WASWE, IU SAVVE FINIS?

Waswe, olketa wakem bak temple long Jerusalem bihaen hem distroe long 70 C.E.?

JESUS talem profesi temple bilong Jehovah bae distroe. Diswan hem happen taem Titus hem leadim kam army bilong Rome and distroem Jerusalem long 70 C.E. (Matt. 24:2) Bihaen, King bilong Rome, Julian, hem plan for wakem bak datfala temple.

Julian nao hem lastfala king bilong Rome wea hem wanfala heathen. Hem nephew bilong Constantine the Great and olketa teacher bilong hem pipol wea sei olketa Christian. Bat taem hem kamap king long 361 C.E., hem rejectim teaching bilong olketa. Olketa history buk sei Julian hem wanfala apostate bikos hem rejectim church.

Julian heitim pipol wea sei olketa Christian. Maet wanfala reason hem bikos taem hem six year nomoa, pipol wea sei olketa Christian killim dae dadi bilong hem and olketa nara relative tu. Olketa man wea raetem history bilong church sei Julian encouragem olketa Jew for wakem bak temple bilong olketa. Hem tingse sapos hem duim olsem, datwan bae pruvim Jesus hem laea profet.a

Julian plan for wakem bak datfala temple. Bat no eni pruv stap wea showimaot hem startim datfala waka. And sapos hem startim, no eniwan savve why nao hem no finisim datwan. Bat samting wea iumi savve nao, hem no king for tufala year nomoa taem olketa killim hem dae, and no eniwan wakem bak datfala temple kam kasem distaem.