Hao for Preparem Story for Offerim Magasin
1. Why nao hem moabeta for man seleva preparem wei for offerim magasin winim wei for baeheartim wanfala idea for startim story wea stap long Kingdom Ministry Bilong Iumi?
1 Maet iu sei, ‘Why nao iumi shud preparem story for offerim olketa magasin, from olketa idea for offerim magasin hem stap long evri Kingdom Ministry Bilong Iumi?’ Nomata olketa idea hia helpem plande long iumi, man seleva still need for prepare. Maet wanfala wei for offerim magasin hem gud long wanfala territory, bat maet hem no fitim narafala territory. Dastawe, taem iumi offerim olketa magasin iumi shud no feel olsem iumi mas barava talem evri toktok wea stap long olketa idea hia. Nomata sapos iumi chus for iusim wanfala idea for startim story hia, hem bae gud for talem datwan long toktok bilong iumiseleva.
2. Hao nao iu savve disaedem wanem article for storyim?
2 Chusim Wanfala Article: Taem iu readim magasin finis, chusim wanfala article wea fitim territory bilong iu and wea iu faendem hem interesting. Wei wea iu tok abaotem wanfala article witim feeling and strongfala biliv maet muvim haosholder for laek readim tu. Nomata iu bae showim wanfala article wea plande pipol long territory interest long hem, iu mas savve gud tu long olketa nara article insaed magasin. Diswan bae helpem iu for changem story bilong iu sapos iu meetim wanfala man wea interest long narafala subject.
3. Wanem kaen introduction nao iu iusim for mekem man interest?
3 Askem Wanfala Kwestin: Next samting for duim hem for preparem gud introduction bilong iu. Introduction bilong iu hem important. Maet hem gud for askem haosholder wanfala kwestin for mekem hem tingting and mekem hem interest long article wea iu chusim for story abaotem. Hem moabeta for askem kaen kwestin wea bae mekem haosholder talem iu tingting bilong hem abaotem samting. No askem olketa kwestin wea savve mekem haosholder for argue from hem tingse iu ting smol or no agree witim samting hem talem.
4. Wanem gud samting nao kamaot from wei for readim wanfala scripture for haosholder taem hem fitim for duim datwan?
4 Readim Wanfala Scripture: Last samting, chusim wanfala scripture for readim long haosholder sapos iu lukim hem fitim, wea maet datwan hem eni scripture insaed article wea iu bae story abaotem. Wei for readim scripture hem helpem haosholder for lukim hao message bilong iumi kam from Word bilong God. (1 Thess. 2:13) And tu, datfala scripture bae givim witness long hem, nomata sapos hem no laek for tekem olketa magasin. Samfala mekem haosholder interest taem olketa readim wanfala scripture bifor olketa askem hem wanfala kwestin. Maet iu savve sei olsem for introducem datfala scripture, “Mi laek for savve long tingting bilong iu abaotem wanem disfala verse from Bible hem talem.” Then showim long haosholder wanfala point insaed magasin and storyim lelebet datwan mekem hem savve interest moa bifor iu offerim datfala magasin.
5. Wanem nao samfala main samting for tingim taem iumi preparem story for offerim magasin?
5 No eni rul stap abaotem wanem for talem taem iu offerim olketa magasin. Bat plande taem, hem gud for story bilong iumi hem simpol and short. Story long wei wea hem fitim iu and wea mekem man interest. Mekhae long olketa gud samting wea man savve kasem from olketa magasin, and story long wei wea mekem pipol interest. Sapos iu prepare gud, bae iu win long wei for offerim Wastaoa and Awake! magasin long olketa wea “garem fasin fitim laef olowe.”—Acts 13:48.