Waswe, Iu Tingim Yet?

Waswe, iu lanem gud samting from olketa Wastaoa magasin wea iu readim no longtaem go nomoa? Trae for ansarem olketa kwestin hia:

• Why nao hem barava important for iumi faithful long God?

Taem iumi faithful long God, iumi showimaot iumi laekem Jehovah for rulim iumi. Iumi duim olsem from iumi lovem Jehovah and iumi laek showimaot hao samting wea Satan talem hem nating tru. Taem Jehovah judgem iumi, hem bae lukluk sapos iumi faithful long hem or nomoa. Dastawe sapos iumi laek laef olowe, iumi mas faithful long hem.​—⁠12/15, page 4-6.

• Wanem nao samfala title wea showimaot spesol waka bilong Jesus long plan bilong God?

Spesol Son. Datfala Toktok. Datfala Amen. Man wea helpem niu agreement for kamap. Hae Priest. Pikinini wea God promisim.​—⁠12/15, page 15.

• Why nao hem important for evri tru Christian mas klin?

Profet Isaiah storyim wanfala vision wea olketa angel storyim Creator olsem: “Holy, holy, holy.” (Isaiah 6:⁠3) Disfala toktok mekhae long wei wea God hem perfect and barava klin. Dastawe nao God laekem olketa wea worshipim hem for mas holy and klin. Hem talem olketa olsem: “Iufala mas holy bikos mi nao holy.” (1 Peter 1:​16)​—⁠1/1, page 20.

• Wanem nao iumi savve duim mekem iumi savve hapi go moa long ministry?

Iumi mas redyim tingting bilong iumi for luksavve long nambawan samting wea pipol savve kasem. Iumi preach mekem iumi trae for startim Bible study. Taem pipol no interest long story bilong iumi, iumi savve changem story for fitim wanem olketa interest long hem.​—⁠1/15, page 8-​10.

• From iumi savve long tru samting wea Bible talem, long wanem wei nao iumi bae duim funeral?

Nomata iumi sorre tumas taem wanfala long famili or fren hem dae, iumi savve hao man wea dae finis no savve long eni samting. Iumi no duim olketa kastom samting wea showimaot man wea dae finis hem laef yet, nomata sapos pipol wea no worshipim God tok spoelem iumi. Taem man raetem firstaem wanem hem laekem olketa narawan for duim long funeral bilong hem, diswan bae mekem hem isi lelebet for story witim olketa long famili wea no Witness.​—⁠2/15, page 29-​32.

• Bible storyim “buk bilong Jashar” and “buk bilong olketa War bilong Jehovah.” (Josh. 10:13; Num. 21:14) Bat tufala no stap long Bible. Waswe, tufala buk hia kam from God bat lus nao?

Nomoa. Nomata olketa buk hia stap long taem wea olketa raetem Bible, luk olsem olketa buk hia no kam from God bat olketa wea raetem Bible storyim samfala toktok from olketa buk hia.​—⁠3/15, page 32.