Helpem Pipol wea Garem “Fasin Fitim Laef Olowe”
1. Hu nao Jehovah hipimap long taem bilong iumi?
1 Each man garem fasin wea stap deep insaed tokpiksa heart bilong hem. (Matt. 12:35) Bible hem story abaotem man wea “heart bilong hem redi for faet.” (Ps. 55:21) Samfala garem “fasin for kros tumas.” (Prov. 29:22) Bat olketa narawan garem “fasin fitim laef olowe.” (Acts 13:48) Long taem bilong iumi, Jehovah hipimap olketa hia wea garem fasin wea fitim laef olowe. (Hag. 2:7) Hao nao iumi savve helpem olketa for worshipim Jehovah?
2. Wanem nao insaed long wei for fulfillim assignment bilong iumi for mekem pipol kamap disaepol?
2 Duim Olketa Return Visit Long Gudfala Wei: Iumi mas garem stretfala tingting abaotem wei for duim olketa return visit for fulfillim assignment bilong iumi for mekem pipol kamap disaepol. (Matt. 28:19, 20) Waswe, iumi waka hard for kwiktaem go bak for visitim olketa wea interest? Waswe, iumi duim return visit long evriwan wea acceptim literature or wea showimaot interest long gud nius? Waswe, iumi gohed and no givap for helpem olketa grow long spiritual wei? From laef bilong pipol stap long danger, iumi shud trae for mekem grow evri interest wea iumi faendem.
3. Wanem nao iumi shud duim bihaen iumi story witim samwan long ministry?
3 Taem iu still rememberim yet story wea iu talem long man wea interest, iusim lelebet taem for raetem nem and address bilong hem. Raetem topic wea iufala storyim, eni scripture wea iufala readim, and literature wea haosholder tekem. Bihaen datwan, go bak for visitim olketa kwiktaem.
4. Hao nao iumi savve duim olketa gudfala return visit?
4 Hao for Duim Return Visit: Taem iu duim wanfala return visit, hem gud for iu kaen and showimaot iu barava interest long haosholder. Keepim story hem simpol, and iusim Bible. Preparem wanfala interesting Bible topic for storyim, and long end bilong datfala visit, leavim wanfala kwestin wea iu savve ansarem long next visit. Hem wise for no argue abaotem olketa idea wea haosholder talem wea againstim samting wea Bible teachim. Iusim olketa samting wea iutufala evriwan agree long hem for kamap faondeson bilong iu for teachim olketa Bible truth.—Col. 4:6.
5. Wanem hard waka nao wanfala pioneer showimaot, and olketa wanem gud samting nao kamaot from datwan?
5 Hem no isi for duim olketa return visit, bat olketa reward bilong hem mekem man satisfae. Wanfala pioneer long Japan markem goal for duim staka return visit evri month. Hem start for keepim record long evri pipol wea hem meetim long haos-tu-haos waka, and then insaed sevenfala day nomoa, hem duim olketa return visit. Hem preparem gud wanem for talem and duim ministry witim full trust long message wea hem talemaot. Long wanfala return visit, hem fit for startim study witim wanfala man wea sei: “Mi evritaem no savve acceptim iufala. Diswan hem firstaem wea mi lisin.” Gud samting kamaot from loving wei wea datfala pioneer no givap for duim diswan. Long end bilong firstfala month hem reportim tenfala Bible study.
6. Why nao iumi mas gohed for duim olketa return visit?
6 Living bilong pipol hem change evritaem. (1 Cor. 7:31) Maet iumi need for go bak plande taem for faendem datfala man wea interest. Long wei wea iumi trae hard for duim olketa return visit, iumi savve helpem pipol wea garem fasin wea fitim laef olowe for go long road wea lead go long datwan.—Matt. 7:13, 14.