Jehovah Helpem Olketa wea Trustim Hem
1 Staka pipol ting long selen, paoa, and savve wea man garem olsem olketa important samting wea mekem man win. (Ps. 12:4; 33:16, 17; 49:6) Bat for olketa wea fraet long Jehovah and trustim hem, Bible talem disfala promis: ‘Hem bae helpem olketa and kamap olsem shield for olketa.’ (Ps. 115:11) Iumi bae storyim tufala wei wea iumi need for showimaot iumi trustim Jehovah.
2 Olsem Olketa Christian Minister: Taem iumi kasem assignment for teach insaed kongregeson or long field ministry, iumi mas depend long God. Tingim example bilong Jesus. Nomata hem Son bilong God, hem no trustim savve bilong hemseleva or wanem hem savve duim, bat hem depend evribit long Dadi bilong hem long heven. (John 12:49; 14:10) Iumi nao barava need for duim datwan! (Prov. 3:5-7) Samting wea iumi duim savve honorim God and helpem nara pipol only sapos Jehovah blessim iumi.—Ps. 127:1, 2.
3 Iumi showimaot iumi depend long Jehovah taem iumi prea for hem leadim iumi and for holy spirit bilong hem helpem iumi. (Ps. 105:4; Luke 11:13) And tu, iumi showimaot iumi trustim God taem iumi teachim olketa samting wea kam from Word bilong hem, Bible. Message from Bible garem paoa for muvim and changem laef bilong pipol. (Heb. 4:12) Taem iumi “serve long wei for depend long strong wea God givim,” diswan givim glory long Jehovah.—1 Pet. 4:11.
4 Deal Witim Olketa Problem: Iumi needim tu help from Jehovah taem iumi kasem olketa hevi and problem. (Ps. 46:1) Olsem example, boss maet no letem iumi for tekem taem-off for attendim assembly or maet famili bilong iumi kasem hard samting. Iumi showimaot iumi trustim Jehovah long wei for barava prea strong long hem and followim direction wea hem provaedem thru long Word and organization bilong hem. (Ps. 62:8; 119:143, 173) Taem olketa servant bilong Jehovah duim datwan, olketa lukim wei wea hem helpem olketa.—Ps. 37:5; 118:13, 16.
5 Jehovah promisim iumi olsem: “Hapi nao man wea trustim Jehovah, and depend evribit long Hem.” (Jer. 17:7) Iumi laek showimaot iumi trustim hem long evri samting wea iumi duim!—Ps. 146:5.