Leader Bilong Iumi Duim Bigfala Waka
“Hem go faetem olketa enemy and winim olketa.”—REV. 6:2.
1, 2. (a) Wanem nao Bible sei Christ duim start long 1914? (b) Wanem nao Christ duim bihaen hem kamap King?
CHRIST kamap King long Kingdom bilong Jehovah long 1914. Wanem nao iu tingse Jesus duim distaem? Waswe, iu tingse hem sidaon long throne, and samfala taem nomoa hem luk kam long earth for lukim wanem nao gohed long kongregeson? Sapos iu garem tingting olsem, iu shud changem tingting bilong iu. Buk bilong Psalms and Revelation sei Jesus hem strongfala king wea raedem horse and hem “go faetem olketa enemy and winim olketa.”—Rev. 6:2; Ps. 2:6-9; 45:1-4.
2 Firstfala samting wea Christ duim taem hem King, hem winim “datfala snek and olketa angel bilong hem.” Christ wea hem Michael datfala chief angel, torowem Satan and olketa demon kam daon long earth mekem olketa no savve go bak long heven. (Rev. 12:7-9) Bihaen datwan, Jesus wea man wea Jehovah markem for “talemaot message abaotem agreement,” hem kam witim Dadi bilong hem for lukluk gud long spiritual temple. (Mal. 3:1) Hem judgem olketa religion wea sei olketa Christian, wea olketa nao barava nogud part bilong “Bigfala Babylon.” Olketa guilty from olketa killim dae staka pipol and olketa no faithful long God from olketa joinim politik.—Rev. 18:2, 3, 24.
Christ Klinim Wakaman Bilong Hem Long Earth
3, 4. (a) Jehovah iusim Jesus, “man for talemaot message,” for duim wanem? (b) Taem Jesus lukluk long temple, wanem nao hem lukim? From Jesus hem Hed bilong kongregeson, hu nao hem markem for lukaftarem evri samting bilong hem?
3 Taem Jehovah and Jesus lukluk long spiritual temple, olketa lukim long courtyard bilong datfala temple, olketa tru Christian wea no followim olketa religion wea sei olketa Christian. Bat olketa anointed Christian hia wea olketa nao “olketa son bilong Levi,” olketa tu need for kamap klin olsem profet Malachi talem. Hem sei: “Hem [Jehovah] mas sidaon olsem man for bonem silver and gold for aotem rabis bilong hem and hem mas klinim olketa son bilong Levi. Hem mas klinim olketa olsem fire hem klinim gold and silver. And olketa bae kamap pipol bilong Jehovah wea givim sakrifaes long hem wea olketa duim long stretfala wei.” (Mal. 3:3) Jehovah iusim Christ Jesus, man wea hem markem for “talemaot message abaotem agreement,” for klinim olketa spiritual Israelite.
4 Nomata Christ klinim olketa anointed Christian, hem lukim olketa faithful and waka hard for givim spiritual kaikai long pipol bilong God long barava taem. Start long 1879, nomata olketa kasem hard taem, olketa gohed for printim Wastaoa magasin wea talemaot olketa tru samting abaotem Kingdom bilong God. Jesus talem finis “taem hem kam” for lukluk long olketa nara wakaman bilong hem long taem “world hem gogo for finis,” hem bae faendem wanfala wakaman wea “givim kaikai long olketa long barava taem.” Datfala wakaman bae hapi and Christ bae “markem hem for lukaftarem evri samting bilong hem” long earth. (Matt. 24:3, 45-47) Christ wea hem Hed bilong Christian kongregeson iusim “datfala wakaman wea faithful and wise” for lukaftarem evri samting bilong Hem long earth wea join witim Kingdom. Hem iusim Governing Body for leadim olketa anointed Christian wea olketa nao “olketa nara wakaman” and for leadim tu “olketa nara sheepsheep.”—John 10:16.
Harvestim Planteison Long Earth
5. Wanem nao aposol John lukim Messiah King duim?
5 Aposol John lukim long vision nara samting wea Messiah King bae duim long “day bilong Lord,” bihaen Hem kamap King long 1914. John sei: “Mi lukim wanfala white cloud and mi lukim wanfala man hem sidaon antap long hem wea olsem son bilong man. Hem garem gold crown long hed bilong hem and holem wanfala naef wea sharp fogud.” (Rev. 1:10; 14:14) John herem angel bilong Jehovah talem datfala man for harvest for iusim naef bilong hem bikos “planteison long earth hem redi nao for harvestim.”—Rev. 14:15, 16.
6. Wanem nao Jesus sei bae hem happen?
6 Disfala waka for ‘harvestim planteison long earth’ mekem iumi tingim tokpiksa bilong Jesus abaotem wheat and rabis grass. Jesus storyim hemseleva olsem man wea plantim olketa wheat long planteison from hem laek harvestim olketa gudfala wheat, wea piksarem “olketa son bilong kingdom.” Olketa hia nao olketa anointed Christian wea bae rul witim hem long Kingdom. Bat long naet, wanfala enemy, wea hem nao “Devil,” hem kam and plantim rabis grass midolwan olketa wheat. Rabis grass hem “olketa son bilong Devil.” Boss talem olketa wakaman bilong hem for letem wheat and rabis grass grow tugeta go kasem taem for harvestim planteison, wea hem nao taem wea “world hem gogo for finis.” Long datfala taem, hem bae sendem kam olketa angel bilong hem for separatem wheat from olketa rabis grass.—Matt. 13:24-30, 36-41.
7. Long wanem wei nao Christ ‘harvestim planteison long earth’?
7 Olsem John lukim long vision, Jesus gohed for ‘harvestim planteison long earth.’ First samting wea Jesus duim, hem hipimap olketa anointed Christian wea stap yet long earth. Olketa hia “olketa son bilong Kingdom” wea piksarem “wheat” long tokpiksa bilong Jesus. Bihaen long World War I, pipol barava luksavve olketa tru Christian difren from olketa laea Christian. From diswan, Jesus start for hipimap olketa nara sheepsheep, wea hem nao mek-tu part bilong waka for ‘harvestim planteison long earth.’ Olketa nara sheepsheep no “olketa son bilong kingdom” bat olketa nao “big crowd” wea willing for stap anda long datfala Kingdom. Evriwan kam from “olketa difren kantri and garem difren languis.” Olketa stap anda long Messiah Kingdom, wea Christ Jesus and 144,000 anointed Christian nao bae rul long datfala gavman long heven.—Rev. 7:9, 10; Dan. 7:13, 14, 18.
Leadim Olketa Kongregeson
8, 9. (a) Wanem nao showimaot Jesus savve no long wanem each kongregeson duim nomoa bat wanem each Christian duim tu? (b) Wanem nao “olketa deep samting bilong Satan” wea iumi mas stap klia long hem?
8 Long study bifor, iumi lanem Christ hem lukluk gud long spiritual saed bilong olketa kongregeson long first century. Distaem, from Christ hem King and Leader, hem garem paoa “ovarem evri samting long heven and earth.” Hem Hed bilong evri kongregeson long world and olketa elder tu. (Matt. 28:18; Col. 1:18) Jehovah “mekem hem hed ovarem evri samting for helpem kongregeson” bilong olketa anointed Christian. (Eph. 1:22) So Christ savve long evri samting wea gohed long winim 100,000 kongregeson bilong Olketa Jehovah’s Witness.
9 Jesus talem disfala message long kongregeson long Thyatira: “Hem nao samting wea Son bilong God talem, wea garem eye olsem fire wea laet, . . . ‘Mi savve long wanem iufala duim.’” (Rev. 2:18, 19) Jesus tok strong long olketa bikos olketa duim olketa rabis samting and wanem olketa seleva laekem. Hem sei: “Mi luksavve long tingting bilong iufala, and mi bae changem bak long iufala wanwan fitim wanem iufala duim.” (Rev. 2:23) Samting wea Jesus talem showimaot hem savve no long wanem each kongregeson duim nomoa bat hem savve tu long wanem each Christian duim. Jesus praisem olketa Christian long Thyatira wea “no savve long ‘olketa deep samting bilong Satan.’” (Rev. 2:24) Hem hapi tu long olketa young wan and olketa olo distaem wea stap klia long “olketa deep samting bilong Satan” wea Internet, olketa raf video game, and idea bilong man mekhae long hem. Christ hapi tumas taem hem lukim olketa Christian waka hard for followim wanem hem talem!
10. Hao nao Bible storyim wei wea Christ leadim olketa elder, bat wanem nao olketa need for luksavve long hem?
10 Christ iusim olketa elder for leadim olketa kongregeson long earth. (Eph. 4:8, 11, 12) Long first century, evri elder hem olketa anointed Christian. Buk bilong Revelation storyim olketa olsem olketa star wea stap long raet hand bilong Christ. (Rev. 1:16, 20) Staka long olketa elder distaem hem olketa nara sheepsheep. Bifor olketa brata hia kamap elder, olketa nara elder prea staka taem and askem holy spirit for helpem olketa disaed sapos brata hia hem fit for elder. Datwan showimaot Christ leadim olketa. (Acts 20:28) Bat olketa luksavve Christ iusim samfala anointed brata wea olketa nao Governing Body for leadim olketa disaepol bilong hem long earth.—Readim Acts 15:6, 28-30.
“Kam, Lord Jesus”
11. Why nao iumi barava laekem Leader bilong iumi for kam kwiktaem?
11 Long message wea aposol John kasem, staka taem Jesus sei hem bae kam kwiktaem. (Rev. 2:16; 3:11; 22:7, 20) Luk olsem hem story abaotem taem wea hem bae kam for finisim Bigfala Babylon and world bilong Satan. (2 Thess. 1:7, 8) From aposol John laekem tumas for lukim olketa nambawan samting wea bae happen, hem sei: “Amen! Kam, Lord Jesus.” Iumi wea stap long taem wea world hem gogo for finis barava laekem tu for lukim taem wea Leader and King bilong iumi bae kam for mekhae long nem bilong Dadi bilong hem and showimaot Jehovah nomoa fit for rul.
12. Wanem nao Christ bae duim bifor hem finisim world bilong Satan?
12 Bifor Jesus finisim world bilong Satan, hem bae putim mark firstaem long forhed bilong olketa long 144,000 wea stap yet long earth. Bible sei olketa angel bae no let go long fofala wind wea bae finisim world bilong Satan go kasem taem wea evriwan long 144,000 kasem mark finis.—Rev. 7:1-4.
13. Wanem nao bae Christ duim long first part bilong “bigfala trabol” for showimaot hem stap?
13 Staka pipol long world distaem nating luksavve Christ hem “stap” start kam long 1914. (2 Pet. 3:3, 4) Bat klosap nao pipol bae luksavve long datwan taem Jesus finisim evri difren part long world bilong Satan. Taem “datfala man wea duim nogud samting” hem finis, wea hem nao olketa bigman bilong religion wea sei olketa Christian, datwan bae barava ‘showimaot Christ hem stap.’ (Readim 2 Thessalonians 2:3, 8.) Hem bae pruvim Christ nao Judge wea Jehovah markem. (Readim 2 Timothy 4:1.) Taem disfala barava nogud part bilong Bigfala Babylon hem finis, then evri nara false religion tu bae finis. Jehovah bae putim insaed mind bilong olketa bigman bilong gavman for finisim datfala jury woman. (Rev. 17:15-18) Datwan nao bae first part bilong “bigfala trabol.”—Matt. 24:21.
14. (a) Why nao God bae no letem first part bilong datfala big trabol gohed for longfala taem? (b) Wanem nao pipol bilong Jehovah bae duim taem ‘saen bilong Son bilong man showaot’?
14 From God “tingim olketa wea hem chusim,” wea hem nao olketa anointed Christian wea stap yet long earth, Jesus sei God bae no letem datfala trabol gohed for longfala taem. (Matt. 24:22) Taem olketa bigman bilong gavman finisim false religion, Jehovah bae no letem olketa for finisim olketa anointed Christian and olketa nara sheepsheep. Jesus sei “bihaen long bigfala trabol hia,” olketa saen bae showaot tu long sun, moon, and olketa star. “Bihaen datwan saen bilong Son bilong man bae showaot long skae.” Diswan bae mekem pipol long evri kantri long earth for “krae big tumas.” Bat olketa anointed Christian wea garem hope for go long heven, and olketa nara sheepsheep wea garem hope for stap long earth bae no olsem. Olketa bae ‘standap stret and apim hed bilong olketa, bikos taem for God sevem olketa hem klosap.’—Matt. 24:29, 30; Luke 21:25-28.
15. Wanem nao bae Christ duim taem hem kam?
15 Bifor Christ winim enemy bilong hem, hem bae duim nara samting tu. Hem sei: “Taem Son bilong man hem kam witim olketa angel, hem bae garem bigfala paoa and hem bae sidaon long nambawan throne bilong hem. Bae hem kam and separatem full world long tufala difren sekson, olsem man wea lukaftarem olketa sheepsheep hem separatem olketa sheepsheep from olketa goat. Bae hem putim olketa sheepsheep long raet saed bilong hem, and olketa goat long left saed bilong hem.” (Matt. 25:31-33) Diswan story abaotem taem wea Christ bae kam olsem Judge for separatem “full world long tufala difren sekson.” Wanfala sekson hem “olketa sheepsheep” wea waka witim olketa spiritual brata bilong Christ (olketa anointed Christian long earth). Nara sekson hem “olketa goat” wea “no obeyim gud nius abaotem Lord bilong iumi Jesus.” (2 Thess. 1:7, 8) Bible sei olketa sheepsheep nao “olketa wea raeteous” wea bae kasem “laef olowe” long earth, bat olketa goat “bae dae and no laef moa.”—Matt. 25:34, 40, 41, 45, 46.
Jesus Winim Olketa Enemy
16. Wanem nao Leader bilong iumi Christ bae duim for winim olketa enemy bilong hem?
16 Bihaen Christ putim mark long forhed bilong evri anointed Christian wea bae king and priest and putim olketa sheepsheep long raet saed bilong hem for sevem olketa, hem savve go and ‘winim olketa enemy bilong hem.’ (Rev. 5:9, 10; 6:2) Jesus bae leadim olketa angel and olketa anointed brata bilong hem wea laef bak for finisim olketa gavman, olketa army, and olketa bisnis long earth wea Satan kontrolem. (Rev. 2:26, 27; 19:11-21) Christ bae winim olketa enemy taem hem finisim world bilong Satan. Then hem bae torowem Satan and olketa demon long hol wea barava deep tumas for 1,000 year.—Rev. 20:1-3.
17. Taem Christ rul for 1,000 year, bae hem leadim olketa nara sheepsheep long wea? Wanem nao iumi mas disaed for duim?
17 Aposol John storyim wanem nao bae happen long “big crowd” wea bae laef bihaen long bigfala trabol. Hem sei “datfala Pikinini Sheepsheep wea standap saed long throne bae lukaftarem olketa and leadim olketa long springwata wea mekem man laef olowe.” (Rev. 7:9, 17) Tru tumas, taem Christ rul for 1,000 year, hem bae leadim olketa nara sheepsheep wea lisin long hem and mekem olketa for kasem laef olowe. (Readim John 10:16, 26-28.) Iumi mas faithful for followim Leader bilong iumi long distaem and long niu world wea Jehovah promisim!
Review
• Wanem nao Christ duim bihaen hem kamap King?
• Hu nao Christ iusim for leadim olketa kongregeson?
• Wanem nao Leader bilong iumi Christ bae duim taem hem kam?
• Long wanem wei nao bae Christ gohed for leadim iumi long niu world?
[Piksa long page 29]
Taem Christ finisim world bilong Satan, pipol bae luksavve hem stap