Chapter 2 (Mek-tu haf)
Organized to Do Jehovah’s Will—Luksavve Long Waka Bilong Christ, page 13-14
WANEM NAO HEM MINIM FOR LUKSAVVE LONG WAKA BILONG CHRIST?
Jesus Christ wea showimaot nambawan example for iumi, hem man wea perfect. Jehovah markem hem for lukaftarem iumi. Jehovah God givim Jesus Christ datfala serious responsibility for kamap Leader and Komanda long pipol bilong Hem distaem. So, wei for luksavve long waka bilong Christ insaed arrangement bilong God hem minim for iumi gohed loyal long Jehovah and for waka tugeta witim organization bilong hem wea gohed for grow.
Olketa follower bilong Jesus long first century barava luksavve long waka bilong Christ long arrangement bilong God. Olketa showimaot diswan long wei for waka tugeta witim wan mind anda long hedship bilong Christ, and olketa followim direction wea olketa kasem from holy spirit and Bible. (Acts 15:12-21; Rev. 1:1) Aposol Paul hem raet olsem abaotem wei wea datfala anointed Christian kongregeson garem wan mind: “Iumi mas talem tru samting and love nao bae muvim iumi for kamap barava mature for join go witim Christ, wea hem nao hed. Bikos from hem nao evri part long body olketa join gud tugeta and waka tugeta thru long evri joint wea givim wanem each wan needim fitim waka bilong each member, mekem body hem grow and buildimap hemseleva long love.”—Eph. 4:15, 16.
Olsem body bilong man, kongregeson bilong olketa anointed wan and “nara sheep” garem plande difren member. Taem each member long kongregeson waka tugeta witim olketa narawan and evriwan waka witim wan mind anda long hedship bilong Christ, kongregeson kamap moa big and datwan mekem iumi garem love for narawan wea datwan nao “perfect wei for keepim wan mind.”—John 10:16; Col. 3:14; 1 Cor. 12:14-26.
Olketa Bible profesi wea fulfill barava pruvim hao Jesus Christ hem kasem paoa for kamap King long Kingdom long 1914. Distaem hem rul midolwan olketa enemy bilong hem. (Ps. 2:1-12; 110:1, 2) Wanem nao datwan minim for olketa wea stap long earth distaem? Jesus bae showimaot paoa bilong hem olsem King bilong olketa king and Lord bilong olketa lord taem hem bringim judgment bilong God againstim olketa enemy bilong hem. (Rev. 11:15; 12:10; 19:16) Klosap nao datfala promis for sevem olketa man, wea Jehovah talemaot taem olketa man bighed for againstim Hem, bae fulfill for olketa wea Jehovah hapi long olketa. (Rom. 16:20) Iumi barava hapi for luksavve long waka bilong Christ long arrangement bilong God and for waka tugeta long wanfala ministry wea gohed evriwea long world anda long lead bilong Christ long olketa last day distaem!