Famili Schedule—Olketa Kongregeson Meeting
1 Sapos iu wanfala Christian dadi or mami, iu laekem olketa pikinini bilong iu for kamap pipol wea lovem and servem Jehovah, and gogo olketa bae kasem laef olowe insaed niu world wea God promisim. Hao nao iu savve helpem olketa for mekem main samting long laef bilong olketa, hem for worshipim Jehovah? Wanfala barava important wei hem thru long example bilong iu. (Prov. 20:7) Wanfala sista tingim example bilong mami bilong hem, wea hem wanfala Witness and hem sei: “Mifala nating miss for attendim olketa meeting.” Diswan barava affectim hem long bigfala wei.
2 Waswe, famili bilong iu minim why iumi garem olketa kongregeson meeting? Instruction wea iumi kasem long olketa meeting strongim iumi for gohed for duim will bilong God. Wei for kaban witim olketa brata savve barava encouragem iumi. (Isa. 54:13; Rom. 1:11, 12) Bat, main reason for olketa meeting hem for praisem Jehovah “midolwan long staka pipol wea hipap tugeta.” (Ps. 26:12) Olketa Christian meeting givim iumi chance for showimaot love for Jehovah and for worshipim hem.
3 “Gohed for Luk Aot Gud”: Taem iumi tingim hao olketa meeting hem part bilong holy arrangement bilong God, diswan bae muvim iumi for “gohed for luk aot gud” mekem iumi no isisi garem fasin for no attendim olketa meeting, from iumi busy for duim olketa nara samting wea no important olsem olketa meeting. (Eph. 5:15, 16; Heb. 10:24, 25) Taem iu mekem wanfala famili schedule, maet iu start witim wei for markem olketa taem bilong olketa kongregeson meeting. Then mek sure for no letem olketa nara samting stopem iufala for attendim olketa meeting. For attendim meeting hem shud barava important samting for famili bilong iu.
4 Taem iumi read abaotem olketa brata bilong iumi wea winim enikaen samting wea stopem olketa for attendim olketa meeting and assembly, diswan savve barava encouragem iumi. Nomata living bilong iu no olsem, maet iu tu kasem samfala hard samting. Satan hem mekem hem barava hard for pipol bilong God for worshipim Jehovah. Nomata olsem, iu savve sure hao olketa pikinini lukim wei wea iufala disaed strong for attendim olketa kongregeson meeting. Tru nao, taem iu duim olsem, iu givim olketa wanfala spiritual present wea olketa bae hard for forgetim.