“Disfala Buk Helpem Mi for Kasem Heart Bilong Pipol”
LONG 2005, wanfala meeting kamap long Porto Alegre, wanfala taon long south Brazil. Olketa story abaotem wei and living bilong pipol. Staka thousand pipol from 135 kantri kam long datfala meeting. Taem olketa spel, samfala Witness from wanfala kongregeson long Porto Alegre storyim message abaotem Kingdom long staka wea kam for datfala meeting. Wanem nao olketa brata and sista iusim for story witim pipol hia from olketa difren kantri?
Elizabete, wanfala pioneer, hem sei: “Mifala iusim datfala buk Gud Nius for Pipol Bilong Evri Nation.” Hem sei tu: “Staka wea kam hem firstaem for olketa herem gud nius abaotem Kingdom, and olketa hapi for herem wanem mifala storyim. Mifala story witim pipol from Bolivia, China, France, India, Israel, and Nigeria. Mifala garem olketa buk long languis bilong samfala wea kam, and olketa hapi for tekem.”
Long Mexico, wanfala pioneer wea nem bilong hem Raúl iusim datfala buk tu and gud samting kamaot from datwan. Wantaem hem meetim wanfala Arab man wea 80 year wea waef bilong hem dae no longtaem go nomoa. Bihaen datfala man readim message abaotem Kingdom long Arabic languis, hem krae. Why nao olsem? Taem hem readim long languis bilong hem promis bilong God long Revelation 21:3, 4 wea sei no eniwan bae dae, datwan barava kasem heart bilong hem. Long narataem, Raúl meetim wanfala man wea story long Portuguese languis. Son bilong datfala man hem dae. Raúl openem Gud nius buk wea garem message long Portuguese languis and hem givim for datfala man readim. Bihaen man hia readim, Raúl luksavve hem laek lanem moa samting abaotem Bible and hem acceptim Bible study.
Raúl iusim datfala buk Gud Nius for Pipol Bilong Evri Nation for preach long pipol wea story long Armenian, Chinese, English, French, German, Hindi, Korean, Mixe, Persian, Russian, and Zapotec languis. Hem sei: “Mi luksavve hem barava important for iusim disfala buk long ministry. Disfala buk helpem mi for kasem heart bilong pipol nomata mi no savve story long languis bilong olketa.”
From pipol travel long staka difren ples and stap long olketa difren kantri, iumi garem staka chance for preach long pipol wea story long difren languis. Iumi savve storyim message abaotem Kingdom taem iumi iusim datfala buk Gud Nius for Pipol Bilong Evri Nation. Waswe, iu evritaem tekem disfala buk long basket bilong iu?
[Piksa long page 32]
Raúl holem buk wea helpem hem kasem heart bilong pipol