Chapter 5 (Part 6)
Organized to Do Jehovah’s Will, page 42-45
Olketa Overseer for Shepherdim Olketa Sheepsheep
KONGREGESON SERVICE KOMITI
Kongregeson Service Komiti, wea hem nao presiding overseer, secretary, and service overseer, lukaftarem samfala samting insaed long kongregeson. Olketa elder insaed long disfala komiti saenem olketa pepa olsem literature wea stap and order pepa, olketa field service report, and olketa pepa for recommendim or aotem olketa overseer, ministerial servant, and regular pioneer. And tu, service komiti savve mekem disison sapos olketa brata savve iusim Kingdom Hall for olketa marit and funeral, and tu, assignim olketa pablisa for each buk study grup. Service Komiti tu savve appruvim man wea laek auxiliary pioneer and olketa nara full-taem service assignment. Samfala taem, branch office askem Kongregeson Service Komiti for duim olketa nara samting tu. Nomata olketa elder long service komiti lukaftarem samfala samting, olketa brata hia waka anda long lead bilong body of elders.
KONGREGESON BUK STUDY OVERSEER
Wanfala nambawan privilege insaed long kongregeson hem for serve olsem wanfala Kongregeson Buk Study overseer. Olketa overseer hia garem chance for helpem olketa narawan long plande difren wei. From diswan hem wanfala serious responsibility, olketa elder nao shud lukaftarem diswan. Sapos kongregeson no garem inaf elder, maet wanfala elder nao lukaftarem tufala grup, bat long olketa difren taem insaed week. Bat diswan bae depend long living bilong hem. Or maet wanfala ministerial servant wea fit savve lukaftarem wanfala grup go kasem taem wanfala elder savve duim datwan. Ministerial servant wea lukaftarem wanfala Kongregeson Buk Study hem serve olsem Kongregeson Buk Study servant, from hem no wanfala overseer insaed long kongregeson bat hem waka anda long lead bilong olketa elder wea garem disfala responsibility. Olketa elder bae disaedem wanem nao wanfala ministerial servant bae duim. Olketa bae disaedem tu wanem grup nao elder or ministerial servant bae lukaftarem.
Wanfala main responsibility bilong Kongregeson Buk Study overseer hem for conductim Kongregeson Buk Study. For duim datwan, hem mas barava prepare gud. Hem mas savve long olketa ansa for olketa kwestin insaed long pablikeson, and tu, olketa reason for olketa ansa and why datfala information hem important. Hem shud garem goal for helpem olketa insaed long grup for minim gud wanem olketa studyim, mekem olketa savve followim olketa truth olketa lanem long laef bilong olketa and for explainim datwan long olketa narawan. Diswan minim hem mas waka hard, olsem Paul mekhae long datwan long Romans 12:7: “Man wea teach, letem hem gohed for teach.”
Narafala important waka bilong buk study overseer hem for lead long field ministry. Wei wea hem strong for duim preaching waka evritaem bae muvim olketa pablisa for followim example bilong hem. From olketa brata tinghae long encouragement and help wea olketa kasem taem olketa hipap tugeta, buk study overseer mas mekem and followim wanfala schedule for field service wea fitim evriwan insaed long grup. (Luke 10:1-16) Hem mas plan gud for mek sure inaf territory hem stap for duim. Hem bae duim meeting for field service and organizem olketa pablisa saed long field ministry for datfala day. Sapos hem no fit for kam long field service grup, hem shud markem narafala elder, ministerial servant, or wanfala pablisa wea fit for lukaftarem olketa responsibility hia for leadim olketa pablisa.
Service overseer barava helpem buk study overseer and olketa insaed long grup. Wanfala buk study overseer wea wise bae plan gud firstaem for visit bilong service overseer and letem grup bilong hem savve long visit and olketa gud samting wea olketa bae kasem. Taem evriwan long grup savve gud long arrangement, olketa savve barava sapotim datwan and share long bigfala wei moa long field ministry.
Each buk study grup shud smol nomoa. Diswan hem helpem buk study overseer for savve gud long evriwan wea insaed grup bilong hem. From hem wanfala shepherd wea showimaot love, hem interest long man wanwan. Hem trae for helpem and encouragem olketa for share long ministry, for attendim and tekpart long olketa kongregeson meeting, and for duim olketa nara samting wea savve strongim spiritual saed bilong olketa. Hem savve visitim olketa wea sik or feel sorre. Wei wea hem encouragem olketa or givim kaonsel maet muvim samfala for trae for kasem olketa privilege insaed long kongregeson, mekem olketa savve duim moa samting for olketa brata bilong olketa. Nomata buk study overseer hem duim plande waka for olketa insaed grup bilong hem, from hem wanfala elder and shepherd hem bae trae for helpem full kongregeson. Hem lovem and tingim evriwan insaed long kongregeson and hem redi for helpem eniwan wea garem need.—Acts 20:17, 28.
Wanfala responsibility bilong Kongregeson Buk Study overseer hem for help kolektem olketa field service report from olketa pablisa and pioneer insaed buk study grup bilong hem. Then hem givim olketa report hia witim report bilong buk study attendance long secretary. Each pablisa savve helpem buk study overseer long wei for givim field service report kwiktaem. Olketa savve duim diswan long wei for givim olketa report stret long buk study overseer long end bilong month or putim insaed long box olketa markem for field service report long Kingdom Hall.
OLKETA NARA RESPONSIBILITY INSAED LONG ORGANIZATION
Samfala taem, samfala elder kasem appointment for serve long Hospital Liaison Komiti and kamap olketa member bilong Patient Visitation Grup. Olketa man hia visitim olketa hospital and doctor for encouragem olketa for gohed givim olketa difren and niufala treatment wea no iusim blood long Olketa Jehovah’s Witness. Olketa nara overseer serve long olketa Regional Building Komiti, Assembly Hall Komiti, or distrik convention komiti for mekem olketa samting saed long Kingdom kamap moa big. Evriwan insaed long organization bilong Jehovah barava tinghae long hard waka and willing fasin bilong olketa brata hia wea iusim taem and strong bilong olketa long wei olsem. Tru tumas, iumi “tinghae long olketa man olsem.”—Phil. 2:29.