“Mi Disable Bat Long Future Bae Mi Gud Moa!”
Story bilong Sara van der Monde
Evritaem pipol savve sei mi garem naesfala smile. Olketa askem mi why nao mi hapi olowe. Mi talem olketa mi garem nambawan hope. Mi savve sei long olketa: “Mi disable bat long future bae mi gud moa!”
MI BORN long 1974 long Paris, France. Hem no isi taem mami bornem mi, and gogo olketa doctor faendem mi garem sik cerebral palsy. Mi no savve muvim gud hand and leg bilong mi, and taem mi toktok pipol no minim wanem mi talem. Mi garem tu datfala sik epilepsy and from body bilong mi hem wiki hem isi for mi kasem olketa nara sik.
Taem mi 2 year, famili bilong mi muv go long Melbourne, Australia. Bihaen tufala year, dadi lusim mitufala mami and datwan mekem mi for fren witim God. Mami hem wanfala Jehovah’s Witness, so hem evritaem tekem mi long olketa meeting. Mi luksavve God lovem and tingim mi. Mami tu lovem and encouragem mi and datwan helpem mi for no wari.
Mami lanem mi tu hao for prea. Mi faendem hem isi for mi prea winim wei for story. Taem mi prea mi tingim nomoa wanem for talem. Nomata pipol no minim wanem mi talem, Jehovah minim mi taem mi prea kwaet or trae for story long hem.—Ps. 65:2.
Mi No Givap Nomata Mi Kasem Problem
Taem mi 5 year, sik bilong mi worse moa. From mi no savve wakabaot gud, olketa taengem olketa iron stik long leg bilong mi for helpem mi wakabaot. Mi sekseke taem mi wakabaot! Taem mi 11 year, mi no savve wakabaot nao. Gogo mi no savve getap seleva from bed. Mi mas iusim wanfala electric samting for liftim mi and putim mi long electric wheelchair.
Samfala taem mi feel nogud from mi sik. Bat mami evritaem sei long mi for no warim samting wea mi no savve duim bat tingim nomoa samting wea mi fit for duim. Datwan barava encouragem mi. Nomata mi disable, mi savve raedem horse, go long sailing boat, padolem kanu, go camping, and draevem car tu long ples wea no eni traffic! Mi savve tu hao for paintim piksa, sewim kaleko, and for wakem olketa samting long clay.
From mi disable, samfala sei mi no fit for disaedem olketa important samting olsem for worshipim Jehovah. Taem mi 18 year, wanfala teacher long skul encouragem mi for lusim haos mekem mi no joinim religion bilong mami. Teacher sei hem bae faendem ples for mi stap tu. Bat mi talem hem bae mi gohed for worshipim Jehovah and taem mi fit for stap seleva then bae mi lusim haos.
No longtaem bihaen teacher talem datwan, mi baptaes for kamap wanfala Jehovah’s Witness. Tufala year bihaen, mi muv long wanfala smol haos. Mi hapi bikos mi fit for stap seleva and olketa narawan helpem mi.
Wanfala Man Askem Mi for Marit
Long olketa year wea go pas, mi kasem olketa nara samting wea testim faith bilong mi. Wanday mi seke taem wanfala skul fren wea disable tu askem mi for maritim hem. Mi hapi samwan interest long mi. Mi tu laek for marit. Bat nomata mitufala evriwan disable, datwan no minim mitufala bae hapi. Datfala man no worshipim Jehovah. Mitufala garem difren religion and goal. Wanem hem interest long hem, hem difren from wanem mi laekem. So mi luksavve sapos mitufala marit, hard for mitufala stap gud and hapi! Mi disaed for obeyim wanem God talem for maritim nomoa man wea hem disaepol bilong Christ. (1 Cor. 7:39) So mi talem datfala man long kaenfala wei bae mi no maritim hem.
Mi savve mi disaedem stret samting. And mi savve bae mi hapi taem mi stap long niu world wea God promisim. (Ps. 145:16; 2 Pet. 3:13) So mi disaed for gohed faithful long Jehovah and hapi nomata mi disable.
Mi luk forward long day wea mi bae no iusim moa wheelchair bilong mi. Bae mi ranran and singaot olsem, “mi disable bat distaem mi gud nao!”