Chapter 5 (Part 1)
Organized to Do Jehovah’s Will, page 27-30
OLKETA OVERSEER FOR SHEPHERDIM OLKETA SHEEPSHEEP
TAEM Jesus duim ministry bilong hem long earth, hem barava showimaot hao hem nao “datfala gud shepherd.” (John 10:11) Taem hem lukim staka pipol followim hem, “hem feel sorre long olketa from olketa garekil and stap olobaot olsem olketa sheepsheep wea no garem eni shepherd.” (Matt. 9:36) Peter and olketa nara aposol lukim wei wea hem showimaot love long olketa. Jesus hem barava difren from olketa false shepherd long Israel wea nating lukaftarem olketa sheepsheep and wea gogo, diswan mekem olketa stap olobaot and barava hangre long spiritual wei! (Ezek. 34:7, 8) Taem olketa aposol lukluk long gudfala example bilong Jesus long wei wea hem teach and hao love bilong hem for olketa sheepsheep mekem hem willing for sakrifaesim laef bilong hem for olketa, olketa lane hao for helpem olketa wea garem faith for kam bak long Jehovah, ‘datfala shepherd and overseer bilong soul bilong olketa.’—1 Pet. 2:25.
Jesus iusim olketa teaching and example bilong hem for strongim long olketa aposol hao datfala responsibility wea hem givim long olketa for lukaftarem olketa sheepsheep hem wanfala serious samting. Wantaem Jesus hem story long Peter for barava strongim long mind and heart bilong olketa aposol hao hem important for feedim and shepherdim olketa sheepsheep. (John 21:15-17) Iumi lukim insaed firstfala leta bilong Peter hao diswan barava muvim hem for encouragem olketa older man. Hem raet olsem long olketa overseer: “Shepherdim olketa sheepsheep bilong God wea iufala lukaftarem, no from eniwan forcem iufala, bat long willing wei; no from iufala laek for kasem selen long wei wea no honest, bat from iufala barava want for duim; no long wei for bossim olketa wea God ownim, bat long wei for kamap example for olketa sheepsheep.”—1 Pet. 5:1-3.
Toktok bilong Peter hem barava fitim olketa overseer insaed long kongregeson distaem. Responsibility bilong olketa overseer hem semsem olsem long first century, wea hem nao for shepherdim olketa sheepsheep bilong God. Insaed leta bilong hem, Peter hem mekhae long stretfala tingting wea olketa overseer need for garem abaotem wei for lukaftarem disfala responsibility. Olsem Jesus, olketa shud serve long willing wei and kamap example long olketa sheepsheep, and lead long service bilong Jehovah.
Iumi hapi tumas for garem olketa overseer wea spirit appointim insaed long kongregeson. Iumi kasem staka gud samting from waka bilong olketa. Olsem example, olketa overseer encouragem iumi long spiritual wei and showimaot interest long each member insaed long kongregeson. Evri week olketa lukaftarem olketa kongregeson meeting wea savve strongim faith bilong evriwan. (Rom. 12:8) Wei wea olketa waka hard for protectim olketa sheepsheep from olketa nogud samting, olsem olketa man wea wicked, hem mekem iumi stap sef long spiritual wei. (Isa. 32:2; Titus 1:9-11) Gudfala example bilong olketa and wei wea olketa lead long field ministry hem encouragem iumi for gohed long waka for preachim gud nius evri month. (Phil. 3:16, 17; Heb. 13:15-17) Thru long “olketa man wea olsem olketa present,” Jehovah provaedem plande samting for buildimap kongregeson.—Eph. 4:8, 11, 12.
MARK WEA OLKETA OVERSEER MAS KASEM
For mek sure olketa bae lukaftarem gud kongregeson, olketa man wea kasem appointment for serve olsem olketa overseer mas kasem olketa mark wea stap insaed Word bilong God. Olketa bae kasem datfala appointment thru long holy spirit only sapos olketa kasem olketa mark firstaem. (Acts 20:28) Hem tru, olketa mark wea olketa Christian overseer mas kasem hem hae. Diswan hem bikos olketa man hia garem serious responsibility for lead long worship bilong Jehovah and showimaot gudfala example saed long Christian fasin. (1 Cor. 11:1; Heb. 13:7) Bat olketa mark no hae tumas. Olketa man wea lovem Jehovah and willing for hem iusim olketa savve kasem olketa mark hia. Wei wea olketa mark hia hem hae hem showimaot hao olketa elder wea kasem appointment mas kamap olketa gudfala example insaed long kongregeson. Hem shud showaot klia long evriwan hao olketa overseer followim kaonsel from Bible insaed laef bilong olketa seleva.
Aposol Paul talem olketa mark wea olketa overseer mas kasem insaed firstfala leta bilong hem for Timothy and insaed leta bilong hem for Titus. Long 1 Timothy 3:1-7, hem sei: “Sapos eni man waka hard for kasem waka bilong overseer, hem aftarem gudfala waka. Dastawe wanfala overseer mas free from blame, garem wanfala waef nomoa, balance saed long fasin, garem gudfala tingting, followim order, welkamim pipol, fit for teach, no man for drunk, no man for faet, bat mas balance, no tok raf, no lovem selen, man wea leadim famili bilong hem long gudfala wei, wea garem olketa pikinini wea stap anda long hem long stretfala wei; (sapos eni man no savve hao for leadim famili bilong hemseleva, hao nao bae hem lukaftarem kongregeson bilong God?) no niufala Christian man, from maet hem fulap witim praod fasin and kasem judgment wea Devil hem kasem. And tu, pipol long aotsaed mas story gud abaotem hem, mekem hem no kasem blame and foldaon long trap bilong Devil.”
Paul hem raet olsem long Titus: “For disfala reason nao mi lusim iu long Crete, mekem iu savve stretem olketa rong samting and for appointim olketa older man long olketa taon, olsem mi givim order long iu; sapos eni man stap wea no garem blame, garem wanfala waef nomoa, garem olketa pikinini wea biliv and wea no garem rabis fasin and fasin for no obey. Wanfala servant bilong God wea hem overseer mas free from blame, no followim will bilong hemseleva, no man for kros, no man for drunk, no man for faet, no greedy for kasem samting long wei wea no honest, bat welkamim pipol, lovem gudfala fasin, garem gudfala tingting, raeteous, loyal, savve kontrolem hemseleva, hol strong long faithful word long wei wea hem teach, mekem hem fit for encouragem pipol long gudfala teaching and repruvim olketa wea againstim.” (Titus 1:5-9) Kaonsel bilong Paul hia hem mekhae long olketa fasin wea olketa overseer mas showimaot taem olketa duim waka bilong olketa. Olketa nara man wea raetem Bible storyim olketa nara Christian fasin wea olketa man wea kasem appointment olsem overseer insaed kongregeson mas garem.—Jas. 3:13, 17, 18.