Famili Schedule—Famili Field Service
1 Jehovah hapi for lukim olketa young wan praisem nem bilong hem. (Ps. 148:12, 13) Taem Jesus stap long earth, nomata olketa ‘baby and smol pikinini tu praisem’ God. (Matt. 21:15, 16) Distaem tu hem olsem. Olketa dadi and mami, hao nao iu savve helpem olketa pikinini kamap pipol wea strong for praisem Jehovah long Christian ministry? Olsem iumi mekhae long hem finis insaed article abaotem olketa kongregeson meeting, important samting hem example bilong iu. Wanfala dadi storyim samting wea evri dadi and mami savve abaotem, taem hem sei: “Olketa pikinini no duim samting wea iu talem bat olketa duim samting wea iu duim!”
2 Wanfala sista wea garem parents wea worshipim God hem sei: “Mifala no wekap long Saturday morning and ask sapos bae mifala go long ministry or nomoa. Mifala savve finis mifala bae go.” Long sem wei tu, iu savve muvim olketa pikinini for luksavve hao waka for preach hem important, taem iu markem taem evri week for famili share long field service. Diswan savve mekem olketa pikinini lane taem olketa luk followim iu, and tu, hem helpem iu for lukim wei wea olketa ting long ministry, fasin bilong olketa, and hao nao olketa iusim savve bilong olketa for story long ministry.
3 Isisi Trainim Olketa: For olketa pikinini enjoyim ministry, olketa need for prepare fastaem mekem olketa preach long gudfala wei. Sista wea iumi storyim fastaem hem sei tu: “Mifala no gogo nomoa witim dadi and mami long waka bilong tufala. Mifala savve mifala insaed disfala waka tu nomata hem for noknok long door or givim tract. Wei for prepare gud fastaem bifor mifala go preach helpem mifala for savve long wanem for storyim.” Iu savve trainim olketa pikinini bilong iu olsem taem iu iusim tu-thri minute evri week for redim olketa for ministry, maet long taem bilong famili study or long narataem.
4 Taem famili preach tugeta diswan givim iu chance for putim truth insaed olketa pikinini. Wanfala Christian dadi savve tekem gele bilong hem taem hem wakabaot 10 kilometer go and kam bak for givimaot tract long pipol wea stap long next valley. Gele hia ting go bak witim hapi and sei olsem: “Long taem mitufala wakabaot nao dadi putim truth insaed heart bilong mi.” (Deut. 6:7) Iu tu bae kasem blessing olsem sapos field service stap long famili schedule bilong iu evri week.