Hao Kongregeson Buk Study Overseer Showim Interest Long Man Wanwan
1 Kongregeson Buk Study hem for “givim spiritual encouragement and showimaot interest long each wan. . . . Diswan showimaot loving-kaeness bilong Jehovah and hao hem kea for pipol bilong hem.” (om-SP p. 75; Isa. 40:11) Buk study overseer garem important waka for givim help olsem for man wanwan.
2 Long Buk Study: Bikos goal hem for olketa buk study grup mas smol, buk study overseer hem fit for savve gud long olketa member insaed grup bilong hem. (Prov. 27:23) Plande taem olketa chance stap for kaban tugeta bifor and bihaen long study evri week. Insaed long wanfala month, maet hem fit for story witim evriwan insaed long datfala grup. Diswan helpem olketa member bilong datfala buk study for feel free for story witim hem taem olketa feisim test or needim encouragement.—Isa. 32:2.
3 Buk study overseer trae for encouragem evriwan insaed long grup for join insaed long study. Wanfala wei wea hem duim diswan hem for conductim study long kaenfala and isisi wei. (1 Thess. 2:7, 8) Hem lukaotem olketa wei for mekem evriwan join insaed long datfala story, and olketa young wan tu. Sapos samfala feel shame for ansa, hem maet givim olketa private help taem hem arrange firstaem witim olketa for readim wanfala scripture or for givim koment long wanfala paragraf. Or maet hem showim olketa hao for givim koment long toktok bilong olketa seleva.
4 Sapos assistant bilong buk study overseer hem wanfala ministerial servant, overseer savve arrange for hem conductim study wanfala taem evri tufala month. Diswan bae givim chance for overseer lukluk long datfala assistant and givim samfala idea for helpem hem. Hem nambawan arrangement for helpem olketa brata mekem wei bilong olketa for teach kamap moabeta!—Titus 1:9.
5 Long Field Ministry: Wanfala main responsibility bilong buk study overseer hem for lead insaed long preaching waka. (Num. 27:16, 17) Hem mekem olketa gudfala arrangement for grup witnessing and trae for helpem evriwan insaed grup for kasem hapi long ministry bilong olketa. (Eph. 4:11, 12) For duim diswan, wanfala goal bilong hem for waka witim each member long grup bilong hem insaed long ministry. Hem waka tugeta witim service overseer for arrange tu for olketa wea laek for kamap moabeta long samfala part long ministry bilong olketa for kasem help from pablisa wea garem moa savve.
6 Olsem Wanfala Loving Shepherd: Buk study overseer hem interest long olketa wea living bilong olketa mekem olketa savve share long smolfala wei nomoa insaed preaching waka. Hem mek sure olketa wea faendem hard tumas from age or olketa wea no savve lusim haos and olketa wea faendem hard for lelebet taem bikos long bigfala sik or garekil, olketa savve long arrangement wea letem olketa for reportim 15 or 30 or 45 minute sapos olketa no savve reportim wanfala full hour insaed long month. (Kongregeson Service Komiti disaedem hu nao fit for insaed long diswan.) Hem interest tu long olketa insaed grup wea maet no active pablisa, and hem trae for helpem olketa for waka moa witim kongregeson.—Luke 15:4-7.
7 Iumi tinghae tumas long loving interest wea olketa buk study overseer showim! Wei wea olketa interest long man wanwan helpem “evriwan kasem wan mind insaed long datfala faith . . . , and kasem full wei wea Christ showaot.”—Eph. 4:13.