Kwestin Box

◼ Waswe, hem stret for mekem fund-raising for helpem kongregeson?

Plande religion savve mekem olketa fund-raising, olsem wei for salem kaikai or olketa narakaen samting, or wei for mekem olketa plei. Maet samfala ting diswan hem olraet bikos hem sapotim gud samting. Bat, wei for duim diswan hem semsem olsem wei for askem selen. Olketa Jehovah’s Witness no kasem sapot for waka bilong olketa thru long wei for askem selen.

Mek-tu Watch Tower wea olketa pablisim long August 1879, talem hao iumi no laek for followim wei bilong olketa church for askem selen. Hem sei: “Long tingting bilong mifala, JEHOVAH nao sapotim wei for wakem disfala ‘Zion’s Watch Tower,’ and from datwan, bae mifala no beg or strong for askem man for sapotim diswan. God hem sei: ‘Evri gold and silver long olketa maunten hem bilong mi.’ So, sapos God no givim kam selen wea mifala needim, diswan minim luk olsem hem kasem taem nao for stop for wakem disfala magasin.”

Iumi gohed for followim disfala principle from Bible: “Each wan mas duim wanem hemseleva disaedem long heart bilong hem, no from eniwan forcem hem bat from hem willing for duim, from God lovem man wea hapi for give.” (2 Cor. 9:7) Olketa contribution box stap long olketa Kingdom Hall mekem eniwan savve givim donation wea hemseleva disaed for givim. (2 Ki. 12:9) Olketa Jehovah’s Witness encouragem man for givim contribution, bat olketa no sei hem mas givim datwan. And tu, olketa wea givim donation mas no givim datwan from olketa laek for kasem samting from donation wea olketa givim.