Chapter 5 (Part 3)
Organized to Do Jehovah’s Will, page 33-35
Olketa Overseer for Shepherdim Olketa Sheepsheep
MAN wea serve olsem overseer mas balance. Hem mas garem wan mind and fit for waka tugeta witim olketa nara overseer insaed body of elders, wea olketa tu garem responsibility for lukaftarem kongregeson. Hem mas garem stretfala tingting abaotem hemseleva taem hem deal witim olketa narawan insaed long kongregeson and pipol aotsaed. From man wea serve olsem overseer hem balance, hem bae no tingse tingting bilong hem winim olketa nara elder. Maet samfala nara elder garem fasin or savve wea moabeta winim hem. Man savve balance sapos hem lukluk gud long Bible bifor hem mekem olketa disison and traem best for followim example bilong Jesus Christ. (Phil. 2:2-8) Man wea elder no tok raf or man for faet long physical wei, bat hem man wea showimaot respect for olketa narawan and tingim olketa olsem hae winim hem. Hem no followim will bilong hemseleva and trae for forcem pipol for followim tingting and wei bilong hem evritaem. Hem no man for kros bat hem showimaot peace taem hem deal witim olketa narawan.
Man wea fit for serve olsem overseer insaed kongregeson mas garem gudfala tingting tu. Diswan minim hem mas savve gud long olketa principle bilong Jehovah and hao for followim. Hem mas garem balance tingting taem olketa hard samting or emergency kamap, and no kwiktaem judgem samting. Hem mas willing for acceptim kaonsel and direction. Hem mas no garem tufala difren tingting, hypocrite fasin, or man wea ova tumas and no tingting stret.
Paul remindim Titus hao wanfala overseer mas lovem gudfala samting tu. Hem mas raeteous and loyal. Hem showimaot olketa fasin hia long wei wea hem deal witim olketa narawan and strong for sapotim samting wea stret and gud. Hem man wea strong for worshipim Jehovah and evritaem followim olketa raeteous principle taem hem judgem samting. Hem no storyim samting wea olketa narawan no fit for savve abaotem.
From hem garem gudfala tingting, hem no expectim tumas samting from olketa narawan. And man wea overseer no wari tumas for kasem olketa material samting for hemseleva, no greedy for kasem selen long wei wea no honest, and no lovem selen. Hem no iusim position bilong hem insaed kongregeson for kasem olketa material samting from olketa brata, and hem no hol bak for sakrifaesim olketa material samting mekem hem givim taem bilong hem for lukaftarem olketa need bilong kongregeson. Love wea hem garem for olketa brata and olketa stranger, and wei wea hem sakrifaesim hemseleva for helpem olketa, hem showimaot hem garem fasin for barava welkamim pipol, and hao hem willing for givim hemseleva and olketa samting bilong hem for helpem olketa narawan.—Acts 20:33-35.
Man wea kamap overseer insaed kongregeson mas fit for teach, mekem hem savve duim assignment bilong hem long gudfala wei. Olsem samting wea Paul talem Titus, datfala overseer mas “hol strong long faithful word long wei wea hem teach, mekem hem fit for encouragem pipol long gudfala teaching and kaonselem olketa wea againstim diswan.” (Titus 1:9) Taem overseer hem teach, hem mas savve hao for story long wei wea helpem narawan barava minim samting, pruvim samting wea hem talem, ansarem olketa kwestin, and storyim Bible long wei wea muvim olketa narawan and strongim faith bilong olketa. Overseer mas teach olsem long gudfala taem and hardfala taem tu. (2 Tim. 4:2) Hem bae garem patient and kwaet fasin taem hem kaonselem samwan wea duim rong samting or taem hem trae for muvim man wea daotem samting for garem faith and duim gudfala waka. Wei wea overseer hem fit for teachim olketa long audience or olketa man wanwan showimaot hem kasem disfala important mark.
Aposol Peter talem hao olketa elder wea serve long kongregeson mas duim diswan long willing wei and from olketa barava want for duim and no from eniwan forcem olketa. Olketa mas showimaot olketa interest long waka bilong olketa. Olketa leadim, and kamap example for olketa sheepsheep.—Heb. 13:17.
Luk olsem olketa mark hia wea olketa overseer mas kasem hem barava hae. Hem tru, no eni overseer savve kasem olketa hae mark insaed Bible long perfect wei, bat olketa elder insaed kongregeson mas no barava short long eni fasin hia wea savve mekem olketa no fit for serve olsem overseer. Maet samfala elder moabeta long samfala fasin and olketa nara elder moabeta long olketa difren fasin. Datwan mekem full body of elders garem evri gudfala fasin wea helpem olketa for lukaftarem gud kongregeson bilong God.