Waswe, Olketa Faendem Finis Ark Bilong Noah?

SAMFALA taem, nius story abaotem hao pipol lukaotem ark bilong Noah. Hem samting wea pipol interest for savve abaotem. Sapos olketa faendem finis bigfala ark wea Noah and famili bilong hem stap laef insaed taem flood happen long 2370-​2369 B.C.E., olketa wea studyim olketa oldfala samting insaed long graon bae barava interest tumas. Nomata staka pipol trae hard for faendem, wei for lukaotem datfala ark hem gohed yet. Staka sei olketa faendem finis and nius storyim pruv bilong olketa, bat wanem nao tru story?

Bible storyim hao ark bilong Noah “hem sidaon long olketa Maunten long Ararat.” (Genesis 8:⁠4) Olketa maunten long Ararat garem wanfala hae maunten wea distaem olketa nemim Maunt Ararat, wea stap long east Turkey, klosap long border bilong Armenia and Iran.

Staka grup wea go for lukaotem ark bilong Noah long datfala area talem olketa interesting story bat no barava pruvim ark hem stap. Olketa interesting piksa wea olketa tekem from plane, olketa pis timba wea garem tar, and nius abaotem wanem olketa lukim mekem pipol barava laek for savve long tru story. Bat for faendem datfala ark hem no isi. Wanfala ples wea staka interest long hem stap samting olsem 4 go kasem 5 kilometer hae long Maunt Ararat. Bat from problem saed long politik long datfala area, olketa no letem pipol from difren kantri for go klaemem datfala maunten.

Nomata olsem, staka wea barava laek for faendem datfala ark laekem samfala grup moa for go long datfala ples. Olketa bilivim hao samfala part bilong datfala ark hem stap insaed snow and ice wea kavarem datfala maunten. Olketa sei hao olketa year wea garem hot season nomoa hem chance for lukim and kasem datfala ark.

Samfala story wea olketa herem nao mekem olketa for laek lukim and kasem. Josephus, man wea raetem history long first century C.E., storyim samfala nara man for raetem history bifor. Olketa talem hao olketa lukim yet datfala ark antap long Ararat. Samfala sei pipol savve tekem olketa pis timba wea garem tar bilong datfala ark for keepim. Wanfala wea Josephus raet abaotem, hem Berossus wea raet abaotem Babylon long mek-thri century B.C.E.

Wanfala interesting report hem from George Hagopian from Armenia long start bilong mek-20 century. Hem storyim hao taem hem boy yet, hem and uncle bilong hem klae insaed datfala ark. Hagopian dae long 1972, bat story bilong hem mekem staka pipol for interest and ting raonem.

Waswe, Trufala Pruv for Garem Faith Hem Stap?

Waswe, eni trufala pruv hem stap for bilivim hao olketa faendem finis datfala ark or maet bae olketa faendem? Luk olsem pruv wea stap mekem iumi daotem datwan. Wanfala samting nao, Bible no barava talem ples wea datfala ark hem stap taem wata long flood hem go daon. Hem storyim nomoa “olketa maunten long Ararat.”

Hem tru hao pipol wea go for faendem and olketa nara pipol tingse hem masbi datfala maunten wea barava hae. Bat Bible no storyim hao God mekem datfala ark for stap antap Maunt Ararat, wea distaem hem 5 kilometer hae wea barava cold.a No forget, Noah and famili bilong hem gohed for stap insaed ark for tu-thri month bihaen ark pas long maunten. (Genesis 8:​4, 5) And bihaen olketa lusim ark, maet hem hard for olketa and olketa animal for kam daon from maunten wea barava hae, olsem olketa man wea savve klaemem maunten. Luk olsem ples wea ark hem pas, maet hem no hard tumas for kasem, olsem wanem samfala tingim distaem, bat long semtaem hem ples wea fitim samting wea Genesis 8:​4, 5 storyim. Nomata wanem ples datfala ark pas long hem long Ararat, maet hem lus finis long staka handred year bifor from hem rotten or pipol tekem olketa pis bilong hem.

Nara samting tu, iumi daotem toktok bilong samfala bigman wea sei for faendem ark hem important samting for faith bilong pipol. Wanfala man wea arrangem grup for lukaotem ark hem sei sapos olketa faendem datfala ark, “datwan bae strongim faith bilong staka million  . . and staka pipol bae garem faith.” Long wanfala nius meeting long 2004, datfala man hem sei for kasem ark, bae “hem nambawan samting olsem taem Christ laef bak.” Bat grup bilong hem nating go nomoa.

Waswe sapos olketa faendem finis datfala ark, bae datwan hem trufala pruv for mekem pipol garem faith? Bible showimaot for garem trufala faith hem no depend long samting iumi lukim or holem. (2 Corinthians 5:⁠7) Samfala pipol daotem yet Bible and sei olketa mas holem samting and lukim olketa pruv wea bae mekem olketa for garem faith long samfala story long Bible. Bat for tok stret, kaen pipol olsem bae no garem faith nomata olketa lukim staka pruv. Jesus seleva sei hao samfala pipol bae no bilivim trufala samting wea Bible storyim, nomata olketa lukim samwan laef bak!​—⁠Luke 16:⁠31.

For garem trufala faith, man no bilivim samting nating nomoa, bat mas garem trufala pruv. (Hebrews 11:⁠1) Waswe, eni trufala pruv hem stap for helpem pipol distaem for bilivim Flood wea Bible storyim hem barava happen? Trufala pruv hem stap. Jesus Christ talem klia olsem: “Noah go insaed long ark, gogo flood hem kam.” (Luke 17:​26, 27) Diswan nao barava strongfala pruv. Why nao olsem?

Bifor Jesus kam long earth hem stap kam long heven. (John 8:​58) Hem lukim taem olketa wakem ark and taem Flood kam. So wanem pruv nao iu shud bilivim? Son bilong God wea barava lukim samting wea happen and wea iumi fit for trustim evritaem, or wei for faendem eni old pis timba antap long wanfala cold maunten? Taem iumi ting raonem diswan, trufala pruv hem barava klia hao story abaotem ark bilong Noah hem tru.

[Footnote]

[Piksa long page 13]

Waswe, trufala pruv stap wea showimaot story abaotem Flood hem tru?

[Piksa long page 14]

Jesus Christ talem klia olsem: “Noah go insaed long ark, gogo flood hem kam”