Duim Gud Samting and Sharem Samting Witim Olketa Narawan
1 Dorcas “duim plande gudfala samting for narawan and givim samting for helpem olketa wea garem need.” (Acts 9:36, 39) From hem garem disfala fasin for give, pipol wea savve long hem and Jehovah tu, barava tinghae long hem. Hebrews 13:16 hem sei: “No forget for duim gudfala samting and sharem samting witim pipol, from God hem hapi tumas long sakrifaes olsem.” Hao nao iumi distaem savve duim gud samting and sharem samting witim narawan?
2 Iumi savve helpem narawan taem iumi sharem olketa “material samting” wea iumi garem. (Prov. 3:9) Selen wea iumi givim for waka bilong Jehovah evriwea long world hem helpem olketa brata for wakem olketa Kingdom Hall, Assembly Hall, and branch office long plande kantri. Taem iumi give olsem, hem helpem plande pipol for kasem gud samting from theocratic teaching, and tu, from wei for kaban witim olketa brata and sista.
3 Sharem Comfort: Taem wanfala disaster happen, pipol bilong Jehovah redi for “duim gud samting” for olketa brata bilong olketa, and tu, for olketa wea no garem sem religion olsem olketa. (Gal. 6:10) Bihaen wanfala factory for wakem chemical hem bosta long France, wanfala hasband and waef wea stap klosap long datfala factory sei: “Olketa Christian brata bilong mifala kwiktaem kam for help. Olketa klinim ples wea mitufala stap, and tu, ples bilong nara pipol wea stap insaed disfala building. Pipol wea stap klosap long mifala sapraes for lukim hao staka nao kam for help.” Nara sista hem sei: “Olketa elder kam for helpem mifala. Olketa encouragem mifala. Tru tumas, diswan nao samting mifala needim winim help saed long material samting.”
4 Plande wei for duim gud samting for pipol hem stap, bat samting wea bae barava helpem olketa nao, hem datfala savve abaotem truth. Part long datfala savve hem datfala “hope for laef olowe” wea Jehovah hem promisim. (Titus 1:1, 2) Message bilong Bible savve givim trufala comfort for olketa wea sorre from olketa samting wea happen long world and wea sorre from wei wea olketa sin. (Matt. 5:4) Iumi mas duim gud samting and sharem samting witim olketa narawan long taem wea iumi fit for duim.—Prov. 3:27.