Mi Kasem Staka Blessing From Mi Obeyim Jehovah

HEM nao memory abaotem dadi bilong mi from taem mi smol yet. Hem hambol man and hem waka hard. Hem man wea duim stret samting and hem feel nogud taem hem lukim samting wea no stret, so taem hem herem message from Bible long 1953, hem barava laekem datwan. Start long datfala taem, hem traem best for teachim mifala olketa pikinini samting wea hem lanem. Firstaem mami bilong mi no laek lusim Catholic Church, bat gogo hem tu start for worshipim Jehovah.

Hem no isi for parents bilong mi for study witim mifala bikos mami hem no savve read gud and dadi hem waka hard full day long planteison. Samfala taem from hem taed fogud, hem sleep taem mifala gohed study. Nomata olsem, gud samting kamaot from hard waka bilong hem. Mi nao firstborn, so mi help for teachim sista bilong mi and tufala brata bilong mi. Mi evritaem storyim sem samting wea dadi storyim abaotem hao Noah lovem famili bilong hem and datwan showaot long wei wea hem obeyim God. Mi barava laekem tumas datfala story long Bible! Gogo mifala evriwan attendim olketa meeting long Kingdom Hall long Roseto degli Abruzzi, wanfala taon saed long Adriatic Sea, long Italy.

Long 1955, taem mi 11 year nomoa, mitufala mami katkros long olketa maunten for attendim firstfala convention bilong mifala long Rome. Start long datfala taem, mi ting long olketa convention olsem barava spesol samting long laef bilong olketa tru Christian.

Long year bihaen, mi baptaes and no longtaem bihaen mi pioneer. Taem mi 17 year, mi go spesol pioneer long Latina, wea hem 56 kilometer from Rome and samting olsem 300 kilometer from hom bilong mi. Datfala taon hem niu lelebet, and pipol no warim tumas tingting bilong olketa neiba. So hem isi for mi and pioneer partner bilong mi for offerim staka Bible pablikeson. Mi enjoyim assignment bilong mi, bat from mi young nomoa mi misstim famili bilong mi. Nomata olsem, mi laek for obey and gohed long assignment bilong mi.

Bihaen, mi kasem assignment for go long Milan for help redyim olketa samting for datfala 1963 “Everlasting Good News” International Assembly. Long taem bilong convention, mi duim volunteer waka witim staka nara brata and sista. Wanfala hem Paolo Piccioli, wanfala young brata from Florence. Long mek-tu day bilong convention, hem givim barava naesfala tok abaotem wei for stap singol. Long tingting bilong mi datfala brata hem no laek for marit. Nomata olsem, mitufala start raet long each other and luksavve mitufala garem olketa sem goal, lovem Jehovah, and laekem tumas for obeyim hem. Long 1965, mitufala Paolo marit nao.

STORY WITIM OLKETA BIGMAN BILONG RELIGION

Mi regular pioneer long Florence for tenfala year. Mitufala hapi for lukim olketa kongregeson kamap big, and olketa young wan gohed gud long truth. Mitufala Paolo hapi for spendem taem witim olketa for storyim olketa spiritual samting and for duim hapitaem tugeta. Paolo hem laekem tumas for plei soccer witim olketa. Mi hapi for spendem taem witim hasband bilong mi, bat mi luksavve tu wei wea hem interest and spendem taem witim olketa young wan and olketa famili long kongregeson barava helpem olketa and datwan hem samting wea olketa needim.

Taem mi tingim staka pipol wea mifala studyim Bible witim olketa, datwan mekem mi hapi. Wanfala hem Adriana wea storyim wanem hem lanem long tufala famili. Olketa hia arrange for meet witim wanfala priest for storyim Trinity and teaching wea sei soul no savve dae. Thrifala bigman bilong church kam long datfala meeting. Taem olketa explainim olketa teaching hia hem no mek sense and hem hard for minim tu. Olketa Bible study bilong mifala luksavve long datwan taem olketa comparem samting wea olketa bigman hia talem witim olketa klia teaching long Bible. Datfala meeting helpem olketa Bible study bilong mifala for luksavve long truth. Gogo, samting olsem 15-fala from olketa famili hia kamap Witness.

Distaem, wei wea iumi duim preaching waka hem difren. Long datfala taem, Paolo hem savve tumas for story witim olketa priest and hem duim datwan plande taem. Mi tingim yet wantaem wea hem story witim samfala priest and pipol wea no Witness stap long there tu. Hem klia olketa wea againstim mifala plan for samfala long audience askem olketa kwestin wea olketa tingse bae trikim mifala. Bat datwan hem no happen olsem wanem olketa planim. Wanfala long olketa askem sapos hem stret for olketa long church join insaed long politik, olsem olketa duim for plande handred year finis. Taem olketa priest herem datfala kwestin, olketa no wei nao. Seknomoa paoa hem off, so datfala meeting hem finis nao. Plande year bihaen, mifala faendaot olketa priest nao plan for offem paoa sapos story no go followim tingting bilong olketa.

DUIM DIFREN KAEN FULL-TAEM SERVICE

Bihaen mitufala Paolo marit for tenfala year, mifala kasem invitation for duim circuit waka. Paolo garem gudfala waka, so hem no isi for mifala disaedem wanem for duim. Bat bihaen mifala ting raonem and prea abaotem datwan, mifala acceptim datfala niu assignment. Mifala hapi for spendem taem witim olketa famili wea mifala stap long haos bilong olketa. Long evening mifala evriwan savve study tugeta, then Paolo helpem olketa pikinini for duim homwak bilong olketa, especially sapos datwan hem maths homwak. And tu, Paolo hem man wea interest tumas for read and hem laekem tumas for storyim olketa samting wea hem read abaotem wea interesting and savve encouragem narawan. Plande taem long Monday, mifala go for preach long olketa taon wea no eni Witness stap, and mifala invaetem pipol for kam herem tok long evening.

Mifala duim circuit waka for tufala year nomoa, then mifala kasem invitation for waka long Bethel long Rome. Paolo help for lukaftarem olketa samting saed long law for Bethel, and mi waka long Magasin Department. Hem tek taem for mifala getius long Bethel, bat mifala laek for obey. Mifala hapi for lukim branch office isisi kamap moa big and staka moa pipol kam insaed long truth long Italy. Long datfala taem, gavman bilong Italy appruvim Olketa Jehovah’s Witness olsem wanfala religion. Mifala barava hapi for waka long Bethel.

Taem mifala waka long Bethel, big story kamap long Italy abaotem wei wea iumi no acceptim blood transfusion. Long olketa year bihaen 1980, staka pipol story abaotem wanfala kot case wea kamap. Olketa laea and sei gele bilong wanfala dadi and mami wea Witness hem dae bikos tufala stopem olketa doctor for no givim hem blood transfusion. Bat really datfala pikinini dae bikos hem garem bigfala sik long blood wea staka pipol long Mediterranean area olketa born witim. Olketa brata and sista long Bethel helpem olketa lawyer wea defendim datfala dadi and mami. Olketa pablisim wanfala pepa and spesol Awake! magasin for helpem pipol savve really samting wea happen, and for minim wanem Bible talem abaotem blood. Plande taem nao Paolo waka for 16 hour evriday and hem no rest. Mi traem best for sapotim hem.

LAEF HEM CHANGE MOA

Bihaen mitufala marit for 20 year finis, wanfala big samting happen long laef bilong mitufala. Mi 41 year and Paolo hem 49 year taem mi talem hem mi tingse mi babule. Long datfala day, hem raetem disfala toktok long diary bilong hem: “Mi mas prea olsem: Sapos diswan hem tru, helpem mitufala gohed long full-taem service, no slakdaon long spiritual wei, and for kamap gudfala dadi and mami. Winim eni nara samting, helpem mi for traem best for followim wanem mi storyim long olketa tok insaed 30 year wea go pas finis.” Luk olsem Jehovah herem prea bilong hem, and prea bilong mi tu.

Taem Ilaria hem born, laef bilong mifala barava change. Samfala taem mifala feel wikdaon olsem Proverbs 24:10 storyim. Hem sei: “Waswe, iu feel wikdaon taem iu kasem trabol? Bae iu no strong nao.” Nomata olsem, mitufala sapotim each other from mitufala luksavve hem important for encouragem narawan.

Ilaria hem sei hem hapi from dadi and mami bilong hem busy long full-taem service taem hem born. No enitaem hem feel olsem mifala no provaedem wanem hem needim, and mifala garem normal famili laef. Evriday mi nao lukaftarem hem. Long evening, taem Paolo kam bak long haos, plande taem hem garem waka for duim yet. Nomata olsem, hem plei witim Ilaria and helpem hem witim homwak bilong hem. Hem duim olsem nomata samfala taem hem mas waka go kasem tu or thri klok long morning. Plande taem Ilaria sei: “Dadi nao best fren bilong mi.”

For helpem Ilaria for gohed duim samting wea stret, mitufala mas putim olketa rul and followim evritaem. Mi tingim wanfala taem wea hem plei witim fren bilong hem, bat hem no kaen long hem. Mifala explainim from Bible why hem mas no olsem. Then mifala talem hem for sei sorre long fren bilong hem, and mifala mas herem taem hem talem datwan.

Ilaria sei hem tinghae long wei wea parents bilong hem strong for duim ministry. From distaem hem big finis and hem marit, hem minim gud why hem important for obeyim Jehovah and followim wanem hem talem.

GOHED FOR OBEY NOMATA TAEM MI SORRE

Long 2008, Paolo hem kasem cancer. Paolo barava encouragem mi, and firstaem hem luk olsem bae hem winim datfala sik. Mifala lukaotem best treatment, and tu, mitufala and Ilaria barava prea strong long Jehovah for helpem mifala deal witim eni samting wea maet happen. Nomata olsem, mi lukim Paolo wea strongfala man hem isisi kamap wik. Hem barava hard samting taem Paolo dae long 2010. Nomata olsem, mi kasem comfort taem mi tingim wanem mitufala duim insaed 45 year wea mitufala marit. Mitufala duim best bilong mifala for Jehovah. Mi savve waka wea mifala duim hem barava helpem pipol for kasem gud samting for olowe. And mi barava luk forward long taem wea Paolo bae laef bak, olsem Jesus talem long John 5:28, 29.

Kasem distaem mi still laekem tumas story bilong Noah olsem taem mi smol gele. Mi laekem tumas for gohed obeyim Jehovah long evri samting wea hem askem. Mi sure eni samting wea iumi mas sakrifaesim, or eni hard samting wea iumi mas deal witim, hem smol samting nomoa taem iumi comparem witim olketa nambawan blessing wea God givim long iumi. Mi lukim diswan finis long laef bilong mi, and mi nating sorre long hao mi iusim laef bilong mi.