Waswe, Iu Defendim Word Bilong God?
1 Nomata plande pipol long world no bilivim Bible, olketa tru Christian strong for defendim Word bilong God. From iumi barava bilivim hao “evri scripture hem kam from God,” iumi agree witim disfala toktok wea Jesus Christ talem taem hem prea long Jehovah: “Word bilong iu nao truth.” (2 Tim. 3:16; John 17:17) Hao nao iumi savve defendim Word bilong God long gudfala wei?
2 Lanem Olketa Scripture: Jesus barava studyim gud Word bilong God. Datwan helpem hem for iusim Bible for teachim pipol taem hem duim ministry bilong hem. (Luke 4:16-21; 24:44-46) Wanem nao iumi savve duim for helpem iumi rememberim olketa scripture? Iumi readim Bible evriday and ting raonem wanfala verse wea savve encouragem or helpem pipol long ministry. Taem iumi prepare for olketa meeting, iumi shud readim olketa scripture from Bible wea stap long article and iumi savve redyim koment from olketa scripture hia. Long olketa meeting, iumi shud openem Bible bilong iumi and lukluk long olketa scripture wea speaker readim. Wei for lanem olketa scripture long Bible bae helpem iumi for “iusim word bilong truth long stretfala wei.”—2 Tim. 2:15.
3 Readim Stret From Bible: Taem iumi duim ministry, iumi shud evritaem read stret from Bible. Olsem example, sapos hem fitim, iumi shud trae for readim and storyim wanfala scripture long haosholder. Sapos hem askem wanfala kwestin or talem toktok for stopem story, best samting for duim hem for iusim Bible for givim ansa. Taem haosholder hem busy, maet hem still fitim for iumi mekhae long wanfala toktok from Bible long wei for sei olsem, “Bifor mi leavim iu, mi laek for readim disfala scripture for iu.” Long taem wea fitim, readim scripture stret from Bible, and letem haosholder luk followim datwan taem iu read.
4 Taem wanfala haosholder lukim olketa scripture wea pruvim Trinity teaching hem no stret, datfala haosholder hem sei, “Mi go long church for full laef bilong mi, and mi nating savve Bible hem storyim diswan!” Hem acceptim wanfala Bible study. Jesus talem hao olketa sheepsheep bilong hem bae lisin long voice bilong hem. (John 10:16, 27) Best wei for olketa wea garem honest heart for luksavve long truth hem for lukim datwan long Bible. So iumi mas defendim truth wea stap insaed Word bilong God!