Olketa Idea for Startim Story Long Does God Really Care About Us?
Bihaen iu story abaotem wanfala sorre samting wea happen, maet iu sei:
“Bible sei God hem really kea for iumi olketa man, so waswe, enitaem iu ting abaotem why nao God letem olketa man for safa? [Letem hem ansa.] Disfala brochure givim gudfala ansa for datfala kwestin and showim wanem God bae klosap nao for duim. [Showim piksa long page 27, and readim toktok bilong Psalm 145:16 wea stap long paragraf 22.] Hao nao God bae aotem evri wei for safa wea kasem man? Mi laek for kam bak and iumi storyim moa datfala kwestin.” Offerim brochure, and arrangem taem for go bak.
Taem iu duim return visit, maet iu sei:
“Last taem wea iumi story, iumi readim disfala scripture. [Readim or talem toktok bilong Psalm 145:16.] Then mi askem disfala kwestin: Hao nao God bae aotem evri wei for safa wea kasem man?” Askem hem for go tekem brochure bilong hem. Then openem long page 27-8, and storyim paragraf 23-5. Askem hem sapos hem laekem for iu studyim Bible witim hem, or arrange for go bak for storyim paragraf 26-7.
Wanfala young pablisa maet sei:
“Staka wea sem age witim mi wari abaotem olketa kaen nogud samting wea bae gohed insaed long next 10 or 15 year. Long tingting bilong iu, laef bae waswe long datfala taem? [Letem hem ansa.] Olketa problem wea iumi lukim distaem hem showimaot iumi stap long olketa last day. [Readim 2 Timothy 3:1-3.] Disfala brochure hem garem ansa for olketa kwestin hia. [Readim olketa kwestin long kava, and askem man sapos hem laek for readim brochure.] Taem mi kam bak, sapos iu garem lelebet taem, mi laek for storyim hao wei for olo and sik bae finis.” Arrangem taem for go bak.
Taem iu go bak, maet iu sei:
“Taem iumi story last taem, mi talem hao mi laek story long iu abaotem hao wei for olo and sik bae finis. Iumi savve lukim datwan long hia.” Askem hem for go tekem brochure bilong hem. Then readim and storyim paragraf 6-7 long page 23-4 long brochure. Arrangem taem for go bak and storyim paragraf 8-9.
Taem pablisa waka witim wanfala pikinini, maet hem introducem tufala and sei:
“Sapos hem olraet witim iu, ________ laek for readim wanfala scripture for iu. [Pikinini readim Psalm 37:29 and talem short toktok.] Disfala brochure storyim hao God bae duim wanem hem plan for duim for olketa man and earth. [Showim olketa piksa long page 24-7.] Taem mifala kam bak moa, bae mi showim iu nambawan promis long Bible abaotem resurrection.” Askem hem sapos hem laek readim brochure, and arrangem taem for go bak.
Long datfala return visit, maet pablisa hem sei:
“Taem mifala visitim iu last taem, iumi readim Psalm 37:29 and mi talem hao mi laek for showim iu samting wea Bible talem abaotem resurrection. Lukim wanem hem sei long hia.” Askem hem for tekem kam brochure bilong hem. Then storyim paragraf 12-14 long page 24-5 long brochure. Askem hem sapos hem laek for studyim Bible, or arrangem taem for go bak and storyim paragraf 15-16.