Hapi Olsem “Hapi God” Bilong Iumi, Jehovah
1 Jehovah barava laekem pipol for hapi. Bible mekem iumi barava luk forward long olketa nambawan blessing wea hem bae givim long olketa man. (Isa. 65:21-25) Iumi shud showimaot klia long nara pipol hao iumi hapi for sharem “gud nius bilong datfala hapi God” witim olketa. (1 Tim. 1:11) Wei wea iumi story abaotem Kingdom message shud showimaot iumi lovem truth and barava interest long pipol wea iumi story witim olketa.—Rom. 1:14-16.
2 Hem tru, hem no isi for iumi hapi evritaem. Long samfala territory maet no staka pipol interest long message abaotem Kingdom. Maet samfala taem iumi deal witim olketa hard samting wea kamap long laef bilong iumi. For gohed hapi, iumi shud ting raonem hao hem barava important for pipol long territory bilong iumi for herem and minim gud datfala gud nius abaotem Kingdom wea iumi preachim. (Rom. 10:13, 14, 17) Wei for ting raonem diswan bae helpem iumi for gohed hapi taem iumi storyim olketa samting wea Jehovah duim for sevem pipol.
3 Storyim Olketa Gud Samting wea Bae Kam: Iumi need for tingting gud tu abaotem wanem iumi bae storyim. Nomata maet iumi startim story witim wanfala problem or wanfala nius wea pipol interest long hem, iumi shud no storyim nomoa olketa samting wea mekem pipol wari. Waka bilong iumi hem for storyim “gud nius abaotem samting wea moabeta.” (Isa. 52:7; Rom. 10:15) Disfala gud nius hem wanfala message wea join witim olketa promis bilong God for wanfala hapi future. (2 Pet. 3:13) Tingim datwan taem iu iusim Bible for “bandagem olketa pipol wea feel sorre.” (Isa. 61:1, 2) Diswan bae helpem each wan long iumi for gohed hapi and buildimap narawan.
4 For sure pipol bae luksavve hao iumi hapi taem iumi share long preaching waka. So, iumi laek for showimaot evritaem semkaen fasin olsem “hapi God” bilong iumi, Jehovah, taem iumi sharem gud nius bilong kingdom witim pipol long territory bilong iumi.