Teaching wea Staka Bilivim
“Mi dream mi bone long hell! Olketa torowem mi insaed fire and mi singaot and then mi wekap. Mi barava trae hard for no sin.”—Arline.
WASWE, long tingting bilong iu, pipol wea sin bae bone long hell? Staka nao ting olsem. Tingim diswan: Long 2005, wanfala savveman long University of St. Andrews long Scotland talem hao wanfala long evri thrifala bigman long church long Scotland tingse olketa wea no savve gud long God “bae safa long tingting for olowe long hellfire.” Wanfala long evri faevfala pipol bilivim hao olketa long hell bae safa long body.
Long staka kantri, staka nao bilivim hell. Wanfala survey wea olketa duim long America long 2007, faendem hao tufala man long evri thrifala man nao bilivim hell. Nomata long olketa kantri wea pipol no interest tumas long religion, staka gohed for bilivim hell. Narafala survey wea olketa duim long Canada long 2004, faendem hao klosap wanfala long evri tufala man nao bilivim hell. And long England, wanfala long evri thrifala man bilivim hell.
Samting Olketa Bigman Long Church Teachim
Staka bigman long church distaem no teachim hao man bone long hell. Bat olketa mekhae long mining wea stap long Catechism of the Catholic Church, wea olketa raetem long 1994. Hem read olsem: “Bigfala panis long hell hem minim wei for nating fren gud witim God.”
Nomata olsem, staka bilivim yet hao hell hem ples for safa long tingting or long body. Olketa wea mekhae long disfala teaching talem hao Bible nao talem olsem. President bilong Southern Baptist Theological Seminary, Albert Mohler sei olsem: “Hem samting wea Bible nao talem.”
Why Nao Samting Iu Bilivim Hem Important?
Sapos hell hem ples for man safa insaed, iu shud fraetem. Bat sapos disfala teaching hem no tru, olketa bigman long religion wea teachim disfala teaching mekem pipol konfius and wari. Olketa tok againstim God tu.
Wanem nao Bible talem abaotem disfala teaching? Olketa nextfala story long disfala magasin mekhae long ansa from Bible for thrifala kwestin hia: (1) Wanem nao barava happen long man wea dae? (2) Wanem samting abaotem hell nao Jesus lanem pipol? (3) Hao nao wei for lanem trufala samting abaotem hell savve helpem iu?