Preach Long Market
TAEM aposol Paul stap long Athens, hem preachim gud nius abaotem Jesus long market evriday. (Acts 17:17) Paul hem laekem tumas for preach long market bikos hem nao ples wea staka pipol go long hem.
Distaem, pipol bilong Jehovah preach abaotem Kingdom bilong God long eni ples wea pipol stap. Olketa savve preach long market and long olketa shopping centre (olketa bigfala building wea garem staka stoa insaed). Samfala Witness askem boss bilong wanfala stoa sapos olketa savve putim tebol front long stoa, mekem olketa savve showim olketa buk bilong iumi long pipol taem olketa kam long datfala stoa.
Hem nao samting wea olketa duim long wanfala shopping centre long New Jersey, America. Olketa putim tebol front long wanfala stoa and showim olketa buk wea storyim olketa samting wea savve helpem famili. Wanem nao happen? Insaed wanfala day nomoa, olketa givimaot 153 buk long sixfala difren languis.
Wanfala woman wea kam lukim olketa buk, hem lisin gud taem wanfala sista minim go long hem samting wea olketa buk storyim. Bihaen datwan, woman hia luksavve hao iumi mas tingim God long laef bilong iumi and long famili bilong iumi. Hem tekem thrifala buk hia: Lane From Datfala Nambawan Teacher, Secret for Kasem Hapi Famili, and Questions Young People Ask—Answers That Work.
Long datfala aftanun, wanfala man hem lukluk kam long olketa buk taem hem redi for go insaed long wanfala stoa. Hem lukluk strong long datfala Young People Ask buk. Sista wea standap bihaen long tebol luksavve man hia hem laekem datfala buk, so hem askem hem: “Waswe, iu laek readim eni buk hia?” Man hem point go long Young Pipol Ask buk. Sista hem givim datfala buk long hem. Man hia talem hem garem thrifala pikinini. Datfala sista gohed story witim hem, then man hia talem hao hem witim olketa pikinini bilong hem savve markem wanfala taem evri week for olketa savve story tugeta. Tufala pikinini bilong hem teenager. Taem hem lukluk insaed long buk, hem talem hao hem bae iusim datwan taem famili bilong hem story tugeta. Datfala sista showim hem tu datfala buk Secret for Kasem Hapi Famili, and storyim hao buk hia savve helpem hem and waef bilong hem taem olketa disaedem samfala samting. Datfala man hem barava tinghae long samting wea hem herem. Hem givim donation and hem askem for wanfala Witness go lukim hem witim famili bilong hem.
Wanem nao tingting bilong olketa Witness taem olketa preach long shopping centre? Wanfala sista hem sei: “Mi barava laekem diskaen preaching waka. Mi lanem staka gudfala samting!” Wanfala nara sista hem sei: “Jehovah talem finis hao iumi bae preachim gud nius long evri farawe ples long earth. Tuday mifala preachim gud nius long pipol wea story long olketa difren languis long Paramus, New Jersey. Mi hapi tumas for preach long olketa shopping centre. Evri brata and sista wea duim diswan barava hapi. Long evening, mifala nating laek go bak long haos, mifala laek gohed preach nomoa.”
Waswe long iu, iu savve preachim gud nius long olketa difren wei? Main wei bilong iumi for preach hem long haos tu haos. (Acts 20:20) Bat waswe, iu laek for go preach long market and long shopping centre tu?