Chapter 1
Organized to Do Jehovah’s Will, pages 5-7
EVRIWEA long world, staka thousand organization hem stap. Olketa hia hem olketa organization bilong religion, politik, bisnis, and olketa organization bilong community wea garem olketa difren goal. Nomata hem olketa bigfala organization or nomoa, olketa organize followim tingting and olketa goal bilong olketa man. Bat wanfala organization hem stap wea barava difren from evri organization hia. Word bilong God and staka narafala information wea stap barava showimaot klia hao datfala organization hem Olketa Jehovah’s Witness.
Gud samting nao, from iu wanfala wea dedicate long Jehovah and baptaes finis, distaem iu part long organization bilong Jehovah. From iu pruvim long iuseleva finis wanem nao will bilong God, distaem iu duim datwan. (Ps. 143:10; Rom. 12:2) Iu wanfala servant bilong God wea serve witim wanfala big sekson bilong olketa brata evriwea long world wea garem love. (2 Cor. 6:4; 1 Pet. 2:17; 5:9) Diswan hem wanfala bigfala blessing for iu long disfala taem, olsem Jesus hem promisim. (Prov. 10:22; Mark 10:30) Taem iu gohed faithful for duim will bilong Jehovah, and iu wan mind witim olketa nara faithful servant, iu redi for wanfala barava gudfala future wea no eni samting bae spoelem.—1 Tim. 6:18, 19; 1 John 2:17.
Wei wea Nambawan Creator bilong iumi garem wanfala spesol and nambawan organization evriwea long world wea followim direction bilong hem barava givim gudfala samting long iumi and strongim faith bilong iumi! Diswan minim Jehovah nao rulim disfala organization olsem Hed ovarem evriwan. Iumi garem full trust long hem. Hem nao Judge bilong iumi, Man for givim law, and King bilong olowe. (Isa. 33:22) From hem God wea followim order, hem mekem olketa arrangement for helpem iumi waka tugeta witim hem for fulfillim plan bilong hem.—2 Cor. 6:1, 2.
Taem end bilong disfala world hem barava klosap tumas, iumi gohed for loyal and stap anda long lead bilong Christ Jesus, wea hem Komanda bilong iumi and Messiah King. (Isa. 55:4; Rev. 6:2; 11:15) Jesus nao wan wea talem hao olketa follower bilong hem bae duim olketa waka wea moa big winim ministry waka bilong hem for preach abaotem Kingdom and mekem pipol kamap disaepol taem hem stap long earth. (John 14:12) Datwan bae olsem bikos olketa follower bilong Jesus bae garem territory wea barava moa big, olketa bae preach for longfala taem winim Jesus, and namba bilong olketa bae gohed for kamap staka. Olketa bae talemaot gud nius abaotem Kingdom long evri ples long earth and mekem pipol long evri nation for kamap disaepol.—Matt. 24:14; 28:19, 20; Acts 1:8.
Diswan hem happen finis, olsem olketa Yearbook of Jehovah’s Witnesses gohed for showimaot. Nomata olsem, Jesus talemaot klia hao waka for talemaot gud nius abaotem judgment bilong God bae finis long taem wea Jehovah markem. Olketa profesi toktok insaed Word bilong God showimaot hao bigfala day bilong Jehovah wea mekem man fraet hem klosap nao.—Zeph. 1:14-18; 2:2, 3; 1 Pet. 4:7.
From organization bilong Jehovah luksavve long will bilong hem long disfala taem wea klosap long end, hem barava garem feeling for hariap. Iumi need for waka moa hard for duim olketa samting wea God laekem iumi for duim. Dastawe, hem barava important for iumi savve gud long hao nao organization bilong God duim waka bilong hem and for barava waka tugeta witim datwan. Olketa principle, komandment, law, order, and olketa teaching wea stap long Word bilong God nao disfala organization hem waka followim.—Ps. 19:7-9.
Wei for obeyim and followim olketa direction hia wea kam from Bible, hem mekem pipol bilong Jehovah stap and waka tugeta long peace and wan mind. (Ps. 133:1; Isa. 60:17; Rom. 14:19) Wanem nao strongim wei wea olketa brata evriwea fren gud tugeta? Hem from iumi garem love and from love nao muvim iumi. (John 13:34, 35; Col. 3:14) From disfala wei wea God appruvim, iumi gohed for waka tugeta witim organization bilong Jehovah long heven.