HISTORY BILONG IUMI
Wanfala Old Movie wea Strongim Faith
“Hem barava luk olsem Brata Russell nao standap long there!”—Toktok bilong man wea lukim “Photo-Drama” long 1914.
DISWAN hem mek-100 year bihaen olketa showim “Photo-Drama of Creation” for firstfala taem. Hem wanfala movie wea olketa wakem for helpem pipol bilivim Bible hem kam from God. “Photo-Drama” mekhae long teaching wea sei Jehovah nao wakem evri samting, bikos long datfala taem, teaching bilong evolution, and wei for tok againstim and daotem Bible hem spoelem faith bilong staka pipol.
Charles Russell, wea leadim waka bilong olketa Bible Student long datfala taem, hem evritaem lukaotem best wei for kwiktaem helpem pipol savve long olketa tru teaching insaed Bible. For winim thirti year finis, olketa Bible Student iusim olketa pablikeson for helpem pipol savve long truth. Then olketa luksavve maet wei for showim movie hem wanfala niu wei for duim diswan.
IUSIM MOVIE FOR TALEMAOT GOSPEL
Long olketa year bilong 1890, pipol start for wakem olketa movie wea no garem saond. Long 1903, wanfala church long New York City showim wanfala lotu movie. So long 1912 taem Russell start for wakem datfala “Photo-Drama,” wei for wakem movie hem niu samting nomoa. Hem luksavve disfala wei for teach savve helpem staka pipol for savve long olketa tru teaching insaed Bible long wei wea olketa pablikeson seleva no savve duim.
Disfala “Photo-Drama” hem eit-hour movie, wea divaed long fofala part. Hem garem 96 shortfala Bible tok wea brata Russell hem redyim, and wanfala man wea staka pipol heresavve long voice bilong hem nao readim olketa tok hia. Olketa man pleim music and toktok wea olketa recordim finis long semtaem wea olketa showim olketa piksa and short movie abaotem olketa story long Bible.
“Hem storyim taem wea God wakem olketa star go kasem taem wea Christ hem rul for wan thousand year.”—Francis Barnes, wea hem 14 year long 1914
Staka long olketa glass slide and short movie hia olketa peim from olketa movie company. Olketa artist long Philadelphia, New York, Paris, and London paintim piksa long olketa glass slide and film hia. Olketa long Art Department long Bethel tu waka long olketa team for duim diswan, and olketa paintim olketa niu slide for changem olketa slide wea brek. Olketa long Bethel act insaed olketa smol movie abaotem Abraham, Isaac, and angel wea stopem Abraham for sakrifaesim son bilong hem. Olketa duim diswan long Yonkers, New York, wea hem klosap long Bethel.—Gen. 22:9-12.
Olketa wea kasem training savve tumas for pleim 26 record long semtaem wea olketa showim samting olsem 500 glass slide, and movie film wea long bilong hem samting olsem 3 kilometer
Wanfala man wea waka witim Brata Russell talem olketa niusman disfala movie bae “mekem staka thousand pipol interest long Bible, winim eni nara samting wea olketa religion duim bifor.” Waswe, olketa bigman bilong church praisem disfala niu wei for givim spiritual kaikai long pipol? Nomoa nao. Staka long olketa tok spoelem datfala “Photo-Drama,” and samfala duim enikaen nogud samting for stopem pipol for no lukim datfala movie. Long wanfala ples, samfala bigman hia katem paoa mekem olketa brata no savve showim datfala movie.
Olketa sista long kongregeson givimaot staka million free program wea garem olketa piksa from “Photo-Drama”
Olketa givimaot “Pax” (peace) badge wea garem piksa bilong Jesus taem hem boy. Diswan hem for remindim olketa for “garem peace witim God”
Nomata olsem, olketa bigfala building fulap long pipol wea kam for lukim “Photo-Drama,” and hem free nomoa. Long United States, evriday olketa brata showim “Photo-Drama” long samting olsem 80-fala taon. Staka pipol sapraes tumas bikos hem firstaem for olketa lukim movie wea garem saond. Olketa brata iusim spesol wei for tek piksa wea showim baby kokorako wea isisi kamaot from shell bilong hem, and flaoa wea isisi open. Olketa niu samting long science long datfala taem mekhae long nambawan wisdom bilong Jehovah. Wanfala man wea lukim Brata Russell insaed “Photo-Drama” hem sei “hem barava luk olsem Brata Russell nao standap long there!”
NIU SAMTING FOR TEACHIM BIBLE LONG PIPOL
Firstfala taem for olketa showim “Photo-Drama” hem long January 11, 1914, long New York City, long disfala building wea International Bible Students Association ownim long datfala taem
Tim Dirks, wea hem man for storyim olketa old movie sei “Photo-Drama” hem “firstfala big movie wea garem film, olketa slide and toktok wea join witim olketa piksa wea man savve herem and lukim long semtaem.” Olketa pipol wea wakem movie bifor “Photo-Drama” iusim samfala long olketa teknik hia, bat no iusim evri teknik hia insaed wanfala movie nomoa. And tu, staka pipol nao lukim “Photo-Drama” winim eni nara movie long datfala taem. Long firstfala year wea olketa showim datwan nomoa, winim naen million pipol nao lukim long North America, Europe, Australia, and New Zealand!
Firstfala taem for olketa showim “Photo-Drama” hem long January 11, 1914, long New York City. Sevenfala month bihaen, World War I hem start nao. Bat evriwea long world staka pipol hipap for lukim “Photo-Drama,” and kasem comfort from olketa naesfala piksa wea showim olketa blessing wea olketa man bae kasem from Kingdom bilong God. For wakem wanfala movie olsem long datfala taem, hem barava spesol and pipol barava sapraes!
Long North America olketa iusim 20-fala set bilong datfala “Photo-Drama”