Kwestin Box

◼ Hao nao iumi shud lukaftarem olketa assignment long kongregeson?

Wei wea kongregeson bilong pipol bilong Jehovah waka followim order, hem from evriwan waka tugeta witim wan mind. (1 Cor. 14:33, 40) Tingim evri waka wea kamap for mekem wanfala kongregeson meeting gohed gud. And tu, olketa brata and sista garem olketa difren assignment for duim bifor and bihaen datfala meeting. Samfala nara assignment wea olketa brata duim wea nara pipol no lukim hem important tu. Hao nao iumi wanwan savve sapotim disfala arrangement?

Willing for duim samting. Plande waka stap for olketa wea willing. (Ps. 110:3) Tingim olketa wea sik and olketa olo. Help for klinim Kingdom Hall. Staka samting stap wea iumi savve duim wea iumi no need for weitim narawan for askem iumi for duim olketa samting hia. Iumi need for willing nomoa.

Serve long hambol wei. Pipol wea hambol, hapi for servem narawan. (Luke 9:​48) Wei for hambol bae stopem iumi for trae duim moa samting winim wanem iumi fit for duim. Nara samting tu, hambol fasin bae stopem iumi for duim samting wea iumi no garem paoa for duim datwan.​—Prov. 11:2.

Kamap man wea narawan fit for trustim. Moses kasem encouragement for chusim olketa ‘man wea narawan fit for trustim’ for duim olketa waka long Israel bifor. (Ex. 18:21) Man need for garem semkaen fasin distaem. Duim gud each assignment wea iu kasem. (Luke 16:10) Sapos iu no fit for duim wanfala assignment, mek sure iu arrange for narawan duim datwan taem iu no stap.

Duim best bilong iu. Olketa Christian kasem encouragement for duim best bilong olketa taem olketa waka, nomata taem olketa waka for selen tu. (Col. 3:​22-​24) Hem moa important for duim olsem taem iumi waka for sapotim tru worship. Nomata sapos luk olsem wanfala waka hem no important, taem iumi duim long gudfala wei hem wanfala blessing for kongregeson.

Eni assignment wea stap for iumi duim hem mekem iumi garem chance for showimaot love bilong iumi for Jehovah and for olketa brata bilong iumi. (Matt. 22:37-​39) Iumi laek for barava faithful for lukaftarem eni difren waka iumi kasem for duim.