Niu Spesol Assembly Day Program

Theme for spesol assembly day program for 2008 service year nao hem “Jehovah Hem Man for Wakem Clay Pot and Iumi Nao Datfala Clay,” wea hem kam from Isaiah 64:8. Thru long disfala program, kaonsel from Bible bae strongim iumi for tinghae long wisdom, justice, paoa, and love bilong Jehovah, wea hem nao disfala Nambawan Man for wakem clay pot.

Tok bilong circuit overseer “Kamap Olsem Gudfala Dish Saed Long Ministry,” bae showimaot hao plande pipol distaem enjoyim staka blessing from olketa savve long truth and sharem datwan long olketa narawan. Disfala tok “Wei for Ting Raonem Samting Bae Protectim Iu” bae showimaot hao wei for ting raonem olketa raeteous principle bilong Jehovah savve protectim iumi. Brata wea branch office markem bae storyim long audience tufala tok hia “No ‘Followim Disfala World’” and “Letem Nambawan Man wea Wakem Clay Pot Changem Iu.” Parents and olketa young wan bae kasem encouragement long tufala tok hia “Olketa Young Wan wea Jehovah Savve Iusim” and “Important Waka wea Parents Garem for Trainim Pikinini.” Thru long olketa demonstration and olketa interview, bae iumi barava hapi for herem and lukim wanem olketa brata and sista bilong iumi duim long ministry bilong olketa. Olketa wea laek for baptaes long wata for showimaot olketa dedicate long God shud talem kwiktaem long presiding overseer. No forget for tekem kam Wastaoa long week bilong spesol assembly day.

Eni samting wea Nambawan Man wea wakem clay pot laek for duim, bae hem duim. Bat each wan long iumi nao mas chus for acceptim wei wea hem changem iumi. Olketa wea wise for stap anda long olketa haefala mark bilong Jehovah, bae olsem wanfala haf clay wea hem wakem, wea kamap smooth and change for kamap wanfala gudfala dish. Taem iumi waka tugeta witim Jehovah, iumi praisem rul bilong hem and kasem staka blessing.