Kongregeson Buk Study Mekhae Long Waka for Givim Spiritual Education
1 Kongregeson Buk Study hem wanfala barava important part insaed spiritual education program bilong organization bilong Jehovah. Wei wea olketa buk study grup stap long olketa difren ples, hem mekem isi for evriwan savve attend. And taem olketa wea interest savve hao buk study hem stap long ples bilong olketa maet diswan savve mekem olketa acceptim invitation for attend.
2 Each buk study hem smol nomoa. Diswan hem for mekem overseer savve helpem each wan long grup bilong hem. Samfala lane kwiktaem, samfala bae needim moa taem. Sapos eniwan long grup hem faendem hard lelebet for minim wanfala point long leson wea olketa studyim, maet overseer storyim datwan moa bihaen study hem finis. And tu, taem grup hem smol, evriwan wea attend garem chance for givim koment and share for readim olketa scripture. Waswe, iu share long wei for givim koment evritaem? Waswe, iu trae for ansa long toktok bilong iuseleva? Wei wea iu redi evritaem for givim koment long study savve helpem iu and olketa narawan. Taem iu prepare for study, trae for luksavve hao olketa point insaed leson savve helpem iu.—Heb. 5:14.
3 Taem iu lukim wei wea buk study overseer hem teach, iu bae lanem hao for conductim olketa Bible study long wei wea mekem study hem moa interesting and for really helpem student. Firstaem, wanfala brata wea fit hem readim olketa paragraf, and then brata wea conductim study bae askem olketa kwestin for eniwan savve ansarem. Buk study overseer bae encouragem olketa wea koment for tok big, mekem evriwan fit for herem. Sapos hem garem inaf taem, overseer bae trae for mekhae long samfala koment from olketa scripture for helpem iumi minim hao for followim olketa. (Markem diswan witim Nehemiah 8:8.) Maet samtaem hem talem wanfala koment or askem samfala extra kwestin for mek sure wanfala main point hem klia. Maet wanfala example or tokpiksa savve helpem iumi for lukim wei wea datfala information fitim laef bilong iumi.
4 Staka no savve kam long olketa Kongregeson Buk Study. Waswe, iu attend evritaem? Sapos nomoa, iu barava missim wanfala important samting wea Jehovah provaedem. Disfala arrangement bilong buk study hem wanfala wei wea Jehovah showimaot hem kea for iumi. (1 Pet. 5:7) Hem laekem iumi for kasem moa savve and wisdom mekem iumi bae kamap strong long spiritual wei. Long narasaed, Satan no laekem iumi for muv ahed long spiritual wei, mekem Jehovah and organization no savve iusim iumi for duim plande waka. No letem diswan for happen! Letem loving feeling wea stap midolwan long olketa insaed long grup kasem heart bilong iu and muvim iu for gohed praisem Jehovah.—Markem diswan witim Psalm 111:1.
5 Buk study overseer bae arrangem meeting for field service long ples wea olketa hipap for buk study and hem bae arrangem taem wea fitim evriwan long grup. Olketa savve meet long midol week, weekend, and for evening witnessing. Buk study overseer mas mek sure inaf territory hem stap and samwan hem garem assignment for leadim grup for field service. Olketa meeting for field service savve 10 go kasem 15 minute nomoa. Maet overseer story lelebet abaotem text for datfala day sapos text hem join witim preaching waka bilong iumi, and talem wan or tufala idea for iusim long field or duim wanfala demonstration.
6 Goal bilong overseer nao hem for waka witim each wan long grup bilong hem, and for trainim and givim encouragement wea fitim olketa.—Markem Mark 3:14; Luke 8:1.