2-4.
18, 19. Givim example abaotem gudfala samting wea savve kamaot from wei for no komplen taem problem kamap.
18 Wei for gohed strong and no komplen nomata iumi kasem olketa hard samting hem helpem iumi for mekem grow olketa gudfala fasin, and tu, hem savve helpem olketa wea lukim wei wea iumi deal witim datwan. Long 2003, wanfala grup bilong Olketa Jehovah’s Witness travel from Germany go long Hungary insaed wanfala bas for attendim wanfala convention. Man wea draevem bas no wanfala Witness, and hem no really laek for stap witim olketa Witness for tenfala day. Bat long end bilong datfala gogo, hem barava change mind nao. Why nao olsem?
19 Long datfala gogo, samfala samting happen wea mekem hem hard lelebet for olketa brata. Bat olketa nating komplen. Datfala draeva talem hao olketa brata hia winim eni nara grup bilong olketa passenger wea hem tekem! Hem promis for next taem olketa Witness kam long haos bilong hem, hem bae invaetem olketa for kam insaed haos and lisin long olketa. Wei wea olketa passenger hia “no garem fasin for komplen,” hem barava givim gudfala witness long datfala man!
Wei for Forgive Hem Strongim Wan Mind
20. Why nao iumi shud forgivim each other?
20 Waswe sapos iumi feel nogud long samting wea narawan insaed kongregeson duim? Sapos datwan hem serious, iumi shud followim olketa principle wea Jesus talem long Matthew 18:15-17. Bat bae iumi no evritaem need for duim diswan bikos staka problem olsem hem no serious. Hao sapos iumi ting long diswan olsem chance for showimaot fasin for forgive? Paul hem sei: “Gohed for patient witim each other and willing for forgivim each other sapos eniwan garem reason for komplen againstim narawan. From Jehovah hem willing for forgivim iufala, iufala mas duim olsem tu. Bat, witim evri samting hia, iufala mas werem love olsem kaleko, from hem nao perfect wei for keepim wan mind.” (Colossians 3:13, 14) Waswe, iumi willing for forgivim narawan? Jehovah garem plande reason for komplen abaotem iumi. Nomata olsem, hem olowe showimaot fasin for kea long iumi and hem forgivim iumi.
21. Hao nao wei for komplen savve affectim olketa wea lisin long iumi?
21 Nomata wanem samting nao hem mekem iumi feel nogud, wei for komplen bae no stretem datwan. Hebrew word for “komplen” savve minim tu for “mekem bigfala noise.” Man wea komplen savve mekem iumi feel nogud and iumi laek stap klia long hem. Sapos iumi komplen olsem, maet olketa wea lisin bae garem sem feeling. Tru nao, maet olketa laek for stap klia long iumi! Maet wei for talemaot big komplen bilong iumi mekem olketa narawan herem datwan, bat hem bae no mekem olketa laek for fren witim iumi.
22. Wanem nao wanfala gele hem sei abaotem Olketa Jehovah’s Witness?
22 Wei for forgive hem strongim wei for garem wan mind, wea datwan nao hem samting wea pipol bilong Jehovah barava lovem. (Psalm 133:1-3) Long wanfala kantri long Europe, wanfala gele wea 17 year and wea hem wanfala Catholic, raet go long branch office bilong Olketa Jehovah’s Witness for talem wei wea hem tinghae long olketa. Hem sei: “Organization bilong iufala hem only organization mi savve long hem wea fasin for heit, greedy fasin, wei for no laek acceptim man, and selfish fasin, no mekem pipol bilong hem divaed.”
23. Wanem nao bae iumi storyim long next article?
23 Wei for tinghae long evri spiritual blessing wea iumi olketa worshiper bilong tru God, Jehovah, kasem, bae helpem iumi for strongim go moa wan mind and stap klia long wei for komplen againstim narawan. Next article bae showim hao olketa fasin wea God teaching iumi for garem bae stopem iumi for garem wei for komplen wea moa serious, hem nao, wei for komplen againstim organization bilong Jehovah long earth.
Waswe, Iu Remember?
• Wanem nao insaed wei for komplen?
• Wanem tokpiksa nao savve showimaot samting wea kamaot from wei for komplen?
• Wanem nao savve helpem iumi for kontrolem wei for komplen?
• Hao nao wei for iumi willing for forgive savve helpem iumi for no komplen?
[Piksa long page 9]
Taem olketa Israelite komplen, really, olketa komplen againstim Jehovah!
[Piksa long page 11]
Waswe, iu trae for garem sem wei for ting long samting olsem Jehovah?
[Piksa long page 12]
Wei for forgive savve strongim go moa Christian wei for wan mind