Evritaem Attendim Olketa Meeting—Important Samting Long Iumi
1 Olketa Christian famili markem wei for evritaem attendim olketa meeting olsem barava important samting. Bat busy living bilong iumi distaem savve mekem diswan wanfala challenge. Waswe, waka long haos, waka for selen, or skul waka hem start for stealim taem wea iu markem for worshipim Jehovah? Wei for savve long tingting bilong Jehovah abaotem diswan savve helpem iumi for no lusim samting wea moa important.—1 Sam. 24:6; 26:11.
2 Taem wanfala Israelite man hipimap firewood long Sabbath, hem showimaot hem no interest long tingting bilong Jehovah. Maet hem excuse for sei hem duim diswan for provaed for famili bilong hem or hem tingse diswan hem smol samting nomoa. Bat, wei wea Jehovah judgem datfala man showimaot hao wei for aftarem olketa samting bilong evriday living long taem wea iumi markem for worship, hem wanfala serious samting.—Num. 15:32-36.
3 Winim Datfala Challenge: Plande stragol for no letem waka for selen stopem olketa for attendim olketa meeting. Samfala winim disfala challenge long wei for story witim boss bilong olketa, exchangem taem for duim waka long naet witim wakfren bilong olketa, lukaotem difren waka wea fitim, or mekem living bilong olketa moa simpol. For sure, God hem hapi long olketa sakrifaes olsem for saed bilong tru worship.—Heb. 13:16.
4 Skul waka tu savve kamap wanfala challenge. Wanfala young wan hem sei: “Mi duim samfala skul waka bifor mi go long olketa meeting and finisim taem mi kam bak long haos.” Sapos pikinini no savve duim evri hom waka long olketa naet for meeting, samfala parents explainim long olketa teacher hao wei for attendim olketa Christian meeting hem important tumas for famili bilong olketa.
5 For famili attendim olketa meeting tugeta and no leit, hem important for olketa plan gud and waka tugeta for duim olketa waka long haos. (Prov. 20:18) Nomata olketa smol pikinini savve lane for werem kaleko and redi for go long meeting long taem wea famili markem. Thru long example bilong olketa, parents savve strongim long olketa pikinini hao olketa meeting hem important tumas.—Prov. 20:7.
6 Taem olketa hevi bilong disfala world kamap moa big, hem barava important for iumi evritaem attendim olketa kongregeson meeting. Iumi mas gohed for garem sem tingting olsem Jehovah and mek sure wei for evritaem attendim olketa meeting hem barava important samting long iumi.—Heb. 10:24, 25.