Theocratic Ministry Skul Review

Kongregeson bae ansarem olketa kwestin hia long Theocratic Ministry Skul long week wea start long February 26, 2007. Skul overseer bae conductim wanfala 30-minute review long information wea kamap insaed olketa assignment start long week bilong January 1 go kasem February 26, 2007. [Samting for tingim: Long olketa kwestin wea no garem eni reference, bae iu need for duim research for faendem olketa ansa.​—Lukim Ministry Skul buk, pp. 36-7.]

OLKETA POINT KAONSEL

1. Taem iumi givim tok, wanem taem nao iumi shud talem samting wea savve helpem man, and iumi shud duim diswan long wanem wei? [Jan. 1, be-SP p. 158 par. 2-4] Iumi shud gohed for showimaot olketa samting wea savve helpem man insaed long full tok and no storyim nomoa long end bilong tok. Long start bilong tok, iumi shud mekem audience interest and trae for mekem olketa tingim hao disfala tok hem barava for olketa. Taem iumi storyim hao for followim datfala information, iumi shud duim long kaenfala wei wea showimaot iumi ‘tingim feeling’ bilong olketa. (1 Pet. 3:8) Winim wei for putim hevi long olketa narawan for mekem olketa feel guilty, goal bilong iumi hem for muvim olketa for showimaot love and duim gudfala waka and for encouragem “wei for obey thru long faith.” (Rom. 16:26)

2. Why nao hem important for helpem olketa narawan lukim gud samting from information wea iumi storyim, and hao nao iumi savve duim diswan? [Jan. 8, be-SP p. 159 par. 3-4] Sapos pipol no lukim hao message bilong iumi affectim olketa, olketa maet kwiktaem finis for story witim iumi nao. Iumi helpem nara pipol for lukim gud samting abaotem message bilong iumi taem iumi strongim olketa gud samting wea kam from wei for wakabaot followim olketa wei bilong Jehovah and hao hem wise for followim olketa principle long Bible. Taem iumi duim olsem, diswan bae muvim olketa narawan for changem fasin bilong olketa mekem Jehovah hapi long olketa. (Isa. 48:17, 18)

3. Why nao olketa word wea iumi chusim hem important? [Jan. 15, be-SP p. 160] Taem iumi chusim gud olketa word wea iumi iusim, iumi showimaot respect for message wea iumi talemaot and pipol wea iumi story long olketa. (1 Pet. 2:17) Olketa word hem olsem tul wea pipol iusim for story tugeta wea savve ‘spoelem,’ or encouragem man. (Prov. 12:25; 15:1) For man faendem olketa stretfala word for iusim hem need for waka hard, and datwan barava important, from olketa word wea iumi iusim savve affectim hao pipol ting long samting wea iumi talem. (Eccl. 12:10)

4. Wanem nao bae helpem iumi for iusim olketa difren word long stretfala wei? [Jan. 29, be-SP p. 161 par. 5-6; p. 162 par. 1, 4] Taem iumi lukim olketa word wea iumi no minim gud taem iumi read, iumi shud chekim long dictionary and then trae hard for iusim long taem wea fitim. Diswan helpem iumi for iusim olketa stretfala word and savve long staka word, wea mekem toktok bilong iumi strongim and muvim man. (Prov. 15:2)

5. Wanem nao samfala gud samting from wei for story from wanfala aotlaen wea insaed mind bilong iu or wea iu raetem? [Feb. 19, be-SP p. 166 par. 1-3] Taem iumi givim tok from wanfala aotlaen and no from manuscript wea iumi raetem evri samting wea iumi bae talem, iumi tingim audience bilong iumi, no olketa toktok wea iumi raetem. Wei for iusim wanfala aotlaen hem mekem hem isi for iumi story gud and story from heart, wea datwan helpem iumi for kasem heart bilong olketa wea lisin. Taem speaker iusim wanfala aotlaen and changem information wea hem iusim for fitim audience, olketa wea lisin bae tingim hao hem barava redyim datfala information for olketa.

TOK NO. 1

6. Wanem nao man need for duim taem hem preparem wanfala reading assignment? [Jan. 1, be-SP p. 43 par. 2, 4] For prepare for read long pablik hem minim for practice for read big and trae for minim gud datfala information wea bae iu readim. Diswan minim for trae for minim wanem nao point bilong each sentence and idea bilong each paragraf mekem iu fit for talem stret olketa point witim feeling wea fitim. Sapos iu savve duim, iusim wanfala dictionary for savve long hao for talem stret olketa word wea iu no savve.

7. Wanem nao iumi need for duim sapos iumi laek for garem sem tingting bilong Jehovah abaotem wei for lovem stret samting and heitim samting wea no stret? (Heb. 5:14) [Jan. 15, w05-SP 1/1 p. 9 par. 11] Iumi need for minim gud tingting bilong Jehovah saed long samting wea stret and no stret. Iumi kasem disfala savve only from wei for studyim Word bilong God, Bible. Wei for prea, ting raonem samting, and followim gud kaonsel wea iumi kasem from “faithful and wise slave” bae helpem iumi tu for kamap mature long spiritual wei. (Matt. 24:45-47)

8. Wanem nao iumi shud tingim sapos iumi readim samting long Bible wea mekem iumi daotem sapos God duim samting wea raeteous and stret? [Jan. 29, w05-SP 2/1 p. 24 par. 7] Jehovah duim barava big samting for loyal long olketa standard bilong hem saed long wanem hem raeteous and stret. Hem no hol bak for givim Son bilong hem for dae witim bigfala pain. Staka pruv stap for iumi savve sure hao Jehovah evritaem duim samting wea raeteous and stret. (Job 37:23)

9. Wanem nao iumi shud duim taem olketa man askem iumi for duim samting wea againstim law bilong God? [Feb. 5, w05-SP 4/15 p. 12 par. 9] Wei wea iumi lovem Word bilong God bae helpem iumi gohed faithful long Jehovah. (Ps. 119:18, 20, 24) Olsem olketa aposol bilong Jesus Christ wea kasem persecution, iumi bae sei: “Mifala mas obeyim God olsem ruler winim olketa man.” (Acts 5:29)

10. Hao nao Isaiah mekhae long Kingdom bilong Messiah and man wea kam firstaem, John Baptaesa? [Feb. 19, bsi06-SP p. 31 par. 35] Jesus hem born long wanfala young gele for fulfillim Isaiah 7:14, and hem garem datfala nem “Immanuel.” (Matt. 1:22, 23) Isaiah 9:6, 7 hem fulfill taem God givim throne bilong David long Jesus, olsem datfala angel hem talem long Mary. (Luke 1:32, 33) Fofala man wea raetem olketa Gospel olketa talem moa toktok long Isaiah 40:3 for showimaot John Baptaesa nao man wea “singaot long wilderness.” (Matt. 3:1-3; Mark 1:2-4; Luke 3:3-6; John 1:23) Jesus hem kamap Messiah taem hem baptaes—datfala Anointed Wan bilong Jehovah, datfala branch or rut bilong Jesse wea bae rulim olketa nation. Evriwan mas hope long hem for fulfillim Isaiah 11:1, 10. (Rom. 15:8, 12)

BIBLE READING EVRI WEEK

11. Wanem nao “kava wea kavarem evri pipol” and “samting olsem haos bilong spider” wea Isaiah 25:7 storyim? Long verse 8, Isaiah talem hao Jehovah bae “finisim dae for olowe.” Sin and dae hem olsem wanfala kava wea kavarem olketa man. Olketa man wea obey and faithful bae kamap free from disfala kava wea kavarem olketa, taem olketa kasem gud samting wea kam from heven thru long ransom sakrifaes bilong Jesus. Isaiah 25:8 hem sei: “Sovereign Lord Jehovah bae aotem krae from evri feis.” [Jan. 1, w06-SP 12/1 “Word Bilong Jehovah Hem Laef—Olketa Main Point From Buk Bilong Isaiah—I”]

12. Tru or False: Hezekiah talem datfala prea long Isaiah 38:3 from hem laek for laef longtaem. False. Taem Assyria laek for attakim Jerusalem, main wari bilong Hezekiah hem hao sapos olketa winim Jerusalem diswan bae mekem pipol ting daonem nem bilong Jehovah. Taem hem savve hem bae dae from sik bilong hem, Hezekiah wari tumas from sapos hem dae and hem no garem pikinini yet, diswan bae affectim laen bilong David wea olketa king kam from. Hem wari tu long hu nao bae leadim faet againstim olketa long Assyria. (Isa. 37:20; 39:7) Dastawe, Jehovah lukim hao hem stret for hem sevem Hezekiah and Jerusalem from Assyria and hem mekem Hezekiah laef for nara 15 year moa, wea hem givim hem chance for garem wanfala pikinini wea bae kamap king. (Isa. 38:5, 6) [Jan. 22, w07-SP 2/1 “Word Bilong Jehovah Hem Laef—Olketa Main Point From Buk Bilong Isaiah—II”]

13. Hao nao olketa Israelite kamap olketa witness bilong Jehovah, and hao nao iumi savve followim olketa? (Isa. 43:10) Olketa Israelite savve kamap witness long wei for ‘gohed talemaot praise’ bilong Jehovah. (Isa. 43:21) Taem olketa kamap free from Babylon, olketa Israelite savve praisem Jehovah and givim witness hao God savve talemaot trufala profesi and olketa god bilong Babylon olketa iusles nomoa. (Isa. 43:14) Distaem, iumi savve helpem pipol for luksavve long olketa Bible profesi wea fulfill finis, wea hem strongfala reason for barava trustim olketa profesi bilong Jehovah for future. [Jan. 29, w95-SP 9/1 p. 23 par. 17-18]