Talemaot Evriwea Olketa Nambawan Fasin Bilong Jehovah
1. Wanem nao muvim iumi for talemaot evriwea olketa nambawan fasin bilong Jehovah?
1 “O Jehovah, wei for nambawan, wei for maeti, wei for luk naes, and bigfala glory and honor, hem bilong iu; from evri samting long skae and long earth hem bilong iu.” (1 Chron. 29:11) Hao nao wei wea iumi lovem and tinghae long Jehovah affectim iumi? Hem muvim iumi for ‘talemaot evriwea olketa nambawan fasin bilong datwan wea kolem iumi kamaot from dark go long nambawan laet bilong hem.’ (1 Pet. 2:9) Iumi kanduit stop for story abaotem nambawan God bilong iumi long olketa narawan! Bae iumi garem olketa nambawan chance for talemaot olketa nambawan fasin bilong Jehovah long March, April, and May.
2. Wanem spesol waka for talem pipol abaotem Memorial nao bae kamap, and hu nao savve share insaed?
2 Spesol Waka for Talem Pipol Abaotem Memorial: Long Monday, April 2, bae iumi mekhae long olketa nambawan fasin bilong Jehovah taem iumi celebratem Evening Kaikai Bilong Lord. Start long March 17 go kasem April 2, wanfala spesol invitation bae go aot evriwea long world for disfala important samting wea bae kamap. Iumi evriwan kasem encouragement for share evribit insaed diswan. Diswan bae hem barava gudfala taem for olketa niu wan start for talemaot gud nius sapos olketa fit. Sapos Bible study or pikinini bilong iu hem fit, story long olketa elder.
3. Wanem nao iumi savve talem taem iumi invaetem pipol for kam long Memorial?
3 Disfala spesol waka bae semsem nomoa witim datwan wea iumi duim for olketa “Salvation Hem Klosap!” Distrik Convention. Bae kongregeson kasem inaf invitation pepa mekem each pablisa savve kasem 50 copy and each pioneer savve kasem 150 copy. No story longtaem witim haosholder. Maet iu savve sei: “Diswan hem invitation pepa bilong iu for wanfala important samting wea kamap wantaem evri year. Sapos iu kam, mifala bae barava welkamim iu. Disfala invitation pepa hem storyim plande samting moa abaotem diswan.” Sapos haosholder hem askem kwestin, iu savve ansarem olketa kwestin bilong hem. Datfala article long appendix wea insaed long Bible Teach buk abaotem Evening Kaikai Bilong Lord wea start long page 206 savve helpem iu saed long diswan. Long olketa weekend, iumi bae offerim olketa niu magasin and disfala spesol invitation pepa. Raetem nem bilong olketa wea iumi meetim wea interest, and arrange for go bak lukim olketa.
4. Hao nao iumi bae givimaot datfala spesol Memorial invitation pepa?
4 Iumi shud givim stret disfala spesol invitation pepa long each haosholder. So trae for go bak long olketa haos wea no eniwan stap. Olketa kongregeson wea garem staka invitation pepa savve leavim olketa pepa hia long haos wea no eniwan stap insaed last week bifor Memorial, bat no bifor datfala taem. Mek sure iu givim wanfala invitation pepa long olketa return visit bilong iu, olketa Bible study, relative, wakfren, neiba, and olketa narawan wea iu savve long olketa.
5. Why nao iumi shud start for mekem plan bilong iumi distaem for auxiliary pioneer?
5 Auxiliary Pioneer: Waswe, iu savve duim moa samting for talemaot olketa nambawan fasin bilong Jehovah long wei for auxiliary pioneer long March, April, and May? Sapos olsem, maet iu need for changem schedule bilong iu for each day. (Eph. 5:15-17) For sure, wei wea iu waka hard for duim moa samting long service bilong Jehovah bae mekem iu kasem hapi and blessing bilong Jehovah. (Prov. 10:22) From March, April, and May hem klosap, hem gud for iumi start for mekem plan bilong iumi distaem.—Prov. 21:5.
6. Wanem nao iumi savve lanem from experience bilong wanfala olo sista wea 90 year wea auxiliary pioneer last year?
6 Wanfala olo sista wea 90 year enjoyim privilege for auxiliary pioneer last year. Hem sei olsem: “Nomata mi barava lovem wei for waka long garden and mi laek for plantim samfala niu plant, mi luksavve hao mi need for markem nao olketa samting wea moa important. From mi barava laek for spendem moa taem long preaching waka, mi disaed for auxiliary pioneer long March.” Waswe, hem kasem blessing from datwan? Hem sei olsem: “Mi feel moa klos long kongregeson, and diswan hem mekem mi fren gud go moa witim Jehovah.” Waswe, iumi savve ting raonem wanem nao important long iumi and changem samfala samting olsem disfala sista duim?
7. Waswe, hem hard tumas for serve olsem wanfala auxiliary pioneer?
7 Wei for kasem goal bilong 50 hour for auxiliary pioneer maet no hard olsem hao iu tingim. Ting raonem olketa samting wea iu duim evriday and askem Jehovah for helpem iu savve long wanem iu savve changem, then wakem wanfala schedule and raetem datwan insaed kalenda. Iu nao savve long wanem iu savve duim or no duim. Sapos iu no garem gud health and iu no strong, maet iu savve share long ministry tufala hour each day or samting olsem. Sapos iu waka full-taem or go long skul, maet iu savve auxiliary pioneer long wei for share long ministry long olketa evening or long olketa weekend.
8. Wanem nao helpem wanfala hasband and waef for auxiliary pioneer?
8 Samfala taem, evriwan insaed famili savve auxiliary pioneer tugeta. Long olketa year wea go pas, wanfala hasband and waef hol bak for auxiliary pioneer bikos olketa tingse living bilong olketa mekem hem hard for olketa duim datwan. So wanem nao tufala duim? “Mifala prea long Jehovah for helpem mifala kasem disfala goal wea mifala laek for kasem for longfala taem finis.” From tufala plan gud for diswan, olketa kasem datfala goal nao. Tufala sei moa: “Hem nambawan. Mitufala kasem staka blessing. Advaes bilong mitufala, hem for traem. Sapos mitufala fit for duim, maet iu tu fit for duim.”
9. Wanem nao famili bilong iu savve duim long nextfala famili study for plan for olketa spesol waka wea bae kamap long March, April, and May?
9 Hem gud for markem taem long nextfala famili study for story raonem eni wei for evriwan insaed famili savve duim moa samting long March, April, and May. Nomata sapos full famili no fit for auxiliary pioneer, maet wanfala member long famili savve duim datwan taem olketa nara member insaed famili helpem hem and sapotim hem. Sapos nomoa, maet famili bilong iu savve markem samfala goal for iusim moa taem long ministry long olketa spesol month hia.
10. Why nao iumi shud story long olketa narawan abaotem plan bilong iumi for duim moa samting long March, April, and May?
10 Helpem Each Other: Wei wea iu laekem tumas for duim moa samting savve encouragem olketa narawan tu. So story abaotem plan bilong iu for auxiliary pioneer long olketa narawan. Maet diswan encouragem olketa for pioneer tu. And tu, olketa wea pioneer bifor savve givim samfala idea wea bae helpem iu for arrangem schedule and olketa samting wea iu duim for kasem goal bilong iu. (Prov. 15:22) Sapos iu fit for auxiliary pioneer, invaetem nara pablisa, wea maet hem samwan wea garem living olsem iu, for joinim iu for duim disfala spesol waka.
11. Hao nao olketa elder savve muvim olketa narawan for auxiliary pioneer long olketa month wea bae kamap?
11 Plande elder mekem olketa arrangement for savve share long disfala spesol waka. (Heb. 13:7) Diswan barava encouragem olketa insaed kongregeson! Samting wea olketa elder story abaotem witim olketa narawan savve muvim olketa tu. Maet wei for talem samting wea encouragem man or for talem samfala gud idea savve muvim samfala for auxiliary pioneer. Service overseer bae arrangem olketa extra field service meeting for preaching bihaen waka or skul long evening, mekem evriwan savve share long grup witnessing. Hem bae mek sure kongregeson kasem announcement for olketa grup hia evritaem. Hem bae mek sure evriwan garem inaf territory and literature tu.
12. Wanem nao iu savve duim sapos iu no fit for auxiliary pioneer?
12 Nomata sapos living bilong iu mekem iu no fit for auxiliary pioneer, iu savve encouragem olketa wea fit for duim datfala waka, and iu savve prea for olketa. (Prov. 25:11; Col. 4:12) Maet iu savve mekem arrangement for waka witim olketa long ministry tufala day insaed week or duim samfala extra hour long day wea iu go aot.
13. Wanem nao goal for Solomon Islands, and hao nao kongregeson bilong iu savve help for kasem datwan?
13 Goal for Garem 300 Auxiliary Pioneer Long April: Long April 2003, iumi long Solomon Islands garem 298 auxiliary pioneer. So wanfala goal wea fitim iumi for disfala year, hem for garem 300 auxiliary pioneer long April. Sapos kongregeson hem garem 25 pablisa, maet 5-fala nao savve auxiliary pioneer. Hem tru, samfala kongregeson bae garem staka pablisa wea fit for auxiliary pioneer. Bat disfala goal mekem hem isi for staka kongregeson kasem datwan. Tingim hao wei for kasem disfala goal hem bae barava encouragem kongregeson bilong iu and hao datwan bae mekem gud samting kamap long territory wea iu preach!
14. Why nao April hem barava gudfala month for auxiliary pioneer?
14 Why nao April hem barava gudfala month for auxiliary pioneer? From Memorial bae kamap long start bilong month, hem givim iumi staka chance bihaen for duim return visit long olketa wea attend. Iumi bae offerim olketa magasin witim goal for offerim Kasem brochure long olketa return visit and startim olketa Bible study. So wei for auxiliary pioneer long April bae givim iumi staka chance for startim olketa Bible study. Month bilong April hem garem faevfala Sunday and wanfala holiday bilong world, wea bae mekem hem moa isi for olketa wea waka and olketa wea skul for auxiliary pioneer.
15. From olketa spesol month klosap nao, why nao iumi shud tingim evritaem hao end hem klosap?
15 Evri year iumi enjoyim olketa spesol month for pioneer, and each taem wea iumi duim datwan end bilong world hem moa klos. Taem wea stap yet for talem olketa narawan abaotem nambawan God bilong iumi hem short. (1 Cor. 7:29) Bihaen olketa spesol month hia hem go pas, datfala chance for praisem Dadi bilong iumi long heven hem finis nao. Iumi kasem encouragement for mekem olketa plan distaem for duim best bilong iumi for talemaot olketa nambawan fasin bilong Jehovah long March, April, and May!
[Box long page 6]
Waswe, Iumi Savve Garem 300 Auxiliary Pioneer Long April?
◼ Ting raonem wanem hem moa important for duim
◼ Storyim olketa goal witim famili
◼ Storyim olketa plan bilong iu long olketa narawan