Chapter 5 (Part 8)
Organized to Do Jehovah’s Will, page 49-54
Olketa Overseer for Shepherdim Olketa Sheepsheep
DISTRIK OVERSEER
Distrik overseer tu hem wanfala traveling elder wea kasem appointment from Governing Body. Hem kasem assignment from branch office for lukaftarem olketa circuit wea insaed wanfala distrik. Hem serve olsem chairman long olketa circuit assembly program insaed long distrik bilong hem and hem givim pablik tok long circuit assembly. Long week wea circuit assembly kamap, hem waka witim wanfala kongregeson insaed datfala circuit. Hem lead long preaching waka and givim olketa tok from Bible for encouragem datfala kongregeson.
Branch office markem date bilong circuit assembly and spesol assembly day for evri circuit and givim schedule for distrik overseer followim. From samfala pablisa stap farawe or ples for assembly hem smol nomoa, olketa divaedem samfala circuit long olketa sekson and each sekson garem circuit assembly or spesol assembly day seleva. Distrik overseer mas savve long diswan and hem bae stap wanfala week long each sekson long datfala circuit wea garem circuit assembly. Hem bae story firstaem witim circuit overseer abaotem which kongregeson nao hem bae visitim long week bilong each circuit assembly.
Distrik overseer savve encouragem circuit overseer and waef bilong hem (sapos hem marit) and givim samfala gud idea wea bae helpem olketa long waka bilong olketa. Hem duim diswan long Tuesday aftanun long week wea hem visitim kongregeson. Samfala taem branch office bae givim samfala point wea olketa savve storyim tugeta long disfala meeting. Maet circuit overseer and waef bilong hem garem olketa kwestin or problem wea olketa needim help from distrik overseer. (Prov. 20:5) Maet distrik overseer tu laek for story abaotem samfala samting wea hem lanem taem hem duim disfala waka and wea hemseleva lukim. Circuit overseer bae story seleva witim distrik overseer abaotem olketa need bilong circuit. Maet distrik overseer storyim samfala point hia insaed tok bilong hem long circuit assembly program.
Long start bilong week wea hem visitim kongregeson bifor circuit assembly, wea plande taem diswan hem long Tuesday evening, distrik overseer bae attendim shortfala Kongregeson Buk Study long Kingdom Hall witim full kongregeson and bihaen hem bae givim wanfala tok long kongregeson. Sapos olketa elder needim advaes or help witim samfala samting saed long kongregeson, olketa bae talem firstaem long distrik overseer and then hem bae garem meeting witim olketa. Main samting, hem bae leadim preaching waka for datfala week. Hem and waef bilong hem bae share evribit long field service. Circuit overseer and waef bilong hem tu bae sapotim evri arrangement for field service for datfala week. Presiding overseer bae mek sure evriwan savve long olketa taem and ples bilong olketa meeting for preaching waka. Hem bae mek sure tu inaf territory hem stap and mekem arrangement for olketa wea laek for waka witim olketa traveling overseer.
Long end bilong circuit assembly (or olketa assembly), distrik overseer bae sendem wanfala report long branch office for talem hao nao program hem gohed long datfala circuit and tingting bilong olketa brata abaotem program. Hem bae givim report abaotem spiritual saed and need bilong datfala circuit. Wanfala taem insaed long month, hem bae givim report tu for field service bilong hem and selen wea hem iusim for peim samfala samting for duim waka bilong hem. Hem kasem bak selen tu from branch office for samfala samting hem mas peim for duim waka bilong hem, olsem pasis, kaikai, ples for stap, and olketa nara samting sapos olketa kongregeson no givim selen long hem for olketa samting hia, olsem olketa duim for circuit overseer.
BRANCH KOMITI
Long evri branch office bilong Olketa Jehovah’s Witness long world, thrifala or moa brata wea fit and mature long spiritual wei serve olsem wanfala Branch Komiti for lukaftarem preaching waka long datfala kantri or olketa nara kantri wea stap anda long datfala branch. Wanfala brata insaed disfala komiti hem serve olsem Branch Komiti coordinator.
Olketa wea serve long Branch Komiti lukaftarem olketa samting wea affectim olketa kongregeson wea stap anda long datfala branch. Olketa arrangem wei for olketa kongregeson kasem olketa pablikeson wea “faithful and wise slave” redyim for strongim evriwan insaed long kongregeson. (Matt. 24:45) Main waka bilong olketa hem for mek sure gud nius abaotem Kingdom hem kasem full territory wea branch lukaftarem and for mek sure olketa kongregeson, circuit, and distrik olketa organize long wei wea lukaftarem gud olketa samting saed long preaching waka. Branch Komiti lukaftarem tu waka bilong olketa missionary and waka bilong olketa spesol, regular, and auxiliary pioneer. Taem olketa assembly and convention kamap, olketa brata hia mekem olketa arrangement and givimaot olketa assignment for mek sure ‘evri samting followim stretfala wei and gohed gud.’—1 Cor. 14:40.
Long samfala kantri, olketa garem Kantri Komiti. Datfala komiti stap anda long Branch Komiti wea lukaftarem datfala kantri. Kantri Komiti help for lukaftarem waka wea gohed long datfala kantri. Hem lukaftarem Bethel, raetem olketa leta and report, and lukaftarem olketa samting saed long preaching waka. Kantri Komiti hem waka witim Branch Komiti for helpem waka long datfala kantri gohed gud.
Governing Body nao appointim evriwan wea serve long olketa Branch Komiti and Kantri Komiti.
ZONE OVERSEER
Samfala taem Governing Body sendem olketa brata wea fit for visitim evri branch. Olketa brata hia serve olsem zone overseer. Main waka bilong olketa hem for helpem Branch Komiti for stretem olketa problem or ansarem olketa kwestin wea maet olketa garem saed long preaching waka. Sapos hem fitim, zone overseer bae garem meeting tu witim olketa missionary wea waka anda long olketa branch wea hem visitim. Hem bae story witim olketa abaotem eni problem and need wea olketa garem, and givim encouragement for strongim olketa long waka wea olketa duim for preach abaotem Kingdom and mekem pipol kamap disaepol.
Zone overseer hem lukluk tu long olketa record bilong branch office. Hem barava interest for savve hao nao preaching waka hem gohed long there, and tu, olketa nara samting saed long kongregeson. Sapos branch garem factory for printim olketa pablikeson, farm, or olketa nara samting, hem bae lukluk gud long olketa samting hia. Taem zone overseer visitim olketa branch, hem bae share long preaching waka tu.
OLKETA OVERSEER WEA SHOWIMAOT LOVE
Olketa visit from olketa traveling overseer savve encouragem iumi evriwan, and strongim olketa kongregeson long faith. (Rom. 1:12; Eph. 4:3) Olketa pablisa luksavve hao olketa mas helpem each other. Olketa waka for helpem evriwan long kongregeson and waka for talemaot gud nius abaotem Kingdom. (1 Cor. 12:12-31) Tru tumas, iumi kasem gudfala samting from hard waka and love wea olketa Christian man hia wea mature long spiritual wei showimaot. Iumi bae kasem samfala gud samting moa sapos iumi gohed for stap anda long olketa elder long kongregeson and olketa nara overseer wea kasem appointment for lukaftarem olketa sheepsheep and disfala waka. (1 Cor. 16:15-18; Phil. 2:25, 29) Taem iumi duim olsem, iumi garem wan mind witim Hed bilong kongregeson and Lord bilong iumi, Christ Jesus, wea hem nao datwan wea Jehovah appointim olsem Gudfala Shepherd. (Eph. 1:22, 23) From datwan, spirit bilong God hem stap long olketa kongregeson evriwea long world, and Word bilong God hem leadim waka wea gohed long earth.—Ps. 119:105.