Waswe, Iu Garem Wanfala Territory Bilong Iuseleva?
1. Wei for garem wanfala territory bilong iuseleva hem minim wanem?
1 Territory bilong iuseleva hem minim kongregeson nao markem wanfala territory for iuseleva preach long hem. Maet disfala territory stap long ples wea isi for iu go kasem. Diswan bae mekem iu savve kwiktaem kasem territory hia, and tu, bae iu savve go preach seleva or witim nara pablisa. Hem gud tumas for sapotim grup for witnessing wea kongregeson markem, bat sapos iu garem wanfala territory for iuseleva bae iu savve preach long datfala territory long olketa narataem and datwan bae mekem wei for staka moa pipol herem Kingdom message. Diswan hem barava fitim olketa kongregeson wea garem big territory.—Acts 10:42.
2. Wanem nao samfala gud samting wea kamap from wei for garem wanfala territory bilong iumiseleva?
2 Gud Samting wea Kamap From Diswan: Samfala faendem hem gud for garem wanfala territory wea stap klosap long ples wea olketa waka. Diswan mekem olketa fit for go preach taem olketa rest long twelv klok or taem olketa finis waka. Samfala famili hapi taem olketa waka tugeta for preach long olketa neiba samting olsem wan hour bifor olketa go long Kongregeson Buk Study. From diswan, olketa garem olketa return visit and Bible study wea klosap, and datwan helpem olketa for no hard waka for go farawe and no need for spendem staka selen. Wei for garem wanfala territory olsem savve helpem iumi for duim staka samting nomata sapos iumi no garem staka taem. Maet diswan savve helpem iu for auxiliary pioneer samfala taem or maet regular pioneer. Nara gud samting, hem wei wea iumi bae savve gud long olketa haosholder. Diswan bae mekem olketa trustim iumi and bae iumi savve changem story bilong iumi for fitim samting wea olketa wari abaotem, wea bae mekem ministry bilong iumi hem kamap moabeta.
3. Wanem nao experience bilong wanfala pioneer wea garem territory bilong hemseleva?
3 Circuit overseer encouragem wanfala pioneer sista for garem territory bilong hemseleva, and datfala sista hem sei: “Mi followim samting wea circuit overseer talem and no longtaem nomoa mi savve gud long olketa haosholder long territory bilong mi. Mi savve visitim olketa long taem wea fitim olketa. From datwan, mi garem staka return visit. Firstaem, namba bilong olketa return visit wea mi duim insaed wanfala month hem 35, gogo hem kasem 80, and tu, mi garem sevenfala Bible study.”
4. Hao nao iu savve kasem and duim wanfala territory bilong iuseleva?
4 Hao Nao for Duim: Sapos iu laek garem wanfala territory bilong iuseleva, iu mas askem overseer wea lukaftarem territory. Hem gud for askem olketa nara pablisa tu for go witim iu taem iu duim datfala territory. Sapos iu no meetim eni pipol long olketa haos markem datfala haos for duim next taem. Iu shud trae for finisim datfala territory insaed fofala month. Sapos iu hard for duim, hem gud for askem Kongregeson Buk Study overseer or olketa narawan for helpem iu finisim datfala territory. Bihaen fofala month, iu savve givim bak datfala territory or ask for duim moa. Bat, iu shud no duim sem territory hia olowe. Hem gud for givim bak mekem olketa narawan garem chance for duim tu. Sapos iu stap long kongregeson wea garem smol territory, maet hem hard for kasem wanfala full territory for iuseleva. From datwan, maet iu savve askem buk study overseer for givim lelebet part long eni territory for iu duim.
5. Wanem nao iumi need for duim for obeyim datfala komand for preach?
5 Datfala komand for preach “evriwea long earth” hem wanfala barava bigfala assignment. (Matt. 24:14) Hem minim iumi mas organize gud. Taem iumi duim territory bilong iumiseleva, and tu, joinim grup for witnessing bae diswan mekem iumi fit for preachim gud nius long staka pipol.