Olketa Elder, Waswe, Bae Iufala Strongim “Man wea Taed”?

Angela,a hem wanfala singol sista wea winim 30 year. Olketa elder bae kam visitim hem and hem fraet lelebet. Wanem nao bae olketa talem long hem? Hem tru, Angela missim tu-thri meeting, bat hem savve taed fogud bihaen hem waka full day long nursing hom for lukaftarem olketa olo. Hem wari tu abaotem health bilong mami bilong hem.

Sapos iu nao wanfala elder wea bae visitim Angela, hao nao bae iu encouragem hem? Wanem nao bae iu duim firstaem bifor iu visitim disfala sista wea “taed”?—Jer. 31:25.

TING RAONEM HELP WEA BRATA OR SISTA NEEDIM

Samfala taem iumi evriwan savve taed bikos long waka bilong iumi for selen or olketa Christian responsibility bilong iumi. Olsem example, taem profet Daniel lukim wanfala vision wea hem no savve minim, hem “feel taed tumas.” (Dan. 8:27) Wanem nao helpem hem? God sendem angel Gabriel for minim datwan long Daniel and for talem hem Jehovah herem olketa prea bilong hem. Datfala angel sei tu Jehovah still ting long hem olsem “wanfala barava spesol man.” (Dan. 9:21-23) Long narataem tu, nara angel kam long Daniel and talem gudfala toktok for encouragem hem.—Dan. 10:19.

Iu savve duim sem samting taem iu visitim samwan long kongregeson wea taed or wikdaon. Bifor iu visitim hem, ting raonem wanem kaen help nao hem needim. Hem kasem olketa wanem kaen problem? Waswe, olketa problem hia nao mekem hem wikdaon? Wanem nao olketa gudfala wei bilong hem? Richard, wea elder for winim 20 year, hem sei bifor hem visitim wanfala brata hem no tingim olketa wik point bilong hem, bat hem laek for tingim nomoa olketa gudfala wei bilong hem. Hem ting raonem tu wanem kaen help nao datfala brata hem needim. Datwan helpem hem for luksavve long best wei for encouragem hem. Sapos iu and nara elder plan for visitim samwan, hem gud for iutufala story tugeta firstaem abaotem best wei for encouragem datfala brata or sista.

MEKEM OLKETA FEEL FREE FOR STORY

Samfala brata savve shame for storyim feeling bilong olketa long wanfala elder. So wanem nao iu savve duim for mekem brata bilong iu feel free for story? Wei for smile and talem gudfala toktok taem iu arrive savve helpem hem. Taem Michael, wea elder for winim 40 year finis hem visitim olketa brata, plande taem hem savve sei: “Iu savve, wanfala barava naes privilege bilong mifala olketa elder nao hem for visitim olketa brata long haos bilong olketa for savve gud long olketa. So mi barava luk forward for visitim iu tuday.”

Maet iu disaed for prea firstaem bifor iufala start for story. Taem iu prea, iu savve storyim olketa gudfala wei bilong datfala brata, olsem faith and love bilong hem, and wei wea hem no givap. Datwan nao samting wea aposol Paul duim taem hem prea for olketa brata bilong hem. (1 Thess. 1:2, 3) Taem iu prea olsem witim brata bilong iu, iu redyim heart bilong iutufala evriwan for story gud tugeta, and datwan bae encouragem iufala. Prea bilong iu savve comfortim datfala brata tu. Ray, wea hem elder for staka year finis hem sei: “Samfala taem iumi evriwan savve forgetim olketa gudfala samting wea iumi duim. So taem samwan story abaotem datwan, hem strongim iumi.”

IUSIM BIBLE FOR ENCOURAGEM NARAWAN

Wanfala wei wea iu savve “storyim samting for helpem,” or encouragem brata bilong iu, hem for iusim Bible, nomata iu storyim wanfala scripture nomoa. (Rome 1:11) Olsem example, maet wanfala brata wea sorre hem feel iusles. Maet iutufala savve read abaotem man wea raetem psalm wea sei hem feel olsem wanfala “botol wea olketa wakem from skin bilong animal bat wea stap insaed smoke.” Nomata hem feel olsem, hem sei: “Mi no forgetim olketa law bilong iu.” (Ps. 119:83, 176) Bihaen iu explainim datfala scripture, iu savve talem hem iu sure hem tu “no forgetim” olketa law bilong God.

Hao nao iu savve iusim Bible for encouragem wanfala sista wea inactive or no strong olsem bifor? Maet datfala tokpiksa abaotem woman wea lusim wanfala drachma coin encouragem hem. (Luke 15:8-10) Maet datfala coin hem part bilong wanfala spesol nekles wea olketa wakem from olketa silver coin. Taem iu storyim datfala tokpiksa witim sista hia, maet iu savve helpem hem for luksavve hem important member bilong Christian kongregeson. Then maet iu savve helpem hem for luksavve hem wanfala sheepsheep bilong Jehovah wea hem barava lovem.

Staka taem olketa brata and sista hapi for story abaotem olketa scripture wea olketa readim. So letem olketa for story tu, nogud iu nomoa story! Bihaen iu readim wanfala scripture, iu savve chusim wanfala word or toktok insaed datfala scripture and askem hem for talem tingting bilong hem abaotem datwan. Olsem example, bihaen iu readim 2 Corinth 4:16, iu savve askem hem: “Waswe, enitaem iu luksavve wei wea Jehovah mekem iu ‘kamap strong moa?’” Kaen kwestin olsem savve encouragem iutufala evriwan.—Rome 1:12.

Iu savve encouragem tu brata bilong iu taem iu story abaotem samwan long Bible wea kasem sem samting olsem hem. Samwan wea feel sorre bae minim feeling bilong Hannah or Epaphroditus. Nomata tufala hia feel sorre samfala taem, God hem gohed tinghae long tufala. (1 Sam. 1:9-11, 20; Phil. 2:25-30) Staka nara gudfala example stap long Bible tu wea iu savve storyim.

GOHED SHOWIMAOT INTEREST LONG OLKETA

Bihaen iu visitim brata bilong iu, gohed showimaot iu interest long hem. (Acts 15:36) Olsem example, bihaen iufala story finis, maet hem gud for mekem arrangement for duim preaching waka tugeta. Bernard hem elder for staka year finis. Hem sei taem hem meetim wanfala brata or sista wea hem visitim no longtaem go nomoa, hem savve ask olsem: “Hao nao evri samting gohed distaem?” Taem iu showimaot interest olsem, datwan bae helpem iu for luksavve sapos iu savve duim eni samting moa for helpem datfala brata.

From laef hem barava no isi distaem, olketa brata and sista barava need for savve iu interest long olketa, minim olketa, and lovem olketa. (1 Thess. 5:11) So bifor iu visitim brata bilong iu, ting raonem wanem kaen help nao hem needim. Prea abaotem datwan. Chusim gud olketa scripture wea iu bae iusim. Then bae iu savve talem olketa gudfala toktok for strongim “man wea taed”!