Chapter 3
Organized to Do Jehovah’s Will, page 15-18
Trustim “Datfala Faithful and Wise Slave”
“HU NAO datfala faithful and wise slave?” Jesus Christ askem datfala kwestin for story abaotem wanfala important profesi tokpiksa. Diswan hem part bilong “saen” wea hem talem abaotem ‘taem bilong end bilong disfala world.’ (Matt. 24:3, 42-47) Jesus showim hao datfala “slave” bae barava busy long taem bilong end. “Datfala slave” bae lukaftarem evri samting bilong Kingdom long disfala earth, and disfala important waka for givim spiritual kaikai “long barava taem” long pipol bilong God. Jesus sei olsem abaotem disfala important waka: “Hapi nao datfala slave sapos masta lukim hem duim datwan taem hem kam bak. Tru nao, mi talem iufala, Hem bae markem hem for lukaftarem evri samting bilong hem.”
Samfala important kwestin kamap saed long disfala tokpiksa for iumi ting raonem. Hu nao “datfala slave”? Wanem nao “evri samting” bilong hem? Hao nao iumi wanwan insaed long disfala profesi tokpiksa? Olketa kwestin hia hem no for savve long ansa bilong olketa nomoa. Wei for barava luksavve long olketa samting hia and gohed for trustim “datfala faithful and wise slave” savve helpem iumi for duim will bilong Jehovah.
LUKSAVVE LONG “DATFALA FAITHFUL AND WISE SLAVE”
Long datfala tokpiksa, Jesus talem hao datfala “slave” bae givimaot spiritual kaikai wea iumi needim. Hu nao Jesus markem for feedim olketa wea followim hem long first century? And hu nao hem faendem wea faithful for duim olsem taem hem kam bak for rul insaed Kingdom long 1914? Hem tru, no eni man hem laef long first century go kasem 1914. Dastawe, “datfala faithful wakman, datfala wise wan,” hem mas minim sekson bilong olketa follower bilong Christ wea spirit anointim olketa, wea olketa laef long disfala earth long olketa difren taem. (Luke 12:42) Tru nao, Christ iusim disfala sekson for pablisim information abaotem olketa Bible profesi wea fulfill, and givim direction long hao for followim olketa Bible principle long evriday living. Then olketa savve givimaot disfala spiritual kaikai long evri kongregeson bilong Olketa Jehovah’s Witness.—Isa. 43:10; Gal. 6:16.
So wanem nao “evri samting” bilong hem? Hem evri spiritual samting long earth wea hem bilong Christ, wea join witim paoa wea hem garem olsem King long heven. Insaed diswan hem olketa samting long headquarter bilong Olketa Jehovah’s Witness, olketa branch office, Kingdom Hall, and olketa Assembly Hall evriwea long world. And insaed “evri samting” bilong hem tu, hem disfala waka for preachim “disfala gud nius bilong kingdom” long full earth and for teachim olketa wea acceptim diswan. Datfala “slave” hem sekson wea God iusim for hipimap insaed long kongregeson “wanfala big crowd . . . from evri nation and tribe and pipol and languis,” wea bae stap laef long datfala big trabol. (Luke 12:42-44; Matt. 24:14; Rev. 7:9-14) Tru nao, disfala big crowd barava duim bigfala waka for mek sure disfala waka for preachim gud nius hem kasem evriwea long earth. Olketa hia insaed long “evri samting” bilong Christ wea hem laekem tumas. And tu, disfala slave class barava lovem olketa from olketa loyal and strong for sapotim olketa.
WAKA BILONG GOVERNING BODY
“Datfala faithful and wise slave” waka hard for keepim wan mind and mekem olketa arrangement long organization for “followim stretfala wei and order.” (1 Cor. 14:40) For duim diswan long first century, olketa chusim wanfala sekson bilong olketa Christian wea spirit anointim, wea stand for disfala faithful and wise slave. From olketa stand for faithful and wise slave, diswan mekem olketa no need for askem evri anointed elder long full world bifor olketa mekem disison. Olketa stap long kongregeson long Jerusalem and waka olsem wanfala governing body for full anointed Christian kongregeson.
Start long Pentecost 33 C.E., olketa faithful aposol bilong Lord Jesus Christ leadim wei for helpem Christian kongregeson wea hem just start. (Acts 4:33, 35, 37; 5:18, 29) Long samting olsem 49 C.E., datfala governing body kamap moa big and hem no olketa aposol bilong Jesus nomoa. Taem disison kamaot abaotem wei for circumcise, “olketa aposol and older man long Jerusalem” nao insaed datfala governing body. (Acts 15:1, 2) Hem responsibility bilong olketa for ting raonem olketa samting wea savve affectim olketa Christian evriwea long world. Olketa sendem olketa leta and olketa law wea savve strongim olketa kongregeson, and for mekem olketa disaepol savve garem wan mind and waka tugeta. Olketa kongregeson followim direction bilong governing body, and from diswan, olketa kasem blessing and gohed gud.—Acts 8:1, 14, 15; 15:22-31; 16:4, 5.
Iumi savve lukim nambawan samting from arrangement olsem distaem. Olketa anointed wan wea Governing Body bilong Olketa Jehovah’s Witness distaem insaed, olketa iusim plande year long laef bilong olketa for serve long faithful wei, and garem staka savve long hao organization bilong Jehovah hem waka. Olketa givim direction long pipol bilong Jehovah for spiritual saed bilong olketa, olsem governing body long first century duim. Governing Body hem gohed tu for lukaftarem preachim waka, wakem olketa buk for studyim Bible, and appointim olketa overseer for serve long olketa difren waka insaed long organization. Diswan hem samfala long olketa samting bilong Christ wea Governing Body hem lukaftarem distaem. Olsem olketa Christian bifor, iumi tu hapi for acceptim direction wea kam from Bible from olketa spiritual mature man hia for helpem iumi saed long worship.
Olsem long first century, Governing Body bilong distaem hem olketa man wea no perfect tu. Bat olsem bifor, Jehovah hem iusim olketa man wea no perfect for duim will bilong hem. Hem talem Noah for buildim wanfala ark and preach abaotem datfala big trabol wea bae kam long taem bilong hem. (Gen. 6:13, 14, 22; 2 Pet. 2:5) Jehovah appointim Moses for leadim pipol bilong Hem from Egypt. (Ex. 3:10) Holy spirit muvim olketa man wea no perfect for raetem Bible. (2 Tim. 3:16; 2 Pet. 1:21) Wei wea Jehovah iusim olketa man wea no perfect distaem for lukaftarem waka for preach and helpem pipol kamap disaepol, hem no mekem iumi wikdaon for trustim organization bilong God. Bat iumi kasem strong, bikos iumi savve Jehovah nao sapotim Governing Body for duim evri waka wea olketa duim.