Iu Savve Hapi Nomata Iu No Marit

STAKA difren movie and buk abaotem boy and gele wea fren showimaot hao gogo tufala marit. Diswan mekem staka pipol for tingim hao sapos olketa marit bae olketa barava hapi olowe nao! Long staka kantri, pipol savve forcem tu olketa young wan for marit. Debby sei olsem taem hem samting olsem 25 year: “Olketa narawan savve mekem iumi tingim hao gele mas marit.” Hem sei moa: “Olketa sei laef bilong man start taem hem marit.”

Wanfala strong Christian no garem tingting olsem. Bible storyim hao nomata staka Israelite marit, plande long olketa wea no marit duim staka gud samting. Long distaem, samfala Christian disaed for no marit, bat staka no marit bikos long living bilong olketa. Nomata wanem nao mekem olketa stap singol, hem gud for tingim disfala kwestin: Wanem nao bae helpem wanfala Christian wea no marit for gohed hapi?

From Jesus garem bigfala assignment for duim, iumi luksavve why nao hem no marit. Hem talem olketa disaepol hao samfala wea followim hem tu bae “stap singol.” (Matt. 19:​10-​12) So Jesus showimaot hao sapos man wea no marit laek gohed hapi, hem mas hapi for garem laef olsem.

Samfala disaed for stap singol mekem olketa savve busy for duim olketa samting for God. So waswe, toktok wea Jesus talem hem fitim nomoa olketa man olsem? (1 Cor. 7:​34, 35) Maet nomoa. Tingim diswan. Maet wanfala Christian laek for marit bat hem no faendem yet boy or gele wea fitim tingting bilong hem. Ana, wanfala singol sista wea winim 30 year hem sei: “No longtaem go nomoa wanfala boy wea mi waka witim hem askem mi for maritim hem. Boy hia no Witness. Taem hem askem mi, datwan mekem mi feel gud, bat mi kwiktaem aotem datfala tingting bikos mi laek maritim nomoa man wea bae helpem mi for fren gud witim Jehovah.”

Staka sista wea olsem Ana no laek maritim man long world bikos olketa laek tumas for maritim nomoa “man wea followim Lord.”a (1 Cor. 7:​39; 2 Cor. 6:​14) Olketa tinghae long kaonsel bilong God dastawe olketa disaed for stap singol. Wanem nao bae helpem olketa for gohed hapi taem olketa singol yet?

Tingim Gud Samting Man Kasem Taem Hem Singol

Sapos iumi garem gudfala tingting, datwan bae helpem iumi for hapi nomata sapos iumi laek marit bat iumi no marit yet. Carmen, wanfala singol sista wea winim 40 year, hem sei: “Mi hapi long wanem mi garem, and mi no ting tumas long samting wea mi no garem.” Hem tru, samfala taem maet iumi no laek stap seleva or iumi no hapi from iumi no savve changem samting wea kasem iumi. Bat from iumi savve hao plande nara brata and sista long world kasem sem samting tu, datwan savve strongim iumi for gohed. Jehovah helpem staka wea no marit for hapi and for winim olketa nara hard samting wea olketa feisim.​—⁠1 Pet. 5:​9, 10.

Staka brata and sista luksavve long olketa gud samting wea olketa savve duim taem olketa stap singol. Ester, wanfala singol sista wea samting olsem 35 year, hem sei: “Mi luksavve man savve hapi sapos hem tingim olketa gud samting wea hem savve duim nomata wanem kaen laef nao hem garem.” Carmen hem sei: “Mi tingim hao nomata sapos mi marit or nomoa, taem mi duim olketa samting for Kingdom firstaem, Jehovah bae givim olketa gudfala samting long mi.” (Ps. 84:11) “Nomata mi no kasem evri samting wea mi laekem, mi bae gohed hapi nomoa.”

Olketa Long Bible wea No Marit

Gele bilong Jephthah tingse hem bae marit. Bat promis wea dadi bilong hem talem long God mekem hem for mas waka long temple start long taem hem young. Nomata sapos hem laek for marit, samting wea dadi bilong hem promisim changem plan bilong hem. Hem krae for tufala month bikos hem luksavve hem bae no marit and no garem pikinini. Nomata olsem, hem willing for duim samting wea dadi talem and hem waka long temple for full laef bilong hem. Evri year olketa Israelite gele savve go lukim hem and talem hem hao olketa tinghae long wanem hem duim.​—⁠Judg. 11:​36-​40.

Maet samfala man long taem bilong Isaiah feel nogud bikos olketa no garem bol long private part. Bible no talem wanem nao mekem olketa olsem. From olketa olsem, olketa no savve duim staka samting long kongregeson long Israel, and olketa no savve marit and garem pikinini tu. (Deut. 23:⁠1) Nomata olsem, Jehovah minim feeling bilong olketa, and hem tinghae long olketa from olketa obeyim Law bilong hem. Hem talem olketa hao insaed long haos bilong hem, hem bae givim “ples” for olketa and “pipol bae no forgetim nem bilong olketa.” So hem minim olketa faithful man hia bae garem hope for stap olowe long earth wea Jesus rulim. Jehovah bae nating forgetim olketa.​—⁠Isa. 56:​3-5.

Jeremiah hem no olsem olketa man hia. Taem God markem hem for kamap profet, hem talem Jeremiah for no marit bikos hem stap long taem wea laef hem no isi and bikos long waka wea hem mas duim. Jehovah hem sei: “Iu mas no marit, and iu mas no garem pikinini long disfala ples.” (Jer. 16:​1-4) Bible no talemaot tingting bilong Jeremiah abaotem diswan, bat hem talem hao Jeremiah hem man wea laekem tumas toktok bilong Jehovah. (Jer. 15:16) Staka year bihaen taem army bilong Babylon raonem Jerusalem for 18 month, Jeremiah luksavve long gud samting wea hem kasem from hem obeyim Jehovah for no marit.​—⁠Lam. 4:​4, 10.

Olketa Samting wea Bae Mekem Iu Barava Hapi

Olketa wea iumi storyim finis olketa no marit, bat Jehovah helpem olketa and olketa duim staka samting for hem. Long distaem tu, iumi savve duim olketa gudfala samting wea bae mekem iumi barava hapi. Bible talem hao staka woman nao bae talemaot gud nius. (Ps. 68:11) Staka long olketa sista hia no marit. Gud samting wea kamaot from preaching waka wea olketa duim nao, staka wea lanem truth kamap olsem pikinini bilong olketa.​—⁠Mark 10:​29, 30; 1 Thess. 2:​7, 8.

Wanfala sista wea nem bilong hem Loli and wea pioneer for 14 year, hem sei: “Pioneer waka barava helpem mi. From mi no marit, mi savve duim staka samting, dastawe mi no feel lonely. Mi hapi evriday bikos mi lukim hao preaching waka wea mi duim hem barava helpem pipol. Mi barava feel gud long datwan.”

Staka sista lanem nara languis and preach long pipol wea toktok long olketa languis hia. Ana, wea iumi storyim finis, hem sei: “Staka thousand pipol wea toktok long olketa nara languis nao stap long taon wea mi stap long hem.” Ana laek preach long pipol wea toktok long French languis. Hem sei: “From mi lanem languis wea mekem mi fit for story long staka long olketa, mi barava enjoyim preaching waka wea mi duim.”

Olketa wea no marit no garem staka waka olsem olketa wea marit. Dastawe samfala go long nara ples wea needim samfala pablisa moa. Lidiana, wanfala singol sista wea samting olsem 35 year, hem go long nara kantri wea needim samfala pablisa moa. Hem sei: “Long tingting bilong mi, sapos man duim staka samting for Jehovah, datwan bae mekem hem isi for hem garem olketa gud fren. Mi garem staka gud fren wea kam from olketa nara kantri, and diswan mekem mi barava hapi.”

Bible story abaotem Philip, wanfala man wea talemaot gud nius. Hem garem fofala gele wea no marit. Olketa gele hia savve talemaot profesi. (Acts 21:​8, 9) Luk olsem olketa strong for worshipim Jehovah olsem dadi bilong olketa tu. Maet olketa iusim paoa wea olketa garem for talemaot profesi for helpem olketa brata and sista long Caesarea. (1 Cor. 14:​1, 3) Long distaem, staka sista wea no marit strongim olketa nara brata and sista taem olketa kam evritaem long meeting and givim olketa ansa.

Lydia hem wanfala Christian woman long Philippi wea Bible sei hem kaen tumas long pipol. (Acts 16:​14, 15, 40) Maet Lydia hem no marit or hasband bilong hem dae finis. From hem barava kaenfala woman, hem invaetem olketa traveling overseer olsem Paul, Silas, and Luke for kam long haos bilong hem. From hem duim olsem hem kasem gud samting. Distaem tu, sapos man hem kaen, bae hem kasem gud samting tu.

Wanem Iu Savve Duim for Narawan Lovem Iu

Nomata iumi busy for duim olketa gud samting for Jehovah, iumi evriwan needim samwan for lovem iumi. Wanem nao olketa wea no marit savve duim for kasem diswan? First samting, Jehovah hem lovem iumi, strongim iumi, and herem iumi. Samfala taem King David feel olsem “hemseleva nomoa stap and no garem strong tu.” Nomata olsem, hem savve Jehovah bae helpem hem evritaem. (Ps. 25:16; 55:22) Hem sei: “Nomata sapos dadi and mami bilong mi lusim mi, Jehovah bae lukaftarem mi.” (Ps. 27:10) God laekem evri pipol bilong hem for barava fren gud witim hem.​—⁠Ps. 25:14; Jas. 2:​23; 4:⁠8.

Nara samting tu, long organization bilong Jehovah, iumi savve faendem olketa brata wea olsem dadi, sista wea olsem mami, boy wea olsem brata, and gele wea olsem sista wea savve lovem iumi. (Matt. 19:29; 1 Pet. 2:​17) Staka Christian wea no marit kasem gud samting taem olketa followim wei bilong Dorcas. Hem “evritaem duim olketa gudfala samting and helpem olketa poor pipol.” (Acts 9:​36, 39) Loli hem sei: “Taem mi go long eni ples, mi lukaotem olketa tru fren long kongregeson wea bae lovem mi and sapotim mi taem mi feel wikdaon.” Hem sei moa: “Mi trae for showimaot love long olketa and tingim olketa mekem mifala savve fren gud. Mi stap finis long eitfala kongregeson, and evritaem mi garem olketa gudfala fren. Staka sista wea gud fren bilong mi olketa no sem age olsem mi. Samfala grani finis and samfala teenager.” Long evri kongregeson, samfala brata and sista lukaotem fren and laekem samwan for lovem olketa. Taem iumi barava showimaot iumi tingim olketa hia, datwan savve helpem olketa and iumi tu bae hapi from olketa lovem iumi and iumi lovem olketa.​—⁠Luke 6:​38.

God Bae No Forgetim Olketa

Bible talem hao from iumi stap long taem wea laef no isi, evri Christian mas hapi for no kasem samfala samting. (1 Cor. 7:​29-​31) Iumi barava tinghae long olketa wea no marit from olketa disaed strong for obeyim komand bilong God for maritim wanfala Christian brata or sista nomoa. (Matt. 19:12) Olketa savve barava hapi nomata olketa no marit.

Lidiana hem sei: “From mi fren gud witim Jehovah and worshipim hem, datwan nao mekem mi hapi.” Hem sei moa: “Mi savve long samfala pipol wea marit finis and olketa hapi, bat samfala nomoa. Taem mi lukim diswan, mi barava luksavve hao nomata sapos mi marit or nomoa, mi savve hapi.” Jesus talem finis hao man bae hapi taem hem givim samting long narawan and duim samting for helpem pipol. Diswan hem samting wea evri Christian savve duim.​—⁠John 13:​14-​17; Acts 20:⁠35.

Samting wea mekem iumi barava hapi nao hem from iumi savve Jehovah bae blessim iumi taem iumi waka hard for duim wanem hem laekem. Bible promisim iumi olsem: “God no forgetim waka wea iufala duim and love wea iufala garem for nem bilong hem.”​—⁠Heb. 6:⁠10.

[Footnote]

[Piksa long page 25]

“Mi hapi long wanem mi garem, and mi no ting tumas long samting wea mi no garem.”​—⁠Carmen

[Piksa long page 26]

Loli and Lidiana go long ples wea needim samfala pablisa moa

[Piksa long page 27]

God laekem evri man wea worshipim hem for fren gud witim hem