Jehovah Laekem Iumi for “Stap Sef”

TAEM bigfala trabol seknomoa happen, Olmaeti God bae mek sure pipol bilong hem bae “stap sef.” (Joel 2:​32) Jehovah hem evritaem laek for protectim olketa pipol from nogud samting. From hem nao “man wea givim laef,” hem tinghae long laef bilong pipol and hem barava laek for protectim olketa.​—Ps. 36:9.

Olketa faithful wakaman bilong God bifor tu garem sem tingting olsem abaotem laef. Long Genesis 33:18, hem sei, Jacob and famili bilong hem “stap sef” bihaen wanfala gogo wea no sef. Nomata Jacob trustim Jehovah for protectim hem, Jacob duim samting tu for protectim olketa wea gogo tugeta witim hem. (Gen. 32:​7, 8; 33:14, 15) Taem iumi followim wanem Bible talem, iumi bae tinghae moa long wei for protectim iumiseleva and olketa narawan and no mekem accident kamap. Iumi bae lukim hao olketa wea waka long olketa Kingdom Hall and help long disaster relief, and olketa nara project followim tu sem samting.

Law Bilong Moses wea Storyim Samting for Duim Mekem Accident No Kamap

Law bilong Moses mekem pipol bilong God duim samting long sef wei, mekem accident no kamap. Olsem example, wanfala Israelite wea wakem haos, mas wakem smol wall raonem ruf long datfala haos. Staka taem olketa pipol savve stap long flat ruf long haos bilong olketa, dastawe datfala smol wall hem for protectim olketa for no foldaon. (1 Sam. 9:​26; Matt. 24:17) Sapos wanfala accident hem happen, bikos man wea ownim haos no followim law, long tingting bilong Jehovah, man hia nao mekem accident for kamap.​—Deut. 22:8.

Datfala Law hem fitim tu sapos wanfala animal hem attakim eniwan. Sapos wanfala man hem dae bikos wanfala buluka attakim hem, man wea ownim buluka mas killim dae datfala animal for protectim nara pipol. For killim dae datfala animal hem wanfala big samting, bikos man wea ownim animal bae no savve kaikaim meat bilong datfala buluka or sellim long olketa narawan. Waswe, sapos buluka attakim wanfala man and man wea ownim no lukaftarem and keepim gud, and bihaen, datfala sem buluka killim dae eniwan, wanem nao bae happen? Olketa mas killim dae datfala man and datfala buluka. Datfala law, hem mekem eniwan wea garem olketa animal for mas evritaem mek sure animal bilong olketa no spoelem eniwan.​—Ex. 21:28, 29.

Law storyim tu sef wei for iusim olketa tul. Staka Israelite iusim ax for katem firewood. Sapos hed bilong ax flae and hitim eniwan, datfala man wea katem firewood mas ranawe go long taon for stap sef. Hem mas stap long datfala taon go kasem taem hae priest dae, wea minim, bae hem no stap long hom bilong hem witim famili bilong hem for staka year. Datfala arrangement teachim nation bilong Israel hao laef hem holy samting long Jehovah. Man wea garem sem tingting olsem God abaotem laef, bae mek sure hem keepim gud olketa tul bilong hem and iusim long sef wei.​—Num. 35:25; Deut. 19:​4-6.

Jehovah talemaot klia insaed long olketa law hia, hao hem laekem pipol bilong hem for duim samting long sef wei insaed and aotsaed long haos mekem accident no kamap. Pipol wea mekem accident kamap and eniwan dae or garekil, olketa mas givim ansa long Jehovah. Tingting bilong Jehovah abaotem diswan hem no change. (Mal. 3:6) Hem laekem pipol for stap sef and no kasem eni accident distaem tu. Diswan hem barava tru taem iumi wakem and fixim olketa building wea iumi iusim for trufala worship.

Samting for Duim Mekem Accident No Kamap Long Olketa Building Project

Hem wanfala privilege for wakem and fixim olketa Kingdom Hall, Assembly Hall, and olketa branch office. Hem semsem tu taem iumi waka long olketa disaster-relief project. Evritaem, nomata waka wea iumi duim hem isi, iumi laek for duim gud, bikos, sapos iumi no iusim gud tul wea iumi waka long hem, iumi savve spoelem iumi seleva and olketa narawan. (Eccl. 10:9) Tru tumas, taem iumi gohed for duim waka long sef wei, bae iumi no mekem accident kamap.

Bible talem: “Samting wea mekem olketa young man luk gud tumas hem strong wea olketa garem, and gray hair bilong olketa olo man hem glory bilong olketa.” (Prov. 20:29) For duim olketa big waka hem needim strong bilong olketa young wan. Bat olketa wea waka longtaem long construction savve duim waka wea luk naes tumas, bikos olketa savve hao for iusim gud tul bilong olketa. Olketa wea olo tu duim olketa bigfala waka taem olketa young. Sapos iu wanfala niu volunteer, iu savve luk followim olketa wea waka for longtaem and followim wanem olketa talem. Sapos iu laek for lane, olketa brata wea garem savve for duim construction waka bae teachim iu staka samting. Bae iu lanem hao for iusim long sef wei olketa samting wea hem danger and hao for liftim olketa hevi samting. Taem iu duim olsem datwan bae helpem iu for waka gud, sef and hapi.

Olketa wea waka long construction mas lukaot gud evritaem. Accident savve happen enitaem. Ples wea hem strong firstaem, maet distaem hem garem wanfala hol. Maet eniwan muvim wanfala ladder, wanfala timba or baket paint. Sapos iu no careful iu savve kasem accident. Staka taem olketa rul abaotem safety long construction waka sei, olketa wea waka mas iusim samting for protectim body. Olketa glass for protectim eye, hard hat, shoe wea fitim, olketa savve protectim iu from olketa danger samting wea savve kamap long ples wea construction gohed. Sapos iumi evritaem werem olketa samting hia and lukaftarem gud, olketa savve protectim iumi taem iumi kasem eni accident.

Nomata olketa tul hia hem isi for iusim, iu mas savve gud hao for iusim long sef wei. Sapos iu no savve hao for iusim gud wanfala tul wea iu need for iusim, iu savve askem help long brata wea lukaftarem datfala tul. Hem nao bae askem eniwan for helpem iu for savve hao for iusim. Bae hem gud tumas sapos iu hambol and duim nomoa samting wea iu fit for duim. Hem samting wea iu mas duim, mekem accident no kasem iu and olketa narawan wea waka witim iu long construction.​—Prov. 11:2.

Long construction waka, wei for foldaon nao hem wanfala long olketa big accident wea mekem staka garekil. Bifor eniwan klaemap long wanfala ladder or scaffold, hem mas mek sure firstaem datfala ladder hem sef and fit for man iusim. Sapos iu waka antap long wanfala scaffold mek sure iu putim rail raonem, and sapos iu waka antap long ruf hem important for iu werem safety rope. Iu savve askem overseer wea lukaftarem waka sapos iu garem eni kwestin abaotem hao for waka long olketa haefala ples.a

Taem olketa wea worshipim Jehovah start for kamap staka evriwea long world, bigfala need hem stap tu for wakem olketa Kingdom Hall and olketa nara building for iusim long tru worship. Olketa wea lukaftarem Kingdom Hall construction waka and olketa nara project, garem waka for protectim olketa sheepsheep bilong Jehovah wea waka witim olketa. (Isa. 32:​1, 2) Sapos iu garem waka for lukaftarem olketa brata and sista long wanfala building project, iu mas no forgetim hao hem important tumas for followim safety rul. Mas trae for mekem ples for waka hem klin and no eni samting hem stap olobaot. Long kaenfala wei remindim olketa maet wea forget hao hem important for waka long sef wei. No letem olketa young wan or olketa wea no fit, for go insaed long olketa area wea no sef. Luksavve long olketa danger wea savve kamap and redyim olketa wea waka for waka long sef wei. Tingim evritaem, goal bilong iumi nao hem for no eniwan garekil go kasem taem project hem finis.

Love Nao Important Samting

For wakem olketa Kingdom Hall and olketa nara building for iusim long tru worship, savve garem samfala waka wea maet no sef. Dastawe olketa wea waka long olketa project olsem mas careful. Taem iumi obeyim olketa Bible principle, obeyim olketa rul long waka and iusim gudfala tingting, datwan bae mekem accident no kasem iumi and olketa wea iumi waka tugeta.

Wanem nao muvim iumi for tinghae long wei for no mekem accident kamap? Hem nao love. Love for Jehovah nao mekem iumi for barava tinghae long laef, olsem Jehovah. Love wea iumi garem for pipol tu mekem iumi for no duim eni samting wea savve mekem accident for kamap. (Matt. 22:37-​39) Dastawe, iumi mas duim best bilong iumi for mekem olketa wea waka long building project bilong iumi for “stap sef.”

[Footnote]

[Box/​Piksa long page 30]

Hao for Iusim Olketa Ladder Long Sef Wei Taem Iu Waka

Long wanfala year wea go pas nomoa, winim 160,000 wakaman long America nao olketa garekil from olketa foldaon from ladder. And tu, 150 pipol nao dae from accident olsem. Iumi bae storyim samfala wei for iusim ladder wea bae mekem iumi no kasem accident long ples wea iumi stap or wei iumi waka.

◇ Torowem ladder wea no stedy or wea samfala part long hem nogud, and no trae for fixim kaen ladder olsem. No iusim moa.

◇ Evri ladder no semsem, samfala iu savve putim hevi samting long hem and samfala nomoa. Mek sure iu no iusim ladder wea no fitim hevi bilong iu, and olketa tul wea iu bae iusim.

◇ Mas stand apim ladder bilong iu long ples wea level and strong gud. No putim ladder long ples wea no stedy, olsem antap long scaffold, olketa baket and olketa box.

◇ Evritaem iu klaem or go daon long wanfala ladder, iu mas feisim datfala ladder.

◇ No standap or sidaon long tufala step antap long ladder.

◇ Sapos iumi iusim ladder for go ap or kam daon from ruf or iu putim ladder long ples wea iu bae waka long hem, iumi mas apim ladder winim wan meter from ples wea iumi bae step long hem for waka. Taengem gud or nilam wanfala timba for sokem botom bilong datfala ladder mekem hem no muv. Sapos iu no savve sokem ladder olsem, askem eniwan for holem ladder taem iu gohed waka. Taengem gud top bilong datfala ladder mekem hem no foldaon.

◇ No putim pis timba midolwan long tufala step and iusim for putim samting antap.

◇ Taem iu waka antap long ladder no muvim tumas leg and hand bilong iu, maet ladder hem isi for foldaon. Mas no duim samting olsem, bikos hem no sef. Evritaem muvim go ladder long ples wea iu bae waka long hem.

◇ Sapos iu mas waka long wanfala ladder wea stap front long wanfala door wea hem sat, putim wanfala saen long door and lokim. Sapos door hem no savve lok, talem eniwan for standap front long door for talem eniwan wea laek kam pas.

◇ Wanfala man nomoa savve iusim wanfala ladder, bat sapos olketa wakem datfala ladder for fitim tufala man, tufala savve iusim long semtaem.b

[Footnotes]

[Piksa long page 29]

Law bilong Moses sei pipol mas wakem smol wall raonem flat ruf long haos