Gohed Strong Taem Marit Partner Kamap Enemy

MARGARITA and hasband bilong hem Raúl duim full-taem service for staka year.a Bat no longtaem bihaen tufala garem firstfala pikinini, Raúl start for no fren gud witim Jehovah. Gogo Raúl duim rabis samting and hem disfellowship. Margarita sei: “Taem diswan happen, mi tingse bae mi dae nao. Mi barava sorre tumas, and mi no savve wanem for duim.”

No longtaem bihaen Jane marit, hasband bilong hem duim samting wea mekem Jane no trustim hem and spoelem wei wea Jane lovem hem. Hasband bilong hem start for killim hem. Jane sei: “Firstaem wea hem hitim mi, mi seke tumas, mi feel shame, and mi feel nogud tumas. Gogo hem savve killim mi evritaem, then bihaen, hem barava askem mi for forgivim hem. From mi Christian, mi tingse mi mas forgivim hem evritaem and forgetim datwan. Mi tingse hem no stret for mi storyim disfala problem long eniwan, nomata long olketa elder tu. Plande year nao hem gohed killim mi and askem mi for forgivim hem. Mi trae for tingim wanem mi savve duim for mekem hasband bilong mi lovem mi. Gogo taem hem lusim mi and gele bilong mitufala, mi tingse mi nao nogud and mi shud duim samting for mekem mitufala gohed stap tugeta.”

Sapos hasband bilong iu kamap enemy bilong iu olsem Margarita and Jane, maet iu barava feel nogud, maet hem no isi for iu kasem selen, and maet iu no fren gud witim Jehovah. Or maet iu hasband wea feel nogud and kasem hard taem from waef bilong iu no faithful long iu. Bible talem finis iumi stap long taem wea “olketa nogud samting bae kamap wea mekem laef no isi.” Datfala profesi talem long “olketa last day” staka famili bae no garem love wea olketa long famili shud garem. Samfala bae laea nomoa for sei olketa lovem God. (2 Tim. 3:​1-5) Samting olsem savve kasem olketa tru Christian tu. So wanem nao savve helpem iu for gohed strong sapos marit partner bilong iu kamap enemy bilong iu?

Jehovah Ting Hao Long Iu?

Maet iu no minim why nao samwan wea iu lovem hem barava spoelem iu. Maet iu tingse iu nao nogud dastawe hem duim olketa nogud samting.

Tingim Jesus. Hem perfect, bat samwan wea hem trustim and lovem kamap enemy bilong hem. Jesus chusim olketa aposol bihaen hem ting raonem datwan and prea abaotem. Twelvfala evriwan worshipim Jehovah. So Jesus mas sorre tumas taem Judas kamap “enemy” bilong hem. (Luke 6:​12-​16) Nomata olsem, Jehovah no blamem Jesus for wanem Judas duim.

No eni marit partner hem perfect distaem. Tufala evriwan mekem mistek. Man wea raetem psalm hem sei: “Jehovah, sapos sin wea mifala duim nao iu lukluk long hem, hu nao savve ranawe from panis bilong iu?” (Ps. 130:⁠3) Tufala wea marit savve followim wei bilong Jehovah for forgive taem narawan duim mistek.​—⁠1 Pet. 4:⁠8.

Nomata olsem, “iumi evriwan bae ansa long God for samting wea iumi duim and talem.” (Rom. 14:12) Sapos hem wei bilong marit partner for tok spoelem or duim nogud samting long iu, hem nao mas ansa long Jehovah for wanem hem duim. Jehovah barava againstim wei for raf and tok spoelem narawan, dastawe hem no fitim for marit partner duim eni samting wea showimaot hem no lovem and no respectim iu. (Ps. 11:5; Eph. 5:​33; Col. 3:​6-8) Bat sapos wanfala Christian gohed for kros tumas, no repent, and no willing for changem wei bilong hem, hem mas disfellowship. (Gal. 5:​19-​21; 2 John 9, 10) Iu no need for feel guilty for talem olketa elder sapos marit partner bilong iu barava no followim wei bilong Christ. Tru tumas, Jehovah barava kaen long olketa wea marit partner spoelem olketa.

Taem marit partner duim adultery, hem sin againstim partner bilong hem and Jehovah tu. (Matt. 19:​4-9; Heb. 13:⁠4) Sapos partner wea no duim rong samting trae hard for followim Bible, hem no need for feel guilty sapos partner bilong hem duim adultery.

No forgetim, Jehovah savve long feeling bilong iu. Jehovah hem olsem hasband bilong nation bilong Israel. Taem olketa worshipim olketa nara god, hem olsem olketa duim adultery againstim Jehovah long spiritual wei. Dastawe staka verse long Bible storyim Jehovah sorre tumas. (Isa. 54:​5, 6; Jer. 3:​1, 6-​10) Sapos marit partner kamap enemy bilong iu, Jehovah barava savve taem iu krae from iu sorre. (Mal. 2:​13, 14) Hem savve iu needim samwan for comfortim iu and encouragem iu.

Jehovah Comfortim Iumi

Jehovah givim Christian kongregeson for comfortim iumi. Kongregeson sapotim Jane. Hem sei: “Circuit overseer kam for visitim kongregeson long taem wea mi sorre and wiki tumas. Hem savve long datwan from hasband bilong mi laekem mitufala for divorce. Hem story gud witim mi abaotem 1 Corinthians 7:​15 and samfala nara scripture. Naesfala toktok bilong hem from Bible helpem mi for no feel guilty and no sorre tumas.”b

Christian kongregeson helpem Margarita tu. Hem sei: “Taem mi luksavve hasband bilong mi no laek for repent, mi tekem tufala boy bilong mi and mi thrifala go stap long nara taon wea mi rentim tufala rum. Long next day, mi sorre tumas taem mi aotem evri samting from olketa basket, then samwan noknok long door. Mi tingse hem woman wea ownim ples wea stap long next rum. Bat mi barava sapraes, hem sista wea study witim mami bilong mi wea helpem famili bilong mifala for lanem truth. Hem no kam for lukim mi, bat hem kam bikos hem studyim Bible witim woman wea ownim ples. Mi hapi tumas and mi krae. Then mi storyim samting wea happen long mi, and mitufala krae. Hem helpem mifala for go long meeting long datfala day. Kongregeson welkamim mifala and olketa elder helpem mifala for gohed fren gud witim Jehovah.”

Wanem Olketa Narawan Savve Duim

Kongregeson savve duim plande samting for sapotim olketa hia. Margarita mas faendem waka for selen, so sapos hem needim eniwan for lukaftarem olketa pikinini bihaen skul finis, wanfala famili sei olketa savve duim datwan.

Margarita sei: “Mi barava tinghae long olketa brata and sista wea willing for waka witim mi and pikinini bilong mi long ministry.” Taem olketa long kongregeson ‘helpem evriwan long olketa hard taem,’ olketa “duim nao wanem law bilong Christ hem talem.”​—⁠Gal. 6:⁠2.

Olketa wea safa from narawan sin againstim olketa barava tinghae long olketa long kongregeson wea helpem olketa. Hasband bilong Monique lusim hem and fofala pikinini. Monique mas changem $125,000 (S.I. dollar) kaon bilong hasband bilong hem. Hem sei: “Olketa brata and sista lovem mifala tumas. Mi no savve wanem nao bae mi duim sapos olketa no sapotim mifala. Jehovah givim mi olketa naesfala brata wea willing for helpem olketa pikinini bilong mi. And mi hapi tumas for lukim olketa pikinini fren gud witim Jehovah. Sapos mi needim eni advaes, olketa elder helpem mi. Sapos mi laek story witim eniwan, olketa lisin long mi.”​—⁠Mark 10:​29, 30.

Fren wea lovem iumi luksavve sapos hem no taem for storyim nogud samting wea happen. (Eccl. 3:⁠7) Margarita sei: “Mi hapi for story witim olketa sista long niu kongregeson abaotem preaching waka, olketa Bible study, olketa pikinini, bat no tumas abaotem olketa problem bilong mi. Mi tinghae long olketa bikos olketa helpem mi for no tingim samting wea happen, bat for gohed strong distaem.”

No Changem Bak Nogud Samting

Maet iu kros from iu kasem olketa barava nogud samting bikos marit partner bilong iu sin. Sapos iu gohed for feel kros, datwan savve mekem iu wik and no gohed strong for faithful long Jehovah. Maet iu lukaotem chance for changem bak nogud samting long partner bilong iu.

Sapos iu luksavve iu feel olsem, hem gud for ting raonem example bilong Joshua and Caleb. Tufala hia wea faithful long God stap long danger taem olketa go for spaem Promis Land. Olketa nara spae no showimaot faith and mekem olketa Israelite for no obeyim Jehovah. Samfala Israelite laek for sutim Joshua and Caleb long ston taem tufala trae for encouragem olketa for gohed faithful long God. (Num. 13:⁠25–​14:10) From nogud samting wea olketa Israelite duim, Joshua and Caleb mas wakabaot long wilderness for 40 year, no from tufala nao duim nogud samting.

Nomata sin wea olketa Israelite duim maet mekem Joshua and Caleb sorre, tufala no gohed kros. Tufala tingim nomoa wei for gohed fren witim Jehovah. Bihaen 40 year long wilderness, tufala witim olketa Levite nomoa from datfala genereson hapi tumas for go insaed Promis Land.​—⁠Num. 14:​28-​30; Josh. 14:​6-​12.

Nogud samting wea marit partner bilong iu duim maet mekem iu safa for longfala taem. Maet marit bilong iu finis, and maet iu gohed feel sorre and kasem hard taem long selen. Nomata olsem, no gohed for wikdaon and sorre tumas. Bat tingim hao Jehovah savve judgem eniwan wea min for brekem law bilong hem, olsem hem duim long olketa Israelite long wilderness wea no showimaot faith.​—⁠Heb. 10:​30, 31; 13:⁠4.

Iu Savve Gohed Strong!

No tingim olketa nogud samting, bat tingim Jehovah evritaem. Jane sei: “Taem mi lisin long olketa kaset bilong The Watchtower and Awake!, datwan helpem mi for gohed strong. Olketa meeting tu barava strongim mi. Taem mi tekpart long olketa meeting, mi no tingim tumas olketa problem bilong mi. Preaching waka tu strongim mi. Taem mi helpem olketa narawan for showimaot faith long Jehovah, mi strongim tu faith bilong mi. And taem mi lukaftarem gud olketa Bible study, mi tingim nomoa olketa samting wea barava important.”

Monique sei: “Taem mi go long olketa meeting evritaem and busy long field service, hem helpem mi for gohed strong. Famili bilong mi fren gud tugeta and fren gud witim olketa long kongregeson. Olketa problem wea kasem mi mekem mi luksavve long olketa wik point bilong mi. Mi kasem test bat Jehovah helpem mi for gohed strong.”

Iu tu savve gohed strong sapos semkaen samting testim iu. Nomata sapos iu sorre tumas from marit partner kamap enemy bilong iu, “no givap for duim gudfala samting, bikos long barava taem iumi bae harvestim samting sapos iumi no taed or givap.”​—⁠Gal. 6:⁠9.

[Olketa Footnote]

[Piksa long page 31]

Olketa wea marit partner lusim olketa tinghae long narawan wea helpem olketa long field ministry