Wanem Holy Spirit Duim for Mekem Plan Bilong Jehovah Kamap Tru

“Samting wea mi talem . . . hem nao samting wea bae happen.”​—ISA. 55:11.

1. Storyim hao plan bilong man and plan bilong Jehovah no semsem.

PLAN bilong Jehovah for duim wanem hem laek for duim hem barava difren from plan bilong olketa man. For minim datwan, tingim disfala tokpiksa. Wanfala man and woman maet laek garem naesfala haos and for famili hapi. For kasem datwan, tufala mas waka hard and planim staka samting firstaem. Bat samting olsem natural disaster, no garem waka, sik or dae savve spoelem plan bilong tufala for kasem wanem tufala laekem. No eni samting olsem savve spoelem wanem Jehovah laek for duim.

2, 3. (a) Wanem nao insaed plan bilong Jehovah, and wanem nao hem duim taem Adam and Eve sin? (b) Why nao iumi shud minim gud plan bilong Jehovah?

² Taem Jehovah mekem plan bilong hem kamap tru, hem garem wisdom and paoa for winim eni samting wea maet spoelem datfala plan. (Eph. 3:​11) Plan bilong Jehovah hem for disfala earth kamap paradaes, wea perfect pipol savve stap long peace and hapi for olowe. (Gen. 1:​28) Bihaen Adam and Eve sin, Jehovah kwiktaem mekem arrangement for mekem plan bilong hem kamap tru. (Readim Genesis 3:​15.) Jehovah talem hao tokpiksa woman bilong hem bae garem wanfala “seed” or Son, wea gogo bae finisim Satan and stretem bak evri nogud samting wea Satan duim.​—Heb. 2:​14; 1 John 3:8.

³ No eniwan long heven or long earth savve stopem plan bilong God. (Isa. 46:​9-​11) Hao nao olsem? Bikos Jehovah iusim holy spirit bilong hem. Datfala paoa bae barava mekem plan bilong God for “happen,” bikos no eniwan savve stopem. (Isa. 55:10, 11) Iumi mas minim gud datfala plan and followim taem God mekem plan bilong hem kamap tru. Future bilong iumi depend long datfala plan. And tu, taem iumi luksavve hao Jehovah iusim holy spirit, datwan savve strongim faith bilong iumi. Iumi bae storyim wanem holy spirit duim long taem bifor, distaem, and long future for mekem plan bilong Jehovah kamap tru.

Wanem Holy Spirit Duim Long Taem Bifor

4. Hao nao Jehovah isisi showimaot plan bilong hem?

⁴ Long taem wea olketa raetem Bible, Jehovah isisi talemaot samting wea bae happen for fitim plan bilong hem. Long firstaem, promis abaotem Seed hem “wanfala holy secret.” (1 Cor. 2:7) Klosap 2,000 year bihaen, Jehovah storyim moa datfala seed. (Readim Genesis 12:7; 22:15-​18.) Jehovah mekem promis witim Abraham wea bae kamap tru long bigfala wei. Disfala toktok “seed bilong iu,” barava showimaot klia hao datfala Seed bae kam thru long famili laen bilong Abraham. Iumi savve Satan hem mas barava interest long olketa samting hia taem hem showaot klia. Datfala enemy barava laek for spoelem famili laen bilong Abraham and stopem plan bilong God for kamap tru. Bat from God iusim holy spirit, hard for eni samting savve spoelem plan bilong hem. Long wanem wei?

5, 6. Hao nao Jehovah iusim spirit bilong hem for protectim famili laen wea datfala Seed kam from?

⁵ Jehovah iusim spirit bilong hem for protectim samfala man insaed famili laen bilong datfala Seed. Long Abram (Abraham), Jehovah sei: “Mi wanfala shield for protectim iu.” (Gen. 15:1) Diswan hem no toktok nating. Tingim wanem hem happen long samting olsem 1919 B.C.E. taem Abraham and Sarah muv go for stap for lelebet taem long Gerar. Abimelech wea hem king bilong Gerar, klosap tekem Sarah for kamap waef bilong hem, bikos hem no savve Sarah hem waef bilong Abraham. Waswe, Satan duim samting hia for trae spoelem datfala seed bilong Abraham and Sarah? Bible no talem. Samting wea Bible talem nao Jehovah kwiktaem for stopem datwan. Long wanfala dream, Jehovah warnim Abimelech for no duim eni samting long Sarah.​—Gen. 20:​1-​18.

⁶ Datwan hem no only taem wea Jehovah protectim tufala. Long samfala nara taem, Jehovah sevem Abraham and famili bilong hem. (Gen. 12:14-​20; 14:13-​20; 26:26-​29) Man wea raetem psalm hem sei olsem abaotem Abraham and olketa long famili laen bilong hem: “Hem [Jehovah] no letem eni man for trikim olketa, bat for saed bilong olketa hem stretem olketa king, hem sei: ‘Iufala man no tasim olketa anointed wan bilong mi, and no duim eni nogud samting long olketa profet bilong mi.’ ”​—Ps. 105:14, 15.

7. Long wanem wei nao Jehovah protectim nation bilong Israel?

⁷ Jehovah iusim spirit bilong hem for protectim nation bilong Israel, bikos Seed wea hem promisim bae born long laen bilong olketa. Jehovah iusim spirit bilong hem for givim Law long Israel, wea helpem olketa Jew for gohed gud long trufala worship, for garem gudfala wei and for klin long physical wei. (Ex. 31:18; 2 Cor. 3:3) Long taem bilong Olketa Judge, spirit bilong Jehovah strongim samfala man for helpem Israel for winim olketa enemy. (Judg. 3:​9, 10) Jesus kamap main part long seed bilong Abraham, so long olketa year bifor Jesus born, masbi holy spirit nao protectim Jerusalem, Bethlehem, and temple, bikos olketa ples hia insaed olketa profesi abaotem Jesus.

8. Wanem nao showimaot holy spirit waka insaed laef and ministry bilong Son bilong God?

⁸ Holy spirit helpem Jesus long laef and ministry bilong hem. Mary kasem holy spirit and hem babule. Holy spirit mekem Mary wea no perfect for bornem wanfala perfect Son wea free from sin and dae. (Luke 1:​26-​31, 34, 35) Taem Jesus hem baby, holy spirit protectim hem tu for no dae. (Matt. 2:​7, 8, 12, 13) Taem Jesus hem 30 year, God anointim hem witim holy spirit, and markem hem for kamap king long laen bilong David and for preach. (Luke 1:​32, 33; 4:​16-​21) Holy spirit mekem Jesus garem paoa for duim olketa mirakol, olsem for healim olketa wea sik, feedim staka pipol, and mekem olketa wea dae for laef bak. Olketa bigfala samting wea hem duim showimaot olketa blessing wea iumi bae kasem taem Jesus rulim disfala earth.

9, 10. (a) Hao nao holy spirit helpem olketa disaepol bilong Jesus long first century? (b) Long first century C.E., wanem niu samting nao showaot abaotem plan bilong Jehovah?

⁹ Start long Pentecost 33 C.E., Jehovah iusim spirit bilong hem for anointim olketa narawan long seed bilong Abraham, wea staka long olketa no kam from famili laen bilong Abraham. (Rom. 8:​15-​17; Gal. 3:​29) Long first century, olketa disaepol bilong Jesus kasem holy spirit, wea mekem olketa strong for preach and for duim olketa mirakol. (Acts 1:8; 2:​1-4; 1 Cor. 12:​7-​11) Thru long olketa mirakol hia, holy spirit showimaot niu samting insaed plan bilong Jehovah. Jehovah no iusim nao arrangement for worship long temple long Jerusalem, wea gohed for staka handred year finis. Christian kongregeson nao hem kamap niu arrangement bilong God for trufala worship. Kam kasem distaem, Jehovah iusim disfala anointed kongregeson for mekem plan bilong hem kamap tru.

¹⁰ Samfala wei wea Jehovah iusim holy spirit hem for protectim, strongim, and anointim pipol bilong hem for mekem plan bilong hem gohed gud and for kamap tru. Bat waswe long taem bilong iumi? Hao nao Jehovah iusim spirit bilong hem for sapotim plan bilong hem distaem? Iumi mas savve long diswan bikos iumi laek for waka gud tugeta witim holy spirit. Iumi bae storyim fofala wei wea Jehovah iusim spirit bilong hem distaem.

Wanem Holy Spirit Duim Distaem

11. Wanem nao showimaot holy spirit helpem pipol bilong God for stap klin? Hao nao iu savve showimaot holy spirit helpem iu?

¹¹ First samting, holy spirit helpem pipol bilong God for klin. Olketa wea sapotim plan bilong Jehovah mas klin and garem gudfala wei. (Readim 1 Corinthians 6:​9-​11.) Bifor olketa kamap trufala Christian, samfala durong, duim adultery, and samfala man durong witim man or woman witim woman. Wei for laek duim sin savve strong tumas. (Jas. 1:​14, 15) Bat olketa changem wei bilong olketa for “kamap klin,” mekem God hapi long wanem olketa duim. Wanem nao helpem wanfala man wea lovem God for no duim rong samting? Long 1 Corinthians 6:​11 hem sei “spirit bilong God bilong iumi.” Taem iu gohed for garem klinfala wei, datwan showimaot holy spirit helpem iu.

12. (a) Olsem vision wea Ezekiel lukim, hao nao Jehovah leadim organization bilong hem? (b) Hao nao iu savve showimaot iu followim holy spirit?

¹² Mek tu samting, Jehovah iusim spirit bilong hem for leadim organization bilong hem. Long vision bilong Ezekiel, hem lukim wanfala chariot wea piksarem organization bilong Jehovah long heven, wea gohed muv for mekem plan bilong Jehovah kamap tru. Wanem nao helpem datfala chariot for gohed muv long eni direction? Holy spirit. (Ezek. 1:​20, 21) Iumi mas tingim hao organization bilong Jehovah hem garem tufala sekson, wanfala long heven and narawan long earth. Sapos holy spirit leadim sekson long heven, hem leadim tu sekson long earth. Taem iu obeyim and faithful for followim wanem organization bilong God long earth talem, datwan showimaot iu followim datfala chariot bilong Jehovah long heven and holy spirit bilong hem.​—Heb. 13:17.

13, 14. (a) Hu nao insaed ‘disfala genereson’ wea Jesus storyim? (b) Storyim samting wea showimaot holy spirit helpem iumi for minim gud olketa Bible truth distaem. (Lukim box “Taem Truth Gohed for Kamap Moa Klia, Waswe, Iu Minim Gud?”)

¹³ Mek-thri samting, Jehovah iusim spirit bilong hem for helpem iumi minim tru samting long Bible. (Prov. 4:​18) For longfala taem, “datfala wakaman wea faithful and wise” iusim Wastaoa magasin olsem main wei for minim kam olketa tru samting hia. (Matt. 24:45) Tingim wei wea iumi minim toktok bilong Jesus abaotem olketa wea insaed ‘disfala genereson.’ (Readim Matthew 24:32-​34.) Wanem genereson nao Jesus storyim? Datfala article “Wanem Nao Mining Bilong Taem wea Jesus Christ Hem Stap?” explainim hao taem Jesus storyim ‘disfala genereson,’ hem no minim nogud pipol, bat hem minim olketa disaepol bilong hem, wea klosap nao holy spirit bae anointim olketa.a Olketa anointed wan bilong Jesus long first century and distaem, olketa nao bae lukim datfala saen and luksavve datwan minim Jesus “hem aotsaed long door nao.”

¹⁴ Wanem nao diswan minim for iumi? Iumi no savve hao long nao ‘disfala genereson’ bae stap. Bat disfala word ‘genereson’ savve minim pipol wea laef long semtaem nomata olketa haomas year. Datwan hem no longtaem tumas bat mas finis. (Ex. 1:6) Wanem nao Jesus minim taem hem sei ‘disfala genereson’? Taem iumi tingim mining bilong datfala word ‘genereson,’ masbi Jesus minim olketa anointed wan wea stap laef long semtaem nomata olketa haomas year. Samfala hia lukim saen wea start for showaot long 1914 and gogo olketa dae, bat olketa narawan wea laef long semtaem witim olketa bae lukim start bilong bigfala trabol. Datfala genereson garem start and bae hem finis. From olketa part bilong datfala saen barava showaot klia, bigfala trabol mas klosap tumas nao. Taem iu gohed for lukaot and luksavve hao lelebet taem nomoa stap, datwan showimaot iu gohed for minim truth wea kamap moa klia distaem and followim wei wea holy spirit leadim iu.​—Mark 13:37.

15. Wanem nao showimaot holy spirit strongim iumi for talemaot gud nius?

¹⁵ Mek-foa samting, holy spirit strongim iumi for talemaot gud nius. (Acts 1:8) From gud nius gohed kasem full world, diswan pruvim holy spirit leadim disfala waka. Ting raonem diswan. Firstaem maet iu barava fraet or shame and tingse, ‘Hem hard tumas for mi preach long haos tu haos!’ Bat distaem, iu strong for duim datfala waka.b Staka Witness bilong Jehovah wea faithful, gohed for preach nomata pipol againstim and persecutim olketa. Holy spirit nomoa savve strongim iumi for winim olketa bigfala test and for duim samting wea hard for iumiseleva duim. (Mic. 3:8; Matt. 17:20) Taem iu barava sapotim preaching waka, datwan showimaot holy spirit leadim iu.

Wanem Holy Spirit Bae Duim Long Future

16. Why nao iumi savve sure Jehovah bae protectim pipol bilong hem taem bigfala trabol gohed?

¹⁶ Long future, Jehovah bae iusim holy spirit long nambawan wei for mekem plan bilong hem kamap tru. Tingim hao Jehovah bae protectim pipol bilong hem. Olsem iumi storyim finis, long taem bifor Jehovah iusim spirit bilong hem for protectim pipol bilong hem wanwan and full nation bilong Israel. Dastawe, iumi sure Jehovah bae iusim sem spirit for protectim pipol bilong hem long taem bilong bigfala trabol. Iumi no need for wari abaotem hao nao Jehovah bae lukaftarem iumi long datfala taem. Bat iumi savve garem full trust hao future bae gud tumas, bikos Jehovah bae no forgetim olketa wea lovem hem. And iumi mas no tingse hem hard for holy spirit helpem iumi nomata wea iumi stap.​—2 Chron. 16:9; Ps. 139:​7-​12.

17. Hao nao Jehovah bae iusim holy spirit bilong hem long niu world?

¹⁷ Hao nao Jehovah bae iusim holy spirit bilong hem long niu world wea bae kam? Holy spirit bae bihaenem olketa niu scroll wea bae open long datfala taem. (Rev. 20:12) Wanem nao bae insaed olketa scroll hia? Luk olsem, olketa samting wea Jehovah laekem iumi for duim insaed datfala wan thousand year. Waswe, iu luk forward for readim olketa scroll hia? Iumi barava luk forward for datfala niu world. Datfala taem bae hem barava nambawan bikos Jehovah bae iusim holy spirit for mekem plan bilong hem for disfala earth and olketa man for kamap tru.

18. Wanem nao iu disaed strong for duim?

¹⁸ Hem gud for iumi tingim evritaem hao Jehovah bae mekem plan bilong hem kamap tru from hem bae iusim holy spirit wea hem strongfala paoa long full universe for duim datwan. Iumi tu savve insaed long disfala plan. Dastawe, iumi mas disaed strong for prea long Jehovah for spirit bilong hem and followim datwan. (Luke 11:13) Taem iu duim olsem, iu savve laef olowe long Paradaes earth olsem Jehovah planim firstaem.

[Olketa Footnote]

Waswe, Iu Tingim Yet?

• Long olketa wanem wei nao Jehovah iusim holy spirit bilong hem for mekem plan bilong hem gohed long bifor?

• Hao nao Jehovah iusim holy spirit bilong hem distaem?

• Hao nao Jehovah bae iusim holy spirit bilong hem long future for mekem plan bilong hem kamap tru?

[Box long page 10]

Taem Truth Gohed for Kamap Moa Klia, Waswe, Iu Minim Gud?

Jehovah gohed for mekem truth kamap moa klia for pipol bilong hem. Wanem nao samfala samting hia wea olketa printim finis long Wastaoa?

▪ Long bifor, iumi tingse tokpiksa abaotem yeast long Matthew 13:33, hem piksarem olketa laea teaching bilong religion. Bat hao nao iumi minim datwan distaem?​—July 15, 2008, page 19-​20.

▪ Long bifor, iumi tingse God finis for chusim olketa wea bae go long heven long samting olsem 1935. Bat hao nao iumi minim distaem?​—January 15, 2008, page 22-​23.

▪ Long bifor, iumi tingse tokpiksa abaotem seed bilong mustard tree hem abaotem false religion. Bat hao nao iumi minim distaem? (Mark 4:30-32)​—July 15, 2008, page 17-18.

▪ Long bifor, iumi tingse tokpiksa abaotem wanfala net hem piksarem organization bilong olketa wea sei olketa Christian, wea minim olketa tru and false Christian. Bat hao nao iumi minim distaem? (Matt. 13:47-50)​—July 15, 2008, page 20-21.

▪ Long bifor, iumi tingse tokpiksa abaotem wei for plantim wheat and rabis grass, hem piksarem preaching waka. Bat hao nao iumi minim distaem? (Matt. 13:24-30)​—March 15, 2010, page 19-22.