Laet Bilong Truth Kasem Japan

LONG September 6, 1926, wanfala pilgrim (traveling overseer) long America go bak long hom bilong hem long Japan for duim missionary waka. Long datfala taem, wanfala man long Japan nomoa garem subscription for The Watch Tower, and hem startim wanfala Bible study grup long Kobe. Man hia nao go for meetim datfala pilgrim taem hem arrive. Long January 2, 1927, olketa Bible Student long Japan holem firstfala assembly long Kobe. Long datfala assembly, 36-fala pipol nao kam, and 8-fala nao baptaes. Datwan hem barava gud, bat hao nao disfala smol grup bae helpem 60 million pipol long Japan for savve long laet bilong truth wea stap insaed Bible?

Long May 1927, samfala Bible student waka hard for invaetem pipol for kam long samfala Bible tok. Firstfala tok kamap long Osaka, so olketa brata wakem samfala saen board wea storyim datwan and putim long saed road long olketa difren ples long datfala taon, and tu, olketa sendem 3,000 invitation pepa go long olketa bigman long there. Olketa givimaot 150,000 invitation pepa, and olketa printim invitation hia long olketa main niuspepa long Osaka and long 400,000 train ticket. Long day wea datfala tok kamap, olketa iusim tufala aeroplane for flae ovarem Osaka, and dropim 100,000 invitation pepa long there. Samting olsem 2,300 pipol nao kam insaed Osaka Asahi Hall for herem tok wea garem title “The Kingdom of God Is at Hand.” Bat samting olsem wan thousand pipol moa no savve kam insaed bikos datfala hall hem barava full. Bihaen long tok, winim 600 pipol nao stap bihaen for askem eni kwestin wea olketa garem. Long olketa month bihaen, olketa brata givim olketa nara Bible tok long Kyoto and samfala nara taon long west Japan.

Long October 1927, olketa Bible Student invaetem pipol for kam herem thrifala tok long Tokyo. Olketa invaetem tu samfala bigman, olsem prime minister, olketa member long parliament, and olketa bigman long religion and long army. Olketa putim ap olketa saen, olketa printim olketa invitation long niuspepa, and givimaot 710,000 invitation pepa. Samting olsem 4,800 pipol nao attendim thrifala tok hia.

OLKETA COLPORTEUR

Olketa colporteur (pioneer) duim big waka for preachim message abaotem Kingdom long haos tu haos. Jizo Ishi and waef bilong hem Matsue Ishi, wea hem wanfala long olketa first colporteur long Japan, tufala go preach long staka ples long Japan. Samfala ples wea tufala go preach hem long Sapporo, Sendai, Tokyo, Yokohama, Nagoya, Osaka, Kyoto, Okayama, and Tokushima. Sista Ishii and Sakiko Tanaka, wanfala olo sista, go preach long samfala bigman bilong gavman. Tufala mas werem kimono, wea hem spesol kaleko bilong olketa long Japan, taem tufala duim datwan. Wanfala bigman hia askem tufala for tekem kam 300 The Harp of God buk and 300 Deliverance buk for olketa putim long olketa library long prison.

Katsuo and Hagino Miura tekem samfala buk from Sista Ishii and taem tufala readim, tufala luksavve olketa buk hia storyim truth. Tufala baptaes long 1931 and kamap colporteur tu. Haruichi and Tane Yamada, and staka relative bilong tufala acceptim truth long olketa year bifor 1930. Brata and sista Yamada kamap colporteur, and dota bilong tufala, Yukiko, hem go waka long Bethel long Tokyo.

OLKETA “BIG JEHU” AND “SMOL JEHU”

Long datfala taem, olketa trak expensive tumas, and olketa road tu barava nogud. So Kazumi Minoura and olketa nara young colporteur iusim olketa haos trak wea no garem eni engine for duim preaching waka. Olketa savve kolem olketa haos trak hia ‘olketa Jehu’ bikos olketa olsem chariot wea Jehu raedem, wea hem wanfala king long Israel bifor. (2 Ki. 10:15, 16) Olketa garem thrifala Big Jehu wea 2.2 meter long, 1.9 meter waed, and 1.9 meter hae, and 6-fala pioneer nao savve sleep insaed. And tu, Japan branch wakem 11-fala Smol Jehu, wea baesikol savve pullim, and tufala man savve sleep insaed. Kiichi Iwasaki, wea help for wakem olketa Jehu hia sei: “Evri Jehu garem wanfala tent and wanfala battery bilong car for olketa laet bilong hem.” Olketa colporteur pullim and pushim olketa Jehu hia long evri ples long Japan. Olketa go ap long olketa maunten and akrosim olketa valley for helpem pipol kasem laet bilong truth.

Ikumatsu Ota, wanfala colporteur sei: “Taem mifala kasem eni taon, mifala putim Jehu bilong mifala saed long wanfala river, or long wanfala field. Olketa first wan wea mifala visitim nao hem olketa bigman bilong taon, olsem mayor. Bihaen datwan nao mifala visitim pipol long haos bilong olketa for offerim Bible literature. Bihaen mifala preach long datfala taon, mifala go long next taon.”

Long 1927, taem olketa Bible Student long Kobe holem firstfala assembly bilong olketa, 36 pipol nomoa kam. (Zech. 4:10) Faevfala year bihaen, long 1932, total namba bilong olketa colporteur and pablisa long Japan hem 103, and olketa givimaot winim 14,000 buk long datfala year. Distaem, staka brata and sista long Japan duim pablik witnessing long olketa bigfala taon, and klosap 220,000 pablisa long there helpem pipol for kasem laet bilong truth.—From branch office long Japan.