Noah and Flood Wanfala Tru Story
WASWE, iu laek stap long ples wea pipol stap gud witim evriwan, wea no eni war, raf pipol, or olketa bigman spoelem pipol? Sapos iu laekem kaen ples olsem, bae iu laekem wanfala story from bifor wea maet iu herem finis. Hem story bilong Noah, wanfala gud man wea buildim wanfala ark. Disfala ark sevem hem and famili bilong hem taem flood kasem full world and olketa nogud pipol dae.
Staka pipol nao savve long disfala story. Story bilong Noah hem stap insaed Bible long Genesis chapter 6 go kasem 9. Staka pipol garem olketa kastom story long diswan, and buk bilong olketa Muslim, wea hem nao Koran, hem storyim diswan tu. Waswe, datfala Flood hem happen or hem wanfala kastom story nomoa for helpem pipol? Olketa savveman bilong religion and olketa scientist storyim diswan for staka year finis. Nomata olsem, Bible barava talem stret hao disfala story hem tru wan. Tingim olketa samting hia:
Buk bilong Genesis hem talem barava year, month, and day wea datfala Flood hem kam, wanem taem nao Flood hem finis and ples wea ark hem sidaon long hem bihaen, and tu, wanem taem nao earth hem drae moa bihaen long datfala Flood. Hem storyim tu barava plan bilong datfala ark, olsem long bilong hem, big bilong hem, and olketa material wea olketa iusim for wakem datfala ark. Plande taem olketa kastom story wea pipol talem no savve storyim kaen samting olsem.
Tufala buk long Bible wea storyim famili laen showimaot Noah hem wanfala man wea stap bifor. (1 Chronicles 1:4; Luke 3:36) Ezra and Luke, wea raetem tufala buk hia barava chekim gud samting wea olketa raetem. Luke hem storyim famili laen bilong Jesus Christ go kasem Noah.
Olketa nara man wea storyim Noah and Flood hem profet Isaiah and Ezekiel, and aposol Paul and Peter tu.—Isaiah 54:9; Ezekiel 14:14, 20; Hebrews 11:7; 1 Peter 3:19, 20; 2 Peter 2:5.
Jesus Christ hem storyim Flood taem hem sei: “Olsem wanem hem happen long taem bilong Noah, bae hem olsem tu long taem bilong Son bilong man. Long taem bilong Noah, pipol gohed for kaikai, olketa drink, olketa man and woman marit, go kasem day wea Noah hem go insaed long ark. Long taem hia nomoa datfala flood hem kam and pipol hia dae nao.” (Luke 17:26, 27) Sapos datfala Flood hem no happen, then toktok bilong Jesus abaotem “taem bilong Son bilong man” hem toktok nating nomoa.
Aposol Peter talem finis hao “pipol” bae tok daonem samting wea Bible talem. Peter hem sei: ‘Olketa no laek savve hao earth long taem bilong Noah hem finis taem wata hem kavarem.’ Waswe, iumi tu olsem pipol hia wea “no laek savve” long diswan? Nomoa! Peter hem sei moa: “Skae and earth wea stap distaem redi for finis long fire and weitim day bilong judgment and taem wea olketa man wea no followim God bae finis.”—2 Peter 3:3-7.
Olsem long bifor, God bae finisim nogud pipol, bat gudfala pipol bae no dae. Sapos iumi followim Noah, God bae sevem iumi tu witim gudfala pipol and bae iumi evriwan stap long nambawan world.