Waswe, Kongregeson Bilong Iu Garem Bigfala Territory?
1 From olketa taon bilong Judea go kasem olketa farawe ples aotsaed long Galilee, Jesus hem witness evribit long bigfala territory bilong Israel bifor. (Mark 1:38, 39; Luke 23:5) Iumi tu mas story witim plande moa pipol witim datfala gud nius. (Mark 13:10) Bat diswan savve kamap wanfala hard samting. Why nao olsem?
2 Plande kongregeson long Solomon Islands garem farawe territory. Wanem nao bae iumi duim for helpem pipol wea stap long olketa farawe territory olsem for lanem truth abaotem Jehovah, Jesus, and datfala Kingdom?
3 Plan Gud: Service overseer and territory servant need for arrangem waka bilong kongregeson mekem gud samting savve kamaot from diswan. Maet hem gud for markem samfala Saturday wea plande long iumi savve duim preaching waka for full day. Taem iu duim farawe territory, plan for iusim moa taem long field service sapos hem fitim, tekem kaikai bilong iu for lunch long midol day. Maet iufala savve meet for field service early lelebet mekem iufala garem inaf taem for go kasem territory or maet garem meeting for field service klosap long area wea iufala bae duim.
4 Mek sure iufala tekem staka literature witim iufala. Sapos iufala no duim datfala territory evritaem, maet hem fitim for leavim wanfala tract or old magasin long olketa haos wea no eniwan stap insaed. Offerim disfala tract Waswe, Iu Laek for Savve Moa Abaotem Bible? long evriwan wea iu meetim and leavim wanfala tract long haos wea no eniwan stap insaed.
5 Waka Tugeta: Taem iufala duim olketa bigfala territory, hem needim evriwan long kongregeson for waka tugeta. Sapos iu go long trak or kanu, iu savve share for peim kost bilong fuel. Mas garem fasin for luksavve taem iu meetim pipol wea willing for story. Tingim evritaem need for kasem evriwan insaed datfala territory, and tingim tu olketa long grup wea weitim iu. Sapos iu laek for story longtaem witim wanfala man wea interest, arrange witim grup bilong iu mekem olketa savve gohed long field service.
6 Mekem arrangement for go bak and helpem olketa wea showimaot interest. Raetem address and telephone namba sapos olketa garem, mekem iu savve witness moa long olketa thru long telephone. Sapos olketa road long datfala ples hem no garem nem or olketa haos no garem namba, raetem wanfala map or raetem lelebet story abaotem datfala ples and hao for kasem datfala man wea interest.
7 Iumi garem wanfala nambawan privilege for followim instruction bilong Jesus: “Nomata wanem taon or vilij iufala go long hem, lukaotem eniwan wea fit”! (Matt. 10:11) For sure Jehovah bae blessim hard waka bilong iufala taem iufala willing for givim iufala seleva for duim disfala waka wea givim bigfala reward!