Waswe, Iu Respectim Narawan Firstaem?
“Iufala nao mas firstaem showimaot respect long narawan.”—ROM. 12:10.
1. Wanem nao pipol long staka ples no duim distaem?
LONG samfala kantri, pipol garem kastom wea olketa pikinini savve nildaon for showimaot respect taem olketa stap witim olketa bigman. Taem olketa duim olsem, olketa no tol winim olketa bigman. Taem bigman story kam long pikinini, pikinini tu mas no showim baksaed bilong hem bikos sapos hem duim olsem, hem no showimaot respect nao. Nomata pipol long difren kantri garem olketa difren wei for showimaot respect, olketa wei hia mekem iumi tingim Law bilong Moses. Tingim disfala law: “Iufala mas standap front long man wea garem white hair [for showimaot respect]. And iufala mas tingim man wea olo.” (Lev. 19:32) Bat sorre tumas, long staka ples pipol no respectim olketa narawan.
2. Bible talem iumi for respectim hu?
2 Bible hem mekhae long wei for showimaot respect. Hem talem iumi for respectim Jehovah and Jesus. (John 5:23) Hem talem iumi for respectim olketa long famili, olketa brata and sista long kongregeson, and nara pipol tu. (Rom. 12:10; Eph. 6:1, 2; 1 Pet. 2:17) Wanem nao iumi savve duim for showimaot iumi respectim Jehovah? Wanem nao iumi savve duim for showimaot iumi respectim olketa Christian brata and sista? Iumi bae storyim olketa kwestin hia and samfala nara kwestin olsem.
Respectim Jehovah and Nem Bilong Hem
3. Wanem nao iumi savve duim for showimaot iumi respectim Jehovah?
3 Taem iumi respectim nem bilong Jehovah, datwan showimaot iumi respectim hem. Bible sei iumi “pipol wea garem nem bilong hem.” (Acts 15:14) Tru tumas, hem spesol samting for garem nem bilong God, Jehovah, wea garem evri paoa. Profet Micah hem sei: “Olketa nara pipol bae wakabaot long nem bilong god bilong olketa, bat iumi bae wakabaot long nem bilong God bilong iumi Jehovah for olowe.” (Mic. 4:5) Iumi “wakabaot long nem bilong Jehovah” taem iumi trae hard for duim samting wea mekem pipol tinghae long Jehovah and nem bilong hem. Olsem Paul talem long olketa Christian long Rome, sapos iumi no followim wanem iumi preachim, pipol bae “tok spoelem” nem bilong God.—Rom. 2:21-24.
4. Wanem nao tingting bilong iu abaotem waka for preach abaotem Jehovah?
4 Taem iumi duim preaching waka, iumi showimaot iumi respectim Jehovah tu. Long bifor, Jehovah chusim olketa Israelite for kamap olketa witness bilong hem, bat olketa nating witness abaotem hem nomoa. (Isa. 43:1-12) Plande taem olketa bighed and olketa mekem Jehovah “feel sorre.” (Ps. 78:40, 41) Gogo Jehovah nating hapi long olketa Israelite nao. Bat iumi distaem hapi tumas for garem spesol waka for preach abaotem Jehovah and for mekem pipol savve long nem bilong hem. Iumi duim olsem bikos iumi lovem hem and iumi laekem nem bilong hem for stap holy. From iumi savve long tru samting abaotem Dadi bilong iumi long heven and plan bilong hem, diswan nao mekem iumi barava laek for preach. Iumi garem sem tingting olsem aposol Paul. Hem sei: “Hem nao waka wea mi mas duim. Tru tumas, bae mi nogud nao sapos mi no talemaot gud nius!”—1 Cor. 9:16.
5. Sapos iumi respectim Jehovah, bae iumi duim wanem?
5 David hem sei: “Pipol wea savve long nem bilong iu Jehovah bae trustim iu, bikos iu bae nating lusim olketa wea lukaotem iu.” (Ps. 9:10) Sapos iumi barava savve gud long Jehovah and iumi respectim hem, iumi bae trustim hem olsem pipol wea faithful long God bifor tu. Datwan nao nara wei wea iumi showimaot iumi respectim Jehovah. Bible showimaot hao man wea respectim Jehovah bae trustim hem tu. Taem olketa Israelite no trustim Jehovah, Jehovah askem Moses olsem: “Haomas day moa bae pipol hia no respectim mi? And haomas day moa bae olketa no trustim mi? Mi duim staka mirakol finis for olketa!” (Num. 14:11) Bat sapos iumi trustim Jehovah for protectim iumi and helpem iumi taem iumi kasem hard taem, datwan showimaot iumi respectim hem.
6. Wanem nao mekem iumi barava respectim Jehovah?
6 Jesus showimaot hao wei for respectim Jehovah hem mas samting wea iumi barava laek for duim. Taem Jesus hem tok long pipol wea no worshipim God long stretfala wei, hem talem sem samting wea Jehovah talem. Hem sei: “Long toktok nomoa pipol hia mekhae long mi bat olketa no lovem mi.” (Matt. 15:8) Iumi respectim Jehovah bikos iumi barava lovem hem. (1 John 5:3) And iumi tingim tu samting wea Jehovah talem: “Pipol wea respectim mi, bae mi respectim olketa tu.”—1 Sam. 2:30.
Olketa Elder Respectim Olketa Narawan
7. (a) Why nao olketa elder mas respectim olketa brata and sista? (b) Wanem nao Paul duim wea showimaot hem respectim olketa Christian?
7 Aposol Paul talem olketa Christian: “Iufala nao mas firstaem showimaot respect long narawan.” (Rom. 12:10) Olketa elder long kongregeson nao “mas firstaem” showimaot respect long olketa brata and sista. Dastawe hem gud for olketa elder followim wei bilong Paul. (Readim 1 Thessalonians 2:7, 8.) Paul nating askem olketa brata and sista long olketa kongregeson for duim olketa samting wea hemseleva no laek for duim. Paul respectim olketa and olketa tu respectim hem. Taem Paul hem sei: “Mi laekem tumas for iufala followim wei bilong mi,” iumi savve hao staka pipol laek duim datwan bikos Paul hem garem gudfala wei.—1 Cor. 4:16.
8. (a) Wanem nao Jesus duim wea showimaot hem respectim olketa disaepol? (b) Olketa elder savve followim Jesus long wanem wei?
8 Olketa elder savve showimaot respect tu long olketa brata and sista taem olketa talem olketa why nao olketa laekem olketa for duim wanfala samting. Sapos olsem, olketa followim wei bilong Jesus. Tingim diswan. Taem Jesus talem olketa disaepol for askem God for samfala wakman moa for harvestim planteison, hem talem olketa why nao olketa mas duim olsem. Hem sei: “Staka samting stap for harvestim, bat no staka wakman stap for duim datwan. So askem man wea ownim planteison for sendem go olketa wakman for harvestim planteison bilong hem.” (Matt. 9:37, 38) And taem Jesus talem olketa disaepol for “gohed for lukaot,” hem talem olketa why nao olketa mas duim datwan. Hem sei: “Bikos iufala no savve long wanem taem nao Lord bilong iufala bae kam.” (Matt. 24:42) Taem Jesus talem olketa disaepol wanem nao olketa mas duim, staka taem hem talem olketa why nao olketa mas duim olsem. Datwan showimaot hem respectim olketa. Olketa elder tu savve followim gudfala wei bilong Jesus!
Respectim Kongregeson Bilong Jehovah and Followim Wanem Hem Talem
9. Taem iumi respectim Christian kongregeson long full world and olketa wea leadim iumi, hu moa iumi respectim? Minim kam.
9 Iumi showimaot iumi respectim Jehovah taem iumi respectim Christian kongregeson long full world and olketa wea leadim iumi. Taem iumi followim wanem datfala wakman wea faithful hem talem from Bible, datwan showimaot iumi respectim organization bilong Jehovah. Long first century, aposol John barava tok strong long pipol wea no respectim olketa wea leadim olketa. (Readim 3 John 9-11.) Wanem John hem talem showimaot pipol hia no respectim tu samting wea olketa elder teachim and samting wea olketa elder talem for olketa followim. Bat staka Christian long datfala taem no olsem. Taem olketa aposol laef yet, Christian kongregeson barava respectim olketa wea leadim olketa.—Phil. 2:12.
10, 11. Wanem nao olketa scripture wea storyim hao hem stret for samfala man garem waka for leadim kongregeson?
10 From Jesus talem olketa disaepol “iufala evriwan olketa brata,” samfala pipol distaem tingse no eniwan long kongregeson mas garem waka for leadim iumi. (Matt. 23:8) Bat Hebrew and Greek Scripture storyim hao God markem staka man for duim waka. Bible story abaotem olketa man, olketa judge, and olketa king bifor wea Jehovah iusim for leadim pipol bilong hem. Datwan pruvim hao Jehovah laek for iusim pipol for leadim iumi. Taem pipol no respectim olketa man hia, Jehovah panisim olketa.—2 Ki. 1:2-17; 2:19, 23, 24.
11 Long first century tu olketa Christian luksavve olketa aposol garem waka for leadim olketa. (Acts 2:42) Wanfala nao hem Paul. Hem talem olketa brata wanem for olketa duim. (1 Cor. 16:1; 1 Thess. 4:2) Nomata olsem, hemseleva tu hapi for obeyim olketa wea leadim hem. (Acts 15:22; Gal. 2:9, 10) Paul garem stretfala tingting abaotem olketa wea garem waka for leadim Christian kongregeson.
12. Wanem nao tufala samting wea iumi lanem from Bible abaotem olketa wea garem waka for leadim iumi?
12 Iumi savve lanem tufala samting. First wan, Bible showim hao hem stret for “wakman wea faithful and wise” iusim Governing Body for markem olketa man for duim waka. Governing Body markem samfala man tu for leadim olketa man hia. (Matt. 24:45-47; 1 Pet. 5:1-3) Mek-tu samting, iumi evriwan and olketa man hia wea kasem waka mas respectim olketa wea leadim iumi. So wanem nao iumi savve duim for showimaot iumi respectim olketa man wea garem waka for lukaftarem Christian kongregeson long full world?
Respectim Olketa Distrik and Circuit Overseer
13. Wanem nao iumi savve duim for showimaot iumi respectim olketa distrik and circuit overseer?
13 Paul hem sei: “Iufala olketa brata, iufala mas respectim olketa wea waka hard for iufala and wea Lord markem olketa for lukaftarem and kaonselem iufala. Iufala mas tinghae long olketa from waka wea olketa duim and iufala mas lovem olketa tu. Stap gud witim narawan.” (1 Thess. 5:12, 13) Samfala wea “waka hard” nao hem olketa distrik and circuit overseer. Dastawe hem fitim for iumi mas “tinghae long olketa.” Iumi duim datwan taem iumi followim kaonsel wea olketa givim. Taem olketa talem iumi for duim samting wea kam from wakman wea faithful and wise, “gudfala tingting wea iumi kasem from God” bae mekem iumi “hapi for obeyim” olketa.—Jas. 3:17.
14. Wanem nao olketa long kongregeson savve duim for showimaot olketa respectim distrik and circuit overseer? Sapos olsem, wanem nao bae iumi kasem?
14 Waswe sapos distrik or circuit overseer talem iumi for duim olketa samting long wei wea hem difren from hao iumi duim olowe? Sapos iumi respectim olketa, iumi mas no garem tingting olsem, “Hem no wei bilong mifala for duim olsem” or, “Datwan hem fitim olketa nara kongregeson bat hem no fitim kongregeson bilong mifala.” Bat iumi followim wanem olketa talem. Samting wea bae helpem iumi nao hem for tingim hao kongregeson hem bilong Jehovah and Jesus nao Hed bilong kongregeson. Taem olketa brata and sista hapi for followim wanem distrik and circuit overseer hem talem, datwan showimaot olketa respectim olketa. Aposol Paul praisem olketa brata long Corinth bikos olketa respectim Titus and obeyim wanem hem talem. (2 Cor. 7:13-16) Taem iumi hapi for followim wanem olketa distrik and circuit overseer talem, datwan bae mekem iumi hapi taem iumi duim preaching waka.—Readim 2 Corinthians 13:11.
“Respectim Evri Pipol”
15. Wanem nao samfala samting wea iumi savve duim for showimaot iumi respectim olketa brata and sista?
15 Paul hem sei: “No tok daonem wanfala olo man. Bat iu mas story long hem long gudfala wei olsem hem dadi bilong iu. Iu mas tingim olketa young man olsem brata bilong iu, olketa olo woman olsem mami bilong iu, and olketa gele olsem sista bilong iu. Iu mas duim diswan long stretfala wei. Respectim olketa widow woman wea no eniwan lukaftarem olketa.” (1 Tim. 5:1-3) Tru tumas, Bible talem iumi for respectim evriwan long kongregeson. Bat waswe sapos iu no hapi long wanfala brata or sista long kongregeson? Waswe, bae iu respectim hem? Sapos nomoa, hao sapos iu stretem tingting bilong iu and tingim olketa gudfala wei bilong hem? Olketa brata wea kasem waka long kongregeson nao mas barava respectim olketa brata and sista, and mas no “bossim olketa sheepsheep.” (1 Pet. 5:3) Tru tumas, from evriwan long kongregeson showimaot love long narawan, iumi savve duim staka samting for showimaot iumi respectim olketa brata and sista.—Readim John 13:34, 35.
16, 17. (a) Why nao iumi mas respectim pipol wea iumi preach long olketa and pipol wea duim nogud samting long iumi? (b) Wanem nao iumi savve duim for showimaot iumi “respectim evri pipol”?
16 Iumi no respectim nomoa olketa brata and sista long kongregeson. Paul talem olketa Christian bifor: “Taem chance hem stap yet, iumi mas duim gudfala samting long evri pipol.” (Gal. 6:10) Maet hem no isi for followim datfala toktok taem man wea iumi waka witim or pikinini wea iumi skul witim hem duim nogud samting long iumi. Long taem olsem, iumi mas tingim disfala toktok: “No kros long pipol wea duim nogud samting.” (Ps. 37:1) Sapos iumi followim toktok hia, bae iumi showimaot respect long pipol olsem tu. And sapos iumi hambol, bae datwan helpem iumi for “no kros bat for respectim” pipol wea iumi story witim long preaching waka. (1 Pet. 3:15) Kaleko and lukluk bilong iumi tu savve showimaot iumi respectim pipol wea iumi preach long olketa.
17 Tru tumas, nomata iumi story witim olketa brata and sista bilong iumi or witim nara pipol, hem gud for iumi followim disfala toktok: “Respectim evri pipol, lovem evri brata, fraet long God, respectim king.”—1 Pet. 2:17.
Wanem Nao Ansa Bilong Iu?
Wanem nao iu savve duim for showimaot iu respectim:
• Jehovah?
• Olketa elder long kongregeson witim distrik and circuit overseer?
• Olketa brata and sista long kongregeson?
• Pipol wea iu preach long olketa?
[Piksa long page 23]
Olketa Christian long first century respectim governing body
[Piksa long page 24]
Olketa elder long evri kantri respectim olketa distrik and circuit overseer wea Governing Body markem