Chapter 3
Organized to Do Jehovah’s Will, page 18-21
OLKETA REASON FOR TRUSTIM “DATFALA FAITHFUL AND WISE SLAVE”
Staka reason stap for barava trustim datfala faithful slave. First and main reason, hem from Jesus appointim olketa for lukaftarem evri spesol “samting bilong hem.” Wei wea hem duim diswan showimaot klia hao hem barava trustim olketa.
Mek-tu reason, Word bilong God encouragem olketa Christian for waka tugeta witim olketa wea lead. Hao nao diswan savve helpem iumi? Long Hebrews 13:17, aposol Paul hem sei: “Obeyim olketa wea leadim iufala and stap anda long olketa, from olketa bae ansa for wei wea olketa lukaftarem iufala; mekem olketa duim diswan witim hapi and no witim sorre, from datwan bae spoelem iufala.” For iumi stap gud and kasem spiritual protection, iumi mas obeyim and stap anda long direction wea iumi kasem from olketa overseer from olketa nao ‘lukaftarem iumi.’
Long 1 Corinthians 16:14, Paul sei olsem: “Iufala mas duim evri samting witim love.” Love nao nambawan fasin wea muvim olketa overseer for disaedem samting saed long pipol bilong God. First Corinthians 13:4-8 hem sei olsem abaotem love: “Love hem long-safaring and kaen. Love hem no jealous, hem no tok praod, hem no bighed, hem no duim fasin wea no fitim, hem no lukaotem samting for hemseleva nomoa, hem no savve kros. Hem no tingim olowe rong wea samwan duim. Hem no hapi long samting wea no raeteous, bat hem hapi witim truth. Hem kavarem evri samting, bilivim evri samting, hope long evri samting, hem gohed strong thru long evri samting. Love hem nating savve fail.” Iumi garem plande reason for trustim direction bilong olketa overseer from love nao muvim olketa for disaedem olketa samting wea savve helpem olketa servant bilong Jehovah. And tu, diswan hem showimaot love bilong Jehovah for pipol bilong hem.
Wei wea datfala faithful slave gohed strong nomata olketa kasem plande hard taem hem showimaot hao spirit bilong God stap witim olketa. Distaem iumi lukim staka blessing wea organization bilong Jehovah long earth kasem, dastawe iumi barava sapotim and trustim olketa witim full heart bilong iumi.
HAO IUMI SHOWIMAOT IUMI TRUSTIM DATFALA FAITHFUL SLAVE
Olketa wea garem responsibility insaed long kongregeson showimaot olketa trustim datfala faithful slave taem olketa acceptim and faithful for duim responsibility wea olketa kasem. (Acts 20:28) From iumi pipol wea talemaot Kingdom, iumi strong for share long haos-tu-haos waka, duim return visit, and conductim olketa Bible study. (Matt. 24:14; 28:19, 20) For kasem gud samting from staka spiritual kaikai wea “datfala faithful and wise slave” givim, iumi prepare gud and attendim evri Christian meeting bilong iumi. Insaed diswan hem olketa assembly and convention wea kamap evri year. Taem iumi kaban witim olketa brata bilong iumi long olketa Christian hipap olsem, iumi savve kasem gud samting from wei for encouragem each other.—Heb. 10:24, 25.
Iumi showimaot iumi trustim ‘datfala faithful slave’ tu taem iumi givim olketa material samting for sapotim organization. (Prov. 3:9, 10) Taem iumi savve olketa brata and sista bilong iumi needim help long physical wei, iumi duim samting stretawe for helpem olketa. (Gal. 6:10; 1 Tim. 6:18) Iumi duim diswan witim love wea iumi garem for olketa brata and sista bilong iumi, and evritaem luksavve long olketa chance for showimaot iumi tinghae long olketa gud samting wea Jehovah and organization bilong hem givim for iumi.—John 13:35.
Narafala wei for showimaot iumi trustim datfala faithful slave, hem for acceptim and obeyim olketa disison wea olketa mekem. Nomata maet iumi no minim gud reason why olketa mekem samfala disison, iumi savve hao wei for sapotim olketa disison hia bae helpem iumi for olowe. Samfala taem olketa helpem iumi for minim moa klia samfala important samting, and iumi barava sapotim olketa disison olsem witim full heart bilong iumi. From diswan, Jehovah hem blessim wei wea iumi obeyim Word bilong hem and datfala faithful slave. Long disfala wei iumi showimaot iumi stap anda long Masta bilong iumi, Jesus Christ.
Tru nao, iumi garem staka reason for barava trustim “datfala faithful and wise slave.” Satan, god bilong disfala world, barava trae hard for spoelem nem bilong Jehovah and organization bilong hem. (2 Cor. 4:4) No foldaon long olketa trik bilong Satan. (2 Cor. 2:11) Hem savve hem garem shortfala taem nomoa bifor Jesus torowem hem long datfala hol wea deep tumas, and hem trae hard for pullim staka pipol bilong Jehovah for finis evribit witim hem. (Rev. 12:12) Bat taem Satan strong go moa for pullim iumi, iumi mas fren gud witim Jehovah long wei for showimaot iumi barava trustim organization wea Hem iusim for leadim pipol bilong Hem distaem. Satan hem faet againstim “olketa seed bilong disfala woman wea stap yet,” wea Jehovah markem olketa for leadim “waka for witness abaotem Jesus.” (Rev. 12:17) Wei wea iumi barava trustim Jehovah and olketa arrangement bilong hem mekem wan mind kamap midolwan long olketa brata.