Jehovah “Sevem” Pipol Bilong Hem Bifor
‘God, plis iu kam kwiktaem, bikos iu nomoa savve helpem mi and sevem mi.’—PS. 70:5.
1, 2. (a) Pipol bilong God savve prea long hem taem olketa kasem wanem samting? (b) Wanem kwestin nao kamap? Wanem scripture nao ansarem datwan?
TAEM wanfala dadi and mami holiday, olketa herem dota bilong tufala wea hem 23 year, hem seknomoa lus nao. Maet samwan killim hem dae. Semtaem nomoa, tufala lusim datfala ples and go bak long hom bilong olketa. Tufala prea long Jehovah staka taem. Taem wanfala brata wea 20 year hem herem hao big sik wea kasem hem bae gogo mekem body bilong hem no savve muv nao, semtaem nomoa hem prea long Jehovah. Wanfala mami wea lukaotem waka hem no garem selen nao for baem kaikai for hem and gele bilong hem wea 12 year. Hem barava prea long Jehovah. Tru tumas, taem pipol bilong God kasem hard taem, olketa prea long hem for helpem olketa. Waswe long iu, taem iu no wei nao, iu prea long Jehovah and barava askem hem for helpem iu tu?
2 Wanfala kwestin hem kamap: Waswe, bae Jehovah herem olketa prea bilong iumi taem iumi needim help? Ansa hem stap long Psalm 70. David nao raetem datfala psalm. Nomata hem kasem staka hard taem, hem faithful long Jehovah. Hem sei olsem long Jehovah: “God, . . . iu nomoa savve helpem mi and sevem mi.” (Ps. 70:5) Taem iumi readim Psalm 70, iumi bae luksavve hao Jehovah bae helpem iumi tu taem iumi kasem hard taem. Hem bae “sevem” iumi.
“Iu Nomoa Savve . . . Sevem Mi”
3. (a) Long Psalm 70, wanem nao David hem askem Jehovah? (b) Wanem nao David savve finis long hem?
3 Long Psalm 70 verse 1 and 5, David barava askem God for helpem hem. (Readim Psalm 70:1-5.) David askem Jehovah for “kam kwiktaem” for sevem hem. Long verse 2 and 3, David askem Jehovah for sevem hem from olketa rabis man wea laek killim hem dae. Hem askem Jehovah for mekem olketa man hia shame long nogud samting wea olketa duim. Long verse 4, David hem prea for pipol bilong God. Hem laekem olketa for hapi and mekhae long Jehovah. Long verse 5, David hem sei long Jehovah: “Iu nomoa savve helpem mi and sevem mi.” David hem no askem Jehovah, “Waswe, iu savve helpem mi and sevem mi?” Bat hem sei, “Iu nomoa savve helpem mi and sevem mi.” David hem savve finis God bae helpem hem.
4, 5. Taem iumi readim Psalm 70, wanem nao iumi lanem abaotem David? Wanem nao iumi savve Jehovah bae duim for iumi?
4 Taem iumi readim Psalm 70, wanem nao iumi lanem abaotem David? Taem olketa rabis man laek killim hem dae, hem no change kaon long olketa. Bat hem savve finis hao gogo Jehovah nao bae panisim olketa. (1 Sam. 26:10) David trustim Jehovah from hem savve Jehovah bae helpem pipol bilong hem and sevem olketa tu. (Heb. 11:6) David sei pipol bilong God mas hapi and mekhae long Jehovah. Olketa mas talem pipol abaotem olketa nambawan samting wea hem duim.—Ps. 5:11; 35:27.
5 Iumi tu savve trustim Jehovah olsem David. Iumi savve hem bae helpem iumi and “sevem” iumi. So taem iumi kasem hard taem or iumi barava laekem samwan for helpem iumi, iumi savve prea long Jehovah for hem helpem iumi kwiktaem. (Ps. 71:12) Bat wanem nao Jehovah bae duim for helpem iumi? Iumi bae storyim firstaem thrifala samting wea Jehovah duim for helpem David taem hem kasem barava hard taem.
God Sevem David From Olketa Rabis Pipol
6. Wanem nao mekem David savve Jehovah sevem olketa gudfala pipol?
6 Long taem bilong David, samfala buk long Bible hem stap. David readim finis hao Jehovah helpem olketa gudfala pipol. Long taem bilong Noah, Jehovah mekem Flood killim dae pipol wea no worshipim hem, bat hem sevem Noah witim famili bilong hem. (Gen. 7:23) Long taem bilong Lot, Jehovah mekem fire and olketa hot ston kam daon from skae for killim dae olketa nogud pipol long Sodom and Gomorrah, bat hem sevem Lot witim tufala gele bilong hem. (Gen. 19:12-26) Taem Pharaoh witim army bilong hem ronem olketa Israelite, Jehovah mekem olketa draon long Red Sea, bat hem sevem olketa Israelite. (Ex. 14:19-28) Dastawe David mekhae long Jehovah olsem “God wea sevem pipol”!—Ps. 68:20.
7-9. (a) Wanem nao mekem David barava trustim God? (b) David talem hu nao helpem hem?
7 Wanem nao mekem David barava trustim Jehovah? Bikos Jehovah nao sevem hem. (Deut. 33:27) Staka taem nao Jehovah sevem David taem “olketa pipol kros long hem and laek killim hem dae.” (Ps. 18:17-19, 48) Tingim wanfala samting wea kasem David.
8 Wantaem King Saul hem jealous fogud long David bikos olketa woman long Israel mekhae long David. From olketa sei hem savve tumas hao for faet, King Saul hem kros tumas and hem sutim David long spia tufala taem. (1 Sam. 18:6-9) Bat olketa spia hia nating kasem hem nomoa. Waswe, hem from David savve tumas hao for faet? Nomoa. Bible sei “Jehovah nao stap witim hem.” (Readim 1 Samuel 18:11-14.) Gogo wantaem Saul mekem plan for olketa Philistine killim dae David, batawea plan bilong hem nating waka nomoa. “Saul luksavve Jehovah nao stap witim David.”—1 Sam. 18:17-28.
9 David talem hao samwan nao sevem hem. Hu nao datfala man? Toktok wea stap antap long Psalm 18 hem sei David ‘singim wanfala song long Jehovah taem Jehovah sevem hem from Saul.’ David singsing olsem: “Jehovah hem God bilong mi. Hem wanfala strong ples wea mi savve haed long hem. Hem nao bae sevem mi. Hem wanfala strong ples wea mi savve haed long hem.” (Ps. 18:2) From iumi savve Jehovah hem fit for sevem pipol bilong hem, datwan mekem iumi trustim hem go moa!—Ps. 35:10.
God Helpem David Taem Hem Sik
10, 11. Maet long wanem taem nao David hem sik big?
10 Wantaem King David hem sik big and hem leidaon nomoa long bed. Psalm 41 nao storyim diswan. Long datfala taem, olketa rabis man tingse David bae no savve “gud bak nao.” (Verse 7 and 8) Long wanem taem nao David hem sik big olsem? Maet hem long taem wea Absalom laek aotem David from king mekem hemseleva nao king.—2 Sam. 15:6, 13, 14.
11 David hem storyim hao wanfala gud fren bilong hem wea tufala savve kaikai tugeta, hem againstim hem. (Verse 9) Diswan mekem iumi tingim nao wanfala samting wea kasem David. Taem Absalom againstim dadi bilong hem, fren bilong David, Ahithophel, hem saedem Absalom tu for aotem David. (2 Sam. 15:31; 16:15) Iu trae tingim samting wea kasem David long datfala taem. Hem barava sik big and body bilong hem wiki fogud and hem savve olketa rabis man laek duim nogud samting long hem tu.—Verse 5.
12, 13. (a) Wanem nao David savve finis long hem? (b) Wanem nao God duim for helpem David?
12 David no givap bat hem trustim hao Jehovah bae “sevem” hem. Sapos man wea worshipim God hem sik, David hem sei olsem abaotem hem: “Jehovah bae sevem man taem trabol kasem hem. Taem hem sik, Jehovah bae helpem hem. Iu bae lukaftarem hem gud taem hem sik.” (Ps. 41:1, 3) Long datfala scripture, David hem sei, “Jehovah bae helpem hem.” David hem savve finis Jehovah bae sevem hem. Hao nao Jehovah bae duim datwan?
13 David no askem Jehovah for duim mirakol mekem sik bilong hem finis. Bat David hem savve Jehovah bae “helpem hem” long datfala taem. David barava laekem Jehovah for helpem hem bikos olketa rabis man tu gohed for tok spoelem hem. (Verse 5 and 6) Maet Jehovah helpem David for tingim moa olketa gudfala samting. David hem sei: “From mi faithful long iu, iu helpem mi.” (Verse 12) From David savve Jehovah ting long hem olsem man wea faithful, datwan strongim hem nomata hem sik and olketa man tok spoelem hem. Gogo David hem gud bak moa. Iumi savve Jehovah bae helpem iumi tu taem iumi sik!—2 Cor. 1:3.
David Kasem Wanem Hem Needim
14, 15. Wanem taem nao David and olketa man bilong hem hangre and thirsty? Hu nao helpem olketa?
14 Taem David hem kamap king, hem garem staka naesfala kaikai. Hem askem staka pipol for kam long haos bilong hem for kaikai witim hem. (2 Sam. 9:10) Nomata olsem, wanfala taem David no garem staka kaikai. Taem Absalom laek aotem hem from king, David witim samfala nara man ranawe from Jerusalem. Olketa ranawe go long Gilead wea stap long east saed long Jordan River. (2 Sam. 17:22, 24) Olketa no stap kwaet long wanfala ples bikos olketa rabis man ronem olketa. Gogo David witim olketa man bilong hem hangre tumas and thirsty nao. Olketa taed tumas tu. From olketa haed long midol bush, long wea nao bae olketa kasem samting wea olketa needim?
15 Gogo David witim olketa man bilong hem olketa kasem datfala taon Mahanaim. Olketa kasem thrifala man, wea nem bilong olketa Shobi, Machir, and Barzillai. Olketa man hia savve hao sapos Absalom hem king, hem bae panisim eni man wea saedem David. Nomata olsem, olketa no fraet for helpem David bikos hem nao king wea God markem. Thrifala man hia luksavve David and olketa man bilong hem barava kasem hard taem. So olketa tekem kam olketa bed, wheat, bean, honey, butter, sheepsheep, and olketa narakaen kaikai tu. (2 Sam. 17:27-29) David barava tinghae long samting wea thrifala man hia duim. Hem nating forgetim kaenfala samting wea olketa duim for hem!
16. David luksavve hu nao helpem hem and olketa man wea gogo witim hem?
16 Nomata thrifala man hia helpem David and olketa man bilong hem, David luksavve Jehovah nao helpem olketa. Jehovah savve iusim olketa nara man wea worshipim hem for helpem pipol wea kasem hard taem. Long tingting bilong David, taem thrifala man hia duim kaenfala samting long hem, hem olsem Jehovah nao helpem hem. Taem David hem olo, hem sei: “Distaem mi olo nao, bat mi nating lukim yet eni gudfala man [hem tu] wea God hem lusim hem. And mi nating lukim yet olketa pikinini bilong hem go olobaot for lukaotem kaikai.” (Ps. 37:25) Jehovah evritaem lukaftarem pipol bilong hem!—Prov. 10:3.
“Jehovah Savve Hao for Sevem Pipol”
17. Wanem nao Jehovah duim long bifor?
17 Hem no David nomoa wea Jehovah sevem long bifor. Bihaen datwan, God sevem samfala moa. Samting wea aposol Peter talem hem tru tumas. Hem sei: “Jehovah savve hao for sevem pipol bilong hem from hard taem wea kasem olketa.” (2 Pet. 2:9) Tingim tufala story hia.
18. Wanem nao Jehovah duim for sevem pipol bilong hem long taem bilong Hezekiah?
18 Taem army bilong Assyria tekovarem Judah finis and go for Jerusalem, King Hezekiah prea olsem: “Jehovah, iu nao God bilong mifala, plis sevem mifala . . . mekem evri kingdom long earth luksavve hao iu Jehovah, iu nomoa iu God.” (Isa. 37:20) Hezekiah tingim nem bilong God and hem no laekem eniwan for spoelem datfala nem. Jehovah hem herem prea bilong hem. Long wanfala naet nomoa, wanfala angel killim dae 185,000 soldia bilong Assyria, bat Jehovah hem sevem pipol bilong hem.—Isa. 37:32, 36.
19. Wanem toktok nao olketa Christian long first century olketa followim?
19 Tu-thri day bifor Jesus hem dae, hem talem wanfala samting bae happen long Judea. Diswan hem helpem olketa disaepol long there for stap redi. (Readim Luke 21:20-22.) Long 66 C.E., army bilong Rome kam for tekovarem Jerusalem. Cestius Gallus nao leadim datfala big army. Olketa start for spoelem wall bilong temple, bat seknomoa datfala army lusim ples hia nao. From olketa Christian wea faithful tingim moa toktok bilong Jesus, olketa ranawe go long olketa maunten. Long 70 C.E., army bilong Rome kam bak moa and olketa finisim Jerusalem evribit. Olketa Christian wea ranawe finis olketa nomoa laef.—Luke 19:41-44.
20. Why nao iumi savve Jehovah bae “sevem” iumi?
20 Taem iumi tingim hao Jehovah helpem pipol bilong hem bifor, datwan hem strongim faith bilong iumi. Hem mekem iumi trustim hem go moa. Nomata iumi kasem olketa hard taem distaem, iumi savve Jehovah bae “sevem” iumi tu. Bat wanem nao Jehovah bae duim for helpem iumi? Wanem nao kasem olketa man wea iumi storyim long start bilong disfala study? Study bihaen diswan nao bae storyim olketa samting hia.
Waswe, Iu Savve Long Ansa?
• Taem iumi readim Psalm 70, wanem nao iumi savve Jehovah bae duim for iumi?
• Wanem nao helpem David taem hem sik?
• Wanem nao olketa story wea showimaot Jehovah sevem pipol bilong hem?
[Piksa long page 6]
Jehovah herem prea bilong Hezekiah