Hao for Offerim Wanem Bible Teachim Buk
Plande difren idea for offerim Wanem Bible Teachim buk hem stap insaed long disfala insert. For barava muvim man, talem olketa idea hia long toktok bilong iuseleva, changem story for fitim pipol long territory bilong iu, and savve gud long olketa point insaed long buk wea iu iusim for story abaotem Bible. Iu savve iusim tu eni nara idea wea fitim territory bilong iu.—Lukim January 2005 Kingdom Ministry Bilong Iumi, p. 8.
Armageddon
◼ “Taem pipol herem disfala word ‘Armageddon,’ plande tingim wanfala barava nogud samting wea bae finisim evriwan long earth. Waswe, bae iu sapraes for lanem hao Armageddon hem samting wea iumi savve luk forward long hem? [Letem hem ansa. Then readim Revelation 16:14, 16.] Mi laek readim disfala toktok long iu abaotem living bilong pipol bihaen long Armageddon.” Openem buk long page 82-4, and readim paragraf 21.
Bible
◼ “Plande taem pipol talem hao Bible hem Word bilong God. Waswe, enitaem iu tingim why iumi fit for sei disfala buk wea olketa man nomoa raetem hem Word bilong God? [Letem hem ansa. Then readim 2 Peter 1:21 and paragraf 5 long page 19-20.] Disfala buk hem ansarem olketa kwestin hia from Bible.” Showim olketa kwestin long page 6.
◼ “Distaem, staka information stap wea pipol savve lukluk long hem. Bat long tingting bilong iu, wea nao iumi savve faendem nambawan advaes wea savve helpem iumi for hapi and garem gudfala laef? [Letem hem ansa. Then readim 2 Timothy 3:16, 17 and paragraf 12 long page 23.] Disfala buk hem explainim wanem iumi savve duim for mekem God hapi and wea helpem iumi.” Showim box and piksa long page 122-3.
Dae and Resurrection
◼ “Plande pipol laek for savve wanem nao bae happen long olketa taem olketa dae. Long tingting bilong iu, waswe, hem fitim for iumi savve abaotem diswan? [Letem hem ansa. Then readim Ecclesiastes 9:5 and paragraf 5-6 long page 58-9.] Saed long promis long Bible abaotem resurrection, disfala buk bae explainim wanem nao datwan.” Showim piksa long page 75.
◼ “Taem famili member or fren bilong iumi dae, iumi laekem tumas for lukim hem moa. Waswe, iu agree? [Letem hem ansa.] Plande pipol kasem comfort long promis insaed Bible abaotem resurrection. [Readim John 5:28, 29 and paragraf 16-17 long page 72.] Disfala chapter hem ansarem tu olketa kwestin wea iumi storyim.” Showim olketa kwestin wea stap long start bilong chapter 7 long page 66.
Laef Olowe
◼ “Plande pipol laekem tumas for garem gudfala health and for laef longtaem. Sapos chance hem stap, waswe, bae iu laek for laef olowe? [Letem hem ansa. Then readim Revelation 21:3, 4 and paragraf 17 long page 54.] Disfala buk hem storyim wanem iumi need for duim for kasem laef olowe, and tu, living bilong pipol taem datfala promis hem kamap tru.”
Famili
◼ “Iumi evriwan laekem famili for stap hapi. Waswe, iu agree? [Letem hem ansa.] Bible hem storyim samting wea evriwan insaed famili savve duim for mekem famili hapi—hem nao for showimaot love olsem God.” Readim Ephesians 5:1, 2 and paragraf 4 long page 135.
Ples for Stap
◼ “Long plande kantri, hem no isi for faendem gudfala haos wea no kostim staka selen for stap insaed. Long tingting bilong iu, waswe, enitaem long future evriwan bae garem naesfala haos for stap insaed? [Letem hem ansa. Then readim Isaiah 65:21, 22 and paragraf 20 long page 34.] Disfala buk hem explainim hao disfala promis from God bae kamap tru.”
Jehovah God
◼ “Plande pipol wea biliv long God laek for barava fren gud witim hem. Waswe, iu savve hao God laekem iumi for fren gud witim hem? [Letem hem ansa. Then readim James 4:8a and paragraf 20 long page 16.] Disfala buk hem for helpem pipol lanem moa samting abaotem God, long wei for iusim Bible bilong olketa seleva.” Showim olketa kwestin wea stap long start bilong chapter 1 long page 8.
◼ “Plande pipol prea for narawan ting long nem bilong God olsem hem holy. Waswe, enitaem iu ting raonem wanem nao nem bilong God? [Letem hem ansa. Then readim Psalm 83:18 and paragraf 2-3 long page 195.] Disfala buk hem explainim really samting wea Bible teachim abaotem Jehovah God and plan bilong hem for olketa man.”
Jesus Christ
◼ “Staka pipol raonem earth savve long story abaotem Jesus Christ. Samfala sei hem wanfala barava spesol man nomoa. Olketa narawan worshipim hem olsem Olmaeti God. Long tingting bilong iu, waswe, samting wea iumi bilivim abaotem Jesus Christ hem important?” Letem hem ansa. Then readim John 17:3 and paragraf 3 long page 37-8. Showim hem olketa kwestin anda long title bilong datfala chapter.
Prea
◼ “Waswe, enitaem iu tingim hao nao God savve ansarem olketa prea bilong iumi? [Letem hem ansa. Then readim 1 John 5:14, 15 and paragraf 16-18 long page 170-2.] Disfala chapter hem explainim tu why iumi shud prea long God and wanem iumi mas duim for mekem hem herem olketa prea bilong iumi.”
Religion
◼ “Plande pipol distaem tingim olketa religion long world no savve stretem olketa problem bilong man, bat olketa nao kosim olketa problem. Long tingting bilong iu, waswe, religion hem leadim pipol long stretfala wei? [Letem hem ansa. Then readim Matthew 7:13, 14 and paragraf 5 long page 146.] Disfala chapter hem storyim sixfala samting wea helpem iumi luksavve long worship wea God hem hapi long hem.” Showim list long page 147.
Taem Nogud Samting Happen and Wei for Safa
◼ “Taem nogud samting hem happen, plande pipol daotem sapos God hem really kea for pipol and tingim wei wea olketa safa. Waswe, enitaem iu tingim datwan? [Letem hem ansa. Then readim 1 Peter 5:7 and paragraf 11 long page 11-12.] Disfala buk hem explainim wei wea God bae finisim evri wei for safa wea kasem olketa man.” Showim olketa kwestin long start bilong chapter 11 long page 106.
War and Peace
◼ “Pipol evriwea barava laekem olketa man for stap gud tugeta. Waswe, iu tingse diswan hem wanfala dream nomoa? [Letem hem ansa. Then readim Psalm 46:8, 9.] Disfala buk hem storyim hao God bae fulfillim plan bilong hem and mekem evriwan long earth stap gud tugeta.” Showim piksa long page 35, and storyim paragraf 17-21 long page 33-4.
[Box long page 7]
Olketa Wei for Talem Donation Arrangement
“Sapos iu laek for givim lelebet donation distaem for waka wea mifala duim raonem full world, bae mi hapi tumas for acceptim datwan.”
“Nomata olketa magasin bilong mifala no garem eni price, mifala acceptim olketa donation for waka wea mifala duim raonem full world.”
“Maet iu sapraes abaotem hao nao disfala waka gohed. Olketa donation wea pipol willing for givim nao sapotim waka wea mifala duim raonem full world. Sapos iu laek for givim lelebet donation distaem, bae mi hapi tumas for acceptim datwan.”