Kasem Gud Samting From King wea Spirit Bilong God Leadim!
“Spirit bilong Jehovah bae stap long hem.”—ISA. 11:2.
1. Wanem nao samfala pipol talem abaotem olketa problem long world?
LONG 2006, wanfala savveman, Stephen Hawking, hem sei: “Olketa gavman and wei bilong pipol barava olobaot distaem, and pipol spoelem earth tu. So waswe, olketa man savve gohed for stap laef long earth for nara 100 year moa?” Wanfala article long New Statesman magasin sei: “Iumi nating finisim wei for poor or mekem full world garem peace. Bat barava difren samting nao iumi duim. Hem no minim iumi no trae for duim eni samting. Iumi traem olketa difren kaen gavman. Iumi traem olketa gavman wea barava kontrolem selen bilong kantri and olketa gavman wea no duim datwan. Iumi traem League of Nations for stopem war and iumi traem tu wei for hipimap staka nuclear bomb for mekem nara kantri no faetem iumi. Iumi faet long staka ‘war for finisim war’ for pruvim iumi savve mekem peace kamap.”
2. Wanem nao Jehovah klosap for duim for showimaot hem nomoa fit for rul?
2 Iumi wea worshipim Jehovah no sapraes long wanem pipol hia talem. Bible sei iumi olketa man no fit for rulim iumiseleva. (Jer. 10:23) Jehovah nomoa fit for rulim evri samting. Hem nomoa garem raet for markem olketa standard for iumi followim, wanem iumi shud duim long laef, and for leadim iumi. Klosap nao Jehovah bae finisim evri gavman bilong man. Hem bae finisim tu evriwan wea no laek for stap anda long rul bilong hem wea hapi nomoa for pipol gohed sin, no perfect, and stap anda long “god bilong disfala world,” Satan.—2 Cor. 4:4.
3. Wanem nao Isaiah talem abaotem Messiah?
3 Long niu world, Jehovah bae iusim Messiah Kingdom for mekem pipol kasem gud samting from rul bilong hem. (Dan. 7:13, 14) Isaiah profesi olsem abaotem King wea bae rul long datfala Kingdom: “Wanfala niu branch bae grow from rut bilong Jesse, and from rut bilong hem wanfala sut bae garem staka frut. And spirit bilong Jehovah bae stap long hem. Dastawe hem bae wise, minim samting, garem gudfala tingting, strong, garem bigfala savve, and barava respectim Jehovah.” (Isa. 11:1, 2) Jesus Christ nao “branch wea grow from rut bilong Jesse.” Long olketa wanem wei nao holy spirit mekem Jesus fit for rulim olketa man? Wanem nao olketa gud samting wea iumi bae kasem taem Jesus rul? And wanem nao iumi mas duim for kasem datwan?
God Mekem Jesus Fit for Rul
4-6. Wanem savve nao Jesus garem wea mekem hem fit for kamap King, Hae Priest, and Judge wea wise and tingim pipol?
4 Jehovah laekem olketa man for kamap perfect anda long rul bilong wanfala King, Hae Priest, and Judge wea wise and tingim pipol. Dastawe God chusim Jesus Christ and givim holy spirit long hem for mekem hem fit for duim olketa important waka hia. Tingim samfala reason wea showimaot Jesus bae duim datfala waka long perfect wei.
5 Jesus barava savve gud long God. Spesol Son savve long Dadi long heven winim eni narawan bikos hem stap witim hem for staka million year. Long datfala taem, Jesus lanem staka samting abaotem Jehovah dastawe Bible sei hem “olsem God wea no eniwan savve lukim.” (Col. 1:15) Jesus sei tu: “Man wea lukim mi hem lukim Dadi tu.”—John 14:9.
6 Jesus barava savve long evri samting long heven and long earth, and olketa man tu. Colossians 1:16, 17 sei: “God iusim hem [Son bilong God] for wakem evri nara samting long heven and long earth. Hem wakem olketa samting wea iumi lukim and olketa samting wea iumi no savve lukim . . . And tu, hem stap firstaem long evri samting and God iusim hem for wakem evri samting.” Tingim datwan! Jesus hem “nambawan wakaman” bilong God wea helpem hem for wakem evri nara samting. Dastawe hem savve gud long evri samting long universe and brain bilong iumi tu. Tru tumas, Christ hem barava wise!—Prov. 8:12, 22, 30, 31.
7, 8. Hao nao holy spirit helpem Jesus long ministry?
7 God iusim holy spirit for chusim Jesus. Jesus sei: “Jehovah givim mi spirit bilong hem bikos hem chusim mi for talemaot gud nius long pipol wea poor. Hem sendem mi for talem olketa slave bae olketa kamap free and for talem pipol wea blind bae olketa lukluk moa. Hem sendem mi for mekem pipol wea olketa narawan spoelem olketa for kamap free. Hem sendem mi tu for talem olketa abaotem taem wea olketa savve kasem blessing bilong Jehovah moa.” (Luke 4:18, 19) Luk olsem taem Jesus baptaes and kamap Messiah, holy spirit mekem hem for tingim moa olketa samting wea hem lanem long heven, wea wanfala samting nao hem wanem God laekem hem for duim taem hem duim ministry.—Readim Isaiah 42:1; Luke 3:21, 22; John 12:50.
8 From Jesus kasem holy spirit and hem perfect, hem nao nambawan man wea stap long earth and nambawan Teacher tu. Pipol wea lisin long hem “barava sapraes nao long hao hem teach.” (Matt. 7:28) Jesus storyim wanem nao mekem pipol kasem sin, no perfect, and why pipol no savve gud long God. And hem luksavve long wei and tingting bilong pipol, and hem duim samting for helpem olketa.—Matt. 9:4; John 1:47.
9. Why nao iumi savve Jesus hem fit for rulim iumi?
9 Jesus stap long earth. Jesus fit for rul olsem King bikos hem stap long earth and savve gud long wei bilong pipol wea no perfect. Aposol Paul sei: “[Jesus] mas olsem ‘olketa brata’ bilong hem long evri samting. Hem duim diswan mekem hem wanfala hae priest wea sorre and kaen long pipol and wea faithful taem hem duim waka bilong God. Hem duim diswan mekem hem savve givim wanfala sakrifaes for sin bilong pipol, mekem olketa savve fren bak witim God. From hem safa taem hem kasem test, hem savve helpem olketa wea kasem test tu.” (Heb. 2:17, 18) From Jesus “kasem test,” hem minim feeling bilong olketa wea kasem datwan tu. Taem Jesus duim ministry, hem showimaot hem tingim pipol. Pipol wea safa, sik, kripol, and olketa smol pikinini no fraet for kam long Jesus. (Mark 5:22-24, 38-42; 10:14-16) Olketa wea hambol and wea laek lane abaotem God kam long hem tu. Bat pipol wea praod, bighed, and “no lovem God” olketa les long Jesus, heitim hem, and againstim hem.—John 5:40-42; 11:47-53.
10. Wanem nambawan samting nao Jesus duim wea showimaot hem lovem iumi?
10 Jesus dae for iumi. From Jesus willing for dae for iumi, datwan barava pruvim hem fit for rulim iumi winim eni nara man. (Readim Psalm 40:6-10.) Jesus sei: “Man wea barava showimaot bigfala love nao hem man wea willing for dae for olketa fren bilong hem.” (John 15:13) Jesus no olsem olketa man wea rul wea laek kasem staka samting from pipol wea olketa rulim, bat hem givim laef bilong hem for olketa man.—Matt. 20:28.
Jesus Bae Mekem Iumi Kasem Gud Samting From Dae Bilong Hem
11. Why nao iumi savve Jesus bae mekem iumi kasem gud samting from dae bilong hem?
11 From Jesus hem Hae Priest, hem nao bae mekem iumi kasem olketa gud samting from dae bilong hem! Tru tumas, olketa samting wea Jesus duim long ministry showimaot wanem hem bae duim taem hem rul for 1,000 year, and sapos iumi faithful iumi bae kasem olketa gud samting hia. Jesus healim olketa wea sik and kripol, mekem olketa wea dae for laef bak, feedim staka pipol, and kontrolem wind and sea. (Matt. 8:26; 14:14-21; Luke 7:14, 15) Hem no duim olketa samting hia for showimaot hem garem paoa, bat bikos hem lovem pipol and tingim olketa. Taem wanfala man wea garem leprosy askem Jesus for mekem hem gud bak, Jesus sei long hem: “Mi barava laek for duim datwan.” (Mark 1:40, 41) Jesus bae duim sem samting tu long full world taem hem rul for 1,000 year.
12. Long wanem wei nao profesi long Isaiah 11:9 bae kamap tru?
12 Christ and olketa wea bae rul witim hem bae gohed for teachim pipol abaotem God insaed long 1,000 year. Long datfala taem, profesi long Isaiah 11:9 bae kamap tru. Hem sei: “Olsem sea hem fulap long wata, evriwan long earth bae savve long Jehovah.” Pipol bae lanem hao for lukaftarem earth and olketa animal olsem God talem Adam for duim bifor. Long end bilong 1,000 year, plan bilong God wea Genesis 1:28 storyim bae kamap tru, and iumi evriwan bae kasem gud samting from dae bilong Jesus.
Jesus Kasem Paoa for Judgem Pipol
13. Wanem nao Jesus duim wea showimaot hem tinghae long stret samting?
13 “God hem markem [Christ] for judgem olketa wea laef and olketa wea dae finis.” (Acts 10:42) Hem barava strongim iumi for savve Jesus evritaem duim stret samting, and wei wea hem raeteous and faithful hem olsem wanfala belt raonem bele bilong hem! (Isa. 11:5) Hem heitim wei for greedy, laea tumas, and olketa nara nogud samting. Hem tok strong tu long olketa wea nating tingim pipol wea safa. (Matt. 23:1-8, 25-28; Mark 3:5) No eniwan savve laea long Jesus ‘bikos hem savve finis long wei bilong olketa.’—John 2:25.
14. Wanem nao Jesus duim distaem wea showimaot hem raeteous and duim stret samting? Olketa wanem kwestin nao iumi shud tingim?
14 Jesus gohed for showimaot hem raeteous and duim stret samting taem hem leadim disfala preaching and teaching waka wea iumi duim long world. No eni man, gavman, or demon savve stopem disfala waka. Waka hia bae gohed go kasem taem wea God markem. Dastawe taem Armageddon hem finis, iumi savve Jesus judgem olketa man long stretfala wei. (Readim Isaiah 11:4; Matthew 16:27.) Tingim diswan: ‘Taem mi duim ministry, waswe, mi ting long pipol olsem Jesus tingim olketa? Waswe, mi duim best bilong mi for Jehovah nomata mi sik or living mekem mi no fit for duim staka samting?’
15. Wanem nao savve helpem iumi for duim best bilong iumi for God?
15 Sapos iumi evritaem tingim preaching waka hem waka bilong God, datwan bae helpem iumi for worshipim hem witim full heart and strong bilong iumi. God nao talem iumi for duim datfala waka and Son bilong hem nao leadim. God givim holy spirit tu for strongim olketa wea duim datfala waka. Waswe, iu tinghae long privilege wea iu garem for waka witim God and Son bilong hem wea holy spirit leadim? Winim 7 million pipol nao duim preaching waka long 236 kantri and staka long olketa “no skul gud.” Jehovah nao strongim olketa for duim datwan!—Acts 4:13.
Christ Bae Mekem Iu Kasem Gud Samting!
16. Wanem nao Genesis 22:18 showimaot?
16 Jehovah talem Abraham: “From iu obeyim mi, bae mi mekem pipol long evri kantri kasem gud samting from pikinini bilong iu.” (Gen. 22:18) Disfala scripture showimaot olketa wea tinghae long privilege for waka witim God and Son bilong hem bae kasem olketa gud samting taem Messiah, datfala Pikinini, hem rul. Olketa busy for duim datfala waka and tingim evritaem olketa blessing hia.
17, 18. Wanem nao Jehovah promisim long Deuteronomy 28:2, and wanem nao datwan minim for iumi?
17 God sei olsem long nation bilong Israel wea kam from laen bilong Abraham: “Sapos iu lisin long God bilong iu Jehovah, bae iu kasem olketa gud samting hia [wea Law storyim].” (Deut. 28:2) Diswan hem fitim pipol bilong God distaem tu. Sapos iu laek kasem gud samting from Jehovah, iu mas “lisin” long hem. Then “bae iu kasem” olketa gud samting from hem. Bat wanem nao hem minim for “lisin” long Jehovah?
18 Hem minim for tinghae long wanem God talem long Bible and spiritual kaikai wea hem provaedem. (Matt. 24:45) Hem minim tu for obeyim God and Son bilong hem. Jesus sei: “No evriwan wea sei long mi, ‘Lord, Lord,’ bae go insaed long kingdom bilong God bat man wea duim wanem Dadi bilong mi long heven laekem nao, bae go insaed.” (Matt. 7:21) Man wea lisin long God hem willing tu for stap anda long arrangement wea God markem, wea hem nao Christian kongregeson and ‘olketa man wea God givim olsem present,’ olketa elder.—Eph. 4:8.
19. Wanem nao iumi savve duim for kasem blessing from God?
19 Samfala long ‘olketa man wea God givim olsem present’ hem olketa member bilong Governing Body wea stand for Christian kongregeson. (Acts 15:2, 6) Long bigfala trabol, God bae judgem iumi tu followim hao iumi ting long olketa brata bilong Christ. (Matt. 25:34-40) So wanfala samting wea iumi savve duim for kasem blessing from God, hem for sapotim olketa anointed Christian and faithful long olketa.
20. (a) Wanem nao main waka bilong ‘olketa man wea God givim olsem present’? (b) Wanem nao iumi savve duim for showimaot iumi tinghae long olketa brata hia?
20 ‘Olketa man wea God givim olsem present’ hem olketa member bilong olketa Branch Komiti, olketa traveling overseer, and olketa elder long kongregeson tu. Holy spirit nao markem olketa hia. (Acts 20:28) Main waka bilong olketa brata hia hem for strongim pipol bilong God. “Bae hem olsem go kasem taem iumi evriwan wan mind long faith and long hao iumi minim tru samting abaotem Son bilong God. Bae hem olsem tu go kasem taem iumi kamap barava mature, wea diswan mekem iumi olsem Christ long evri wei.” (Eph. 4:13) Hem tru, olketa hia no perfect, bat iumi bae kasem gud samting sapos iumi tinghae long wanem olketa duim for iumi and obeyim olketa.—Heb. 13:7, 17.
21. Why nao hem important tumas for iumi obeyim Son bilong God?
21 Klosap nao Christ bae finisim world bilong Satan. Long datfala taem, Jesus bae judgem iumi for laef or for dae bikos God markem hem for leadim “bigfala crowd” long “springwata wea mekem man laef olowe.” (Rev. 7:9, 16, 17) So iumi mas duim best bilong iumi for stap anda and tinghae long King wea Jehovah markem wea holy spirit leadim.
Wanem Nao Iu Lanem From . . .
• Acts 10:42?
[Piksa long page 17]
Jesus showimaot hem tingim pipol taem hem mekem dota bilong Jairus laef bak
[Piksa long page 18]
Jesus Christ leadim preaching waka wea gohed long world