Gohed Strong for Preach
1 Iumi distaem stap insaed olketa hard taem. Olketa samting olsem war wea kamap insaed wanfala kantri, ethnic tension, olketa disaster, and plande nara sorre samting, hem kamap normal samting nomoa. Distaem, pipol barava needim gud nius winim enitaem bifor. Bat staka pipol nating interest long olketa spiritual samting. Long plande ples, pipol no stap long haos taem iumi go for preach and staka taem pipol no willing for lisin long iumi or no interest for studyim Bible. Nomata olsem, hem barava important for iumi gohed strong for preachim gud nius abaotem Kingdom bilong God wea start for rul finis.—Matt. 24:14.
2 Love for Pipol: Waka bilong iumi for preach hem barava showimaot hao Jehovah lovem pipol. “Hem no laekem eniwan for dae bat hem laekem evriwan for repent.” (2 Pet. 3:9; Ezek. 33:11) Dastawe, Jesus talem komand bilong God for ‘mas preachim gud nius fastaem long evri nation.’ (Mark 13:10) God laekem pipol for fren gud witim hem and no dae taem hem distroem world bilong Satan. (Joel 2:28, 29, 32; Zeph. 2:2, 3) Iumi hapi Jehovah hem givim iumi chance olsem, iaman?—1 Tim. 1:12, 13.
3 Report abaotem waka bilong iumi evriwea long world long 2004 service year, hem showimaot hao samting olsem 6,085,387 Bible study nao kamap evri month, and samting olsem 5,000 niu disaepol baptaes evri week! Samfala long olketa niu wan hia kasem truth from Jehovah blessim hard waka bilong olketa pablisa wea gohed strong for story long evriwan insaed territory bilong olketa. Olketa kongregeson kasem bigfala hapi from diswan, and tu, hem nambawan privilege for waka witim God for sevem pipol!—1 Cor. 3:5, 6, 9.
4 Praisem Nem Bilong God: Iumi gohed strong for preach bikos iumi laek for praisem Jehovah and mekem evri man luksavve hao nem bilong hem holy. (Heb. 13:15) Satan giamanim “olketa man long earth.” Hem mekem olketa for tingse God no garem paoa for stretem olketa problem bilong man, hem no interest for helpem olketa man wea safa, or hao no eni God stap. (Rev. 12:9) Taem iumi preach, iumi defendim truth abaotem nambawan Dadi bilong iumi long heven. So, iumi mas gohed for praisem nem bilong hem, distaem and for olowe.—Ps. 145:1, 2.